Templo nema tlawalh Salomón xtlawakanit kxakgspun sipi. Xkgalhi laktlanka patsaps kxʼeste chu kʼoeste xla sipi xlakata natamakgalhxtumikan chu chuna tlan nakgalhikgo patios xlistili uma chiki. Herodes xlakaskin pi xtemplo tlakg lanka xwa ni xawa xla Salomón, wa xlakata lakkaxtlawalh chu tlakg lanka tlawalh.

Tiku xpulalimakgolh taskujut malankikgolh kxnorte xlakata anta na xʼanalh patios. Ksur, 32 metros malankikgolh. Xlakata tlan xtlawalh, tlawakgolh lhuwa laktulanka patsaps. Makgapitsi patsaps 50 metros xlitalhman xkgalhikgo.

Herodes na xlakaskin pi tlan xmakgkatsikgolh judíos, ni xmakgxtakgkgolh xtaskujutkan o tamakamastan nema xtlawakgo ktemplo. Chuna la wa historiador judío Josefo, Herodes kamasiyanilh sacerdotes la patsapsnankan chu la xwaknankan xlakata kskujkgolh tiku kaj manwa xkalakgchan.

Herodes nilh akxni nina xmasputukan uma taskujut. Kkata 30, xtitaxtunita tipuxumachaxan kata lata xtaskujma (Juan 2:20). Titaxtulh kilhtamaku tiku makgalhsputulh uma taskujut wa xtanat, Herodes Agripa II kxapulana siglo.

Makgapitsi xalak isla max xlakpuwankgo chuna la xtakanajla griego. Klibro xla Hechos lichuwinan Pablo pi laklalh barco niku xminkgo lakatsu kMalta. Akxni wililh pixtum kiwi anta niku xwi lhkuyat nema xtlawanit xlakata xtsitsijwankgolh xla chu tiku akxtum kataminkgolh, tantum luwa makaxkalh chu ni xmakgxtakga. Xalak isla wankgolh: «Wa yuma nchixku, luwa xlikana mpi makgnina, wa nti maski lakgtaxtuninit ntakgayawana, pus wa xtalulokgtat Dios, ni namalatamaniy» (Hechos 28:4).

Ktachuwin griego nema tamaklakaskin «xaʼakgstitum» wa dike. Uma tachuwin kilhchanima tuku xaʼakgstitum, pero nachuna, Dike, o Dicea, wa xtukuwani diosa xla akgstitum kxtakanajlakan griegos. Xtalakpuwan pi xkakuentajtlawama tuku xtlawakgo latamanin chu xwani Zeus tuku nitlan xtlawakgonit nema ni xtakatsi xlakata xkamalakgaxokgeka tiku chuna xtlawakgonit. Chuna la wan maktum diccionario xalak Biblia, tiku xwilakgolh kMalta max lakpuwankgolh pi maski Pablo nitu lanilh kpupunu, diosa xla tuku akgstitum makglhtakgsli tuku xtlawanit chu limalakgaxokgelh tantum luwa. Xalak Malta nialh chuna lakpuwankgolh akxni apóstol nitu lanilh maski xkalh luwa.