Akxni liwana latachuwinankan tlawa pi lu tlan latalalinkan. Dios na kinkawaniyan katachuwinaw xlakata xʼamigo nawanaw. Xla kinkawaniyan: «Wixin nakilatachuwinanaw chu natanatit chu nakilatlawaniyaw oración, chu akit xlikana nakkakgaxmatniyan» (Jeremías 29:12). Chuna la tachuwinanaw Dios, lakgtalakatsuwiyaw “chu xla nakinkatalakatsuwiniyan” (Santiago 4:8). Biblia malaknu: «[Jehová] lakatsu kalakgaliya wakg lata ti takilhani» (Salmo 145:18). Chuna la lhuwa natlawaniyaw oración tlakg tlan natalalinaw.

Jesús wa: «¿Ti nchatum nchixku wixin, akxni mpala wa aktsu xkgawasa, kskinilh nkaxtalanchuj..., ¿pa chiwix namaxkiy? Su mpala skiti kskinilh, wa lantla xmakilh skiti..., ¿pa luwa namaxkiy? Pus wa mpala pi wa wixin, [...] katsiyatit lantla ntu ntlan maxkikgoyatit lakwan xtatakinkan milakgskgatankan, pus ¿tu xaliwaka minTlatkan nti wi nkʼakgapun, wa ntu lakwan namaxkikgoy nkatuwaj, wa nti kskinikgolh?» (Mateo 7:9-11). Dios lakaskin katlawaniw oración xlakata “kinkalakgkatsanan” chu kinkamakgtayaputunan (1 Pedro 5:7). Wa tuku tlakg tlan, kinkawaniyan pi tlan nalakgtalakatsuwiyaw akxni kgalhiyaw taʼakglhuwit. Biblia wan: «Ni tu xatu ntu ntililakgaputsayatit; chi wampi wata paks kamasiyutit kxlakatin Dios wa ntu lakaskinatit kmiʼoracionkan, chu lantla mpala tu nalixakgatlilakapinatit, su naskinatit, na natamastayatit mpaxkatsinit» (Filipenses 4:6).

Tiku lakputsananikgo latamanin katsikgonit pi lhuwa millones makgkatsikgo pi xlitlawatkan oración. Asta tiku ni kanajlanikgo Dios chu agnósticos chuna tlawakgo. * Uma limasiya pi kinkatlawakan xlakata nalakgtalakatsuwiputunaw kiMalakatsukinakan. Chu Jesús wa: «Xatapaxuwan latamakgo tiku katsikgo pi lakaskinkgo tuku xla Dios» (Mateo 5:3, TNM). Tuku tlan nakinkamamakgkatsiniyan wa pi ankgalhin natlawaniyaw oración Dios.

¿Tuku nala komo xʼamigo Dios nawanaw?