TASTAKYAW XALA MAKGASA KINKAMAKGTAYAYAN ASTA LA UKU
Lu xlakaskinka tapatinankan
TASTAKYAW XALAK BIBLIA: «Kalapaxuwanalipinitit, chu na nalamatsankgananiyatit nchatunu amakgapitsin lapi wi nti lamakgasitsiyatit; xtachuna lantla nkamatsankgananin [Jehová], na chuna wixin nkatlawatit» (Colosenses 3:13).
¿Tuku wamputun? Anta kBiblia, talakgalhin tamalakxtumikan la tiku laklin chu tapatinankan xtachuna akxni wanikan pi nialh naxokgonan (Lucas 11:4). Maktum libro wan pi tachuwin xagriego nema tamatitaxti «kakilatapatiw» na kilhchanima «nialh namaxokgekana tuku laklipina, chu nialh katimatajika». Wa xlakata akxni wi tiku tapatiyaw maski nitlan kinkamamakgkatsiniyan, nialh nalakpuwanaw pi wi tuku kinkatlawanin. Pero tapatinankan ni wamputun nalakpuwanaw pi tlan tuku tlawalh o pi nialh nitlan makgkatsiyaw. Wata tuku laksaknitaw xlakata natapatiyaw, maski tlan ksitsiniw.
¿Makgtayanan uma tastakyaw? Putum tlawayaw tuku nitlan xlakata kgalhiyaw talakgalhin (Romanos 3:23). Wa xlakata talakaskin nakatapatiyaw amakgapitsin, xlakata namin kilhtamaku nalakaskinaw nakinkatapatikanan. Nachuna, komo tapatinanaw tlan nakinkakitaxtuniyan. ¿La tlawayaw?
Komo sitsinitaw chu chuntiya lakpuwanaw chu ni tapatinanaw akinin nitlan nakinkakitaxtuniyan. Uma nitlan talakapastakni max natlawa ni napaxuwayaw chu nitlan natawila kilatamatkan. Asta max lu nakinkamatatatliyan. Tuku wa makuchina Yoichi Chida makgalhtawakgena xla Psicología Andrew Steptoe lichuwinalh krevista médica Journal of the American College of Cardiology wan: «Nina makgas talakputsanalh pi xlakata lu sitsikan chu lawanikan tuku nitlan makgatatatla kinakujkan».
La uku kalakpuwanti tuku tlan, uma wamputun tuku tlan kitaxtu akxni tapatinankan. Akxni katapatiyaw amakgapitsin tlawa pi kaʼanalh takaksni, tlawa pi makxtum natawilayaw chu tlan nalatalalinaw. Pero tuku lu xlakaskinka, tlawamaw chuna la Dios, tiku putum kilhtamaku katapati tiku nitlan limakgkatsikgo xtalakgalhinkan chu kgalhkgalhima pi akinin nachuna natlawayaw (Marcos 11:25; Efesios 4:32; 5:1).