Klakachilh kʼakgtum aktsu kachikin kPolonia lakatsu kxfrontera Alemania. Ni lhuwa taʼakglhuwit xakkgalhi, xʼanan granjas chu lhuwa kiwi. Kinatlatni lu xapaxkinanin xwankgonit chu xkiwanikgo pi tlan xaklikatsilh, xakkgalhtawakgalh chu xakalh kʼuniversidad.

Ktsukulh kgalhi taʼakglhuwit akxni ktsukulh kgalhtawakga Derecho kʼuniversidad xalak Wroclaw. Xlakata makgat xaklama, ktsukulh katalalin tiku nitlan likatsikgo. Putum kilhtamaku klakgatinit fútbol, pero xalaksasti kiʼamigos lu xmalakatsalikgo chu nachuna lu ktsukulh klakgati. Equipo nema lu xaklakgati wa xalak Varsovia. Sábado chu domingo xakan kaʼakxilha niku xkgamanankgolh. Akxni xakanaw niku xkgamanankgo, xakkgachiyaw, xakwayaw drogas, chu lakgachunin xakkatalatlawayaw tiku xtatayakgo atanu equipo. Xaklakpuwan pi uma xʼama kimakgtaya tlan xakmakgkatsilh, maski xakkatsi pi komo xkinchipalh policía nitlan xʼama kinkitaxtuni kkintakgalhtawakga.

Kiʼamigos chu akit, xakanaw clubs nocturnos chu discotecas, niku atsinu ni putum kilhtamaku xaklachipayaw. Policías makglhuwa kinchipakgolh, pero xaklakkaxtlawa uma taʼakglhuwit xlakata ni xtaliwakalh, xmin kilhtamaku asta xakkamaxki tumin. Xaklakpuwan pi xaklipaxuwama latamat; pero liwana xakkatsi pi nitlan tuku xaktlawama. Wa xlakata, xakan kpusikulan akgatunu domingos xlakata tlan xakmakgatsilh kkintalakapastakni.

Kata 2004, chatiy xtatayananin Jehová kilakgapaxialhnankgolh kkinchik, chu kmakgamakglhtinalh takgalhtawakga. Chuna la xakkatsinitilhama tuku wamputun nalitaxtuya chatum kstalanina Cristo, kintalakapastakni nitlan xkimamakgkatsini. Xakkatsi pi kilimakgxtakgat xwanit kuchu, droga chu tiku ni kgalhakgaxmatkgo tuku wan Biblia. Nachuna kkatsilh pi xtalakaskin nialh xaluku xakwa. Maski xakkatsi pi kililakgpalit uma, chuntiya xaktlawa tuku nitlan.

Pero akgtum katsisni putum talakgpalilh akxni xaktalachipama kgalhtsayan lakchixkuwin. Ktamacha katutsu, niku chuntiya kinkgaxikgolh chu kiʼaktayakgolh. Klakpuwa pi xakama niy, wa xlakata ktlawalh oración: «Jehová, lu nitlan klimakgkatsi pi  ni kmakgantaxtilh minTachuwin. Komo ni nakni nakkatakgalhtawakga Biblia xtatayananin Jehová chu nakmatsaja kilatamat». Maski lipekua kinkgaxika, ni knilh. Chu kmakgantaxtilh tuku xakwanit: klikgalhtawakgalh Biblia.

Kkata 2006 kkalh kʼInglaterra. Xakmakgstokgputun lhuwa tumin chu xaktaspitputun kPolonia xlakata xakmaxtulh kintítulo xla Derecho. Akxni xaklikgalhtawakgama Biblia ktekgsli akgtum versículo nema lu kimakgtayalh. Apóstol Pablo tsokgli: «Xlikana kliʼakxilha putum uma la tuku nitu litaxtu xlakata tuku lu lhuwa xtapalh kgalhi takatsin xla kiMalanakan Cristo Jesús. Xpalakata xla putum kmakgatsankganit chu kliʼakxilha la lhuwa palhma, xlakata tlan naktlaja Cristo» (Filipenses 3:8, TNM). Chuna la akit, Pablo na xlikgalhtawakganit limapakgsin chu na lu lixkajni xlikatsi (Hechos 8:3). Pero katsilh pi xʼanan tlakg tlan latamat: naskujni Dios chu liskujli xlakata xlatamalh la Jesús. Akxni klilakapastakli xliʼakxilhtit Pablo kkatsilh pi maski xaktlajalh tumin chu xaluku xakwa ni xakama paxuwa. Wa xlakata klakpuwa, komo Pablo tlan lakgpalilh xlatamat akit na tlan xaklakgpalilh. Wa xlakata ktamakgxtakgli kʼInglaterra chu nialh kmakgalhsputulh kintakgalhtawakga kʼuniversidad.

Akxni tlakg xaklakgapasa Jehová, xakmakgkatsi pi tlakg xaktalakatsuwini. Lu tlan klimakgkatsilh akxni kkatsilh pi katapati tiku xlikana lakgpaliputunkgo xlatamatkan (Hechos 2:38). Akxni klilakpuwan tachuwin nema wi 1 Juan 4:16 wan pi, «Dios wa tapaxkit», kʼakgatekgsa tuku xlakata Dios xkajni tiku nitlan likatsi.

Na lu kaks klilakawa la likatsikgo xtatayananin Jehová. Liwana tasiya pi liskujkgo xlakata nalinkgo xlatamatkan chuna la wan Biblia. Xakmakgtapakgsiputun kʼuma xatapaxuwan familia. Akxni lhuwa xakliskujnit chu lhuwa xaklakgpalinit kilatamat, ktamunulh kkata 2008 chu xtatayana Jehová klitaxtulh.

Lata pulana lhuwa tuku xakkgalhiputun, xaluku xakwanit, xakwa droga chu xakkgota chu lu xaklakgati takgaman, Biblia kilakgpalinit chu la uku lu klipaxuwa akxni kkamasiyani amakgapitsin tuku xlikana masiya Biblia. Xlikana chuntiya klakgati fútbol, pero la uku kaj akxni kpaxuwaputun.

Ktatamakgaxtokgnit Esther, chatum lu stlan kstalanina Cristo. Lu klakgatiyaw kamasiyaniyaw tuku wan Biblia tiku chuwinankgo polaco knoroeste xalak Inglaterra. La uku xlikana klipaxuwa kilatamat, kintalakapastakni tlan wi chu kkatsi tuku naktlawa kkilatamat.