Klakachilh kʼAcul, akgtum aktsu kachikin nema wi kkasipijni kxʼoeste Guatemala. Kifamilia tapakgsikgo kʼixiles, akgtum kachikin nema xkilhtsukutkan mayas. Ni kaj español xakchuwinan, na kkatsinilh kintachuwinkan. Kstakli akxni xʼanan guerra kkimpaís, nema makgapalalh puxamakuchaxan kata. Kʼuma guerra nikgolh lhuwa ixiles.

Akxni xakkgalhi akgtati kata, kintala tiku xkgalhi akgtujun kata xlikgamanamakgo akgtum granada chu kxmakan lakgpankgli. Wa xlakata nialh la klakawanalh pero kintala nilh. Lata uma kilhtamaku, akxni aktsujku xakwanit kkalh kʼakgtum pukgalhtawakga niku xwilakgo tiku lakgaxokgo klanka kachikin kʼGuatemala niku kkatsinilh klikgalhtawakga braille. Nikxni kkatsilh tuku xlakata tiku kskujkgo anta kiwanikgolh pi ni xakkatachuwinalh amakgapitsi laktsu kamanan chu kincompañeros ni xkintalalinkgo. Ankgalhin kiʼakstu xakwi, lu xaklakaskin pi xchalha ama akgtiy papaʼ nema akxni akxtum xaktatawila kintse, tiku lu tlan xkilikatsini. Lu nitlan, pero nilh akxni xakkgalhi 10 kata. Lu klipuwa, xlakata kmakgatsankgalh tiku lu xakpaxki.

Akxni xakkgalhi 11 kata, ktaspitli kinkachikin chu kkalh tawila niku xwi kintutala chu xfamilia. Kimaxkikgolh tuku xakmaklakaskin, pero niti la kimakgtayalh xlakata la xakmakgkatsi. Lakgachunin xakwani Dios: «¿Tuku xlakata nilh kintse? ¿Tuku xlakata nialh klakawanan?». Latamanin xkiwanikgo pi xtalakaskin Dios tuku xkiʼakgspulama. Wa xlakata xaklakpuwan pi Dios nitlan xlikatsi chu xtlawa tuku ni xaʼakgstitum. Komo xakmatlanilh, kiʼakstu xkimakgnika.

Xlakata nialh klakawanalh nila tuku xaktlawa chu na nitlan la xwi kintalakapastakni. Akxni aktsujku xakwanit, makglhuwa kilikgamanankgolh. Nikxni kwa pi chuna xkintlawakanit, xlakata xaklakpuwan pi niti kuenta xkintlawanilh. Latamanin ni lu xkintachuwinankgo. Lu nitlan xakmakgkatsi chu ni xaklakgati xakkatatawila amakgapitsi, xlakata niti xaklipawan.

Akxni xakkgalhi 13 kata, akgtum tamakgaxtokgat xtatayananin Jehová kintachuwinankgolh akxni ktaxtulh kʼrecreo kʼescuela. Chatum makgalhtawakgana tiku xkilakgalhaman xkawaninit pi xkilakgapaxialhnankgolh. Kiwanikgolh  pi Biblia malaknu pi tiku ni lakawanankgo nalakawanamparakgo chu tiku nikgonit nalakastakwanankgo (Isaías 35:5; Juan 5:28, 29). Lu xaklakgati xakkakgaxmatni, pero xlakata ni xaklismaninit nakchuwinan, nitu xakkawani. Maski ni lu xakchuwinan, ni kilitlakgwankgolh chu tlan kilikatsinikgolh chu chuntiya kilakgapaxialhnankgolh xlakata xkimasiyanikgolh tuku wan Biblia. Xtlawankgo 10 kilómetros anta kkasipijni xlakata xchankgolh kkinkachikin.

Akxni kintutala kiwanilh pi xtasiyakgo pi pobres xwankgonit pero lu tlan la xtakaxtayakgo. Xtasiya pi xkimpaxkikgo, xlakata katuwa tuku xkimaskiwikgo. Xakkatsi pi kaj xaxlikana kstalaninanin Cristo lhuwa tuku xlimakgxtakgkgolh xpalakata amakgapitsin.

Akxni xkilimakgalhtawakgekgo Biblia xmaklakaskinkgo likgalhtawakga kbraille. Xakʼakgatekgsa tuku xakkatsinima, pero tuwa xakmakgkatsi nakkanajla makgapitsi tuku xmasiyakgo. Akgtum liʼakxilhtit, tuwa xakmakgkatsi xakkanajlalh pi Dios xkimpaxki chu xlakata amakgapitsin nachuna xkiʼakxilhkgolh. Kkatsilh tuku xlakata la uku masta talakaskin kaʼanalh tuku nitlan pero tuwa kmakgkatsilh xlakata xakakxilhli la chatum tlat xapaxkina. *

Tsinu tsinu, akxni kkatsinilh tuku masiya Biblia, talakgpalilh la xaklakpuwan. Akgtum liʼakxilhtit, kkatsilh pi Dios lu nitlan limakgkatsi akxni akxilha pi patinanaw. Xlakata kskujnin tiku kamakgapatinankan, xla wan: «Kakxilhnit la kamapatinimaka kinkachikin [...;] xlakata kkatsi la patinamakgolh» (Éxodo 3:7). Akxni kkatsilh pi Jehová lu xapaxkina, klakpuwa pi naklimaklakaskin kilatamat xlakata naktlawa xtalakaskin. Kkata 1998 ktamunulh chu xtatayana Jehová kwa.

Akxni titaxtulh akgtum kata lata xaktamununit, kkalh kʼakgtum curso niku kamasiyanikan tiku ni lakawanankgo kʼEscuintla. Chatum tiku xʼan kʼakgtum congregación xalak uma kachikin katsilh pi lu tuwa xwanit xlakata nakan ktamakxtumit kʼAcul, xlakata na antiya xaktitaxtu kkasipijni niku xtitaxtukgo tamakgaxtokgat tiku xkimakgalhtawakgekgo. Xlakata tlan xkimakgtayakgolh, uma tala katekgsli akgtum familia tiku na xtatayana Jehová xlakata tlan xaktamakgxtakgli kxchik chu tlan xkimakgtayalh nakan ktamakxtumit. Asta la uku, kinkuentajtlawakgo xtachuna la xfamilia.

Tlan xakkawanin la tlan kilikatsinikgonit lhuwa natalan. Uma xlikana limasiya pi xtatayananin Jehová xaxlikana kstalaninanin Cristo.(Juan 13:34, 35).

Nialh kmakgkatsi pi nialhtu klitaxtu o ni kkgalhi takgalhkgalhin; la uku klipaxuwa kilatamat. Nialh wa klakapastaka pi nila klakawanan, wata kkamakgtaya amakgapitsin nalakgapaskgo tuku lu tlan lichuwinan Biblia. Akit na kmakgpulalin congregación chu kmasta taʼakgchuwin xalak Biblia kcongregaciones nema lakatsu wilakgolh. Na kpaxtikatsini xlakata tlan kmasta taʼakgchuwin klaklanka tamakxtumit niku ankgo miles latamanin.

Kkata 2010, kkilalh Niku Kamasiyanikan Lakgkgolotsin chu Ministeriales (la uku wanikan Escuela xla Tiku lichuwinankgo xTamapakgsin Dios) anta El Salvador. Uma escuela kimakgtayanit tlakg tlan nakkamakgtaya kinatalan. Kimakgtayanit xlakata nakmakgkatsi pi xlakaskinka kiʼakxilha chu kimpaxki Jehová, tiku tlan tlawa pi tiku nalakaskin tlan namakgantaxti xtalakaskin.

Jesucristo wa: «Tlakg anan tapaxuwan akxni mastakan nixawa akxni makglhtinankan» (Hechos 20:35, TNM). Akit lu kpaxuwa chu maski nikxni xaklakpuwan pi tlan nakpaxuwa, la uku kmakgkatsi pi tlan kkamakgtaya amakgapitsin.