Putum kilhtamaku ktlawayaw chu kmakgpitsiyaw lhuwa millones Biblia chu likgalhtawakga. Ktlawayaw sucursales chu atanu, nachuna kgalhiyaw sucursales chu imprenta xlikalanka katiyatni. Kwilaw klhuwa mil congregaciones chu ktamakxtumiyaw kkawaniyaw Pukgalhtawakga niku ni lhuwa tuku anan chu malanki Dios. ¿Tiku xokgo putum uma?

Putum tuku ktlawayaw litaxokgo tumin nema xatapaxuwan mastakan (2 Corintios 9:7). Kata 1879, xliʼakgtiy número xla revista, nema xwanikan Zion’s Watch Tower wa: «[Xlakata uma revista], kkanajlayaw pi wa JEHOVÁ tiku kinkamakgtayaman, chu xlakata chuna nikxni ktipukinaw chu ni ktikaskiniw latamanin kakinkamakgtayakgon». Asta la uku, chuntiya klakpuwanaw.

Tumin nema xatapaxuwan mastakan tlan malakgachakan kʼakgtum sucursal o tlan mujukan kcajas anta kPukgalhtawakga. Ni kskinaw diezmo, ni kpukinanaw, ni kmatajinanaw xlakata kmasiyayaw tuku wan Biblia chu ni kstayaw kilikgalhtawakgakan. Niti kinkaxokgoniyan xlakata klichuwinanaw Dios, xlakata kmasiyayaw kkintamakxtumitkan chu xlakata ktlawayaw kimpukgalhtawakgakan. Jesús wa: «Kaj chunata makgamakglhtinantit, pus na kaj chunata nkamastatit» (Mateo 10:8). Nipara chatum tiku skuja ksucursal kaxokgonikan, nipara Lakgkgolotsin tiku Pulalinkgo xTatayananin Jehová.

Tumin nema xatapaxuwan mastakan na maklakaskinkan akxni wi tuku masputunan. Xapulana siglo kstalaninanin Cristo xatapaxuwan xkamakgtayakgo tiku tuwa xtitaxtukgo (Romanos 15:26). Nachuna, la uku kkamakgtayayaw akxni wi tuku masputunan xlakata kkakaxtlawaniyaw xchikkan chu kamaxkikgo tuku nawakgo, lhakgat chu likuchun. Nachuna kkaxtlawaparayaw Pukgalhtawakga niku titaxtunit tuku nitlan.