TIMOTEO tamakgatlima niku wi xchik, liwana lakapastakma tuku kgalhkgalhima. Kastalanima xcompañeros niku lu lakgapasnan. Kachikin Listra, xwi kasipijni kxitat niku kaxtum, nema tsinu tsinu tlakg makgat tamakgxtakgma. Timoteo lakalitsin akxni lakapastaka xtse chu xnana o xtsiyuna tiku ni limasiyaputunkgo pi lipuwankgo akxni kamakgxtakga. ¿Pi tlan xwa xtalakgaspitli chu amakgtum xkaʼakxilhi?

Apóstol Pablo lakaʼakxilha chu talitsin xlakata namatliwakglha. Pablo katsi pi Timoteo ni lu chuwinan, pero lu xlakaskinka akxilha xtapaxuwan uma kgawasa. Timoteo max kgalhi 20 kata chu lu paxki chu maxki kakni Pablo. La uku, lakgamakgat taʼama uma chixku tiku ni makgxtakgnan chu kgalhi lhuwa litliwakga. Xʼamakgo tlawankgo, tiyakgo kbarco, chu lhuwa tuku nitlan xʼama anan ktiji. Timoteo ni katsi komo nakaʼakxilhpara xfamilia.

¿Tuku xlakata uma kgawasa lakgpalilh xlatamat? ¿Pi tlan nakitaxtu maski lhuwa tuku limakgxtakgma? ¿Tuku kinkamasiyaniyan xtakanajla Timoteo?

Kalichuwinaw akxni xtsankga akgtiy kata xlakata naʼan. Listra, max niku stakli, akgtum aktsu kachikin xwanit nema xwi lakgamakgat chu kaxtum. Max latamanin xʼakgatekgskgo griego, pero xchuwinankgo licaónico. Akgtum kilhtamaku taʼakglhuwikgolh uma kachikin niku xʼanan takaksni: chatiy tiku xlichuwinankgo Dios, Pablo chu Bernabé aku xchankgonit kkachikin Iconio nema wi lakatsu. Akxni xlichuwinamakgolh Dios, Pablo akxilhli chatum chixku tiku nila xtlawan chu xtasiya pi xkanajla tuku xmasiyama apóstol. Wa xlakata Pablo tlawalh akgtum milagro chu mapaksalh (Hechos 14:5-10).

Lhuwa latamanin xalak Listra xkanajlakgo tuku xwankan xlakata dioses tiku xmaklakaskinkgo xmakni latamanin chu makgasa anta xlatamakgonit. Wa xlakata, lakpuwankgolh pi Pablo wa dios Hermes chu Bernabé Zeus. Umakgolh kstalaninanin takgalana kamachokgokgolh uma latamanin xlakata ni xkatlawanika tamakamastan (Hechos 14:11-18).

Pero, makgapitsi xalak Listra ni kanajlakgolh pi dioses xwankgonit, wata lakpuwankgolh pi chatiy latamanin xwankgonit nema xlinkgo lu stlan tamakatsinin. Akgtum liʼakxilhtit, Eunice chatum judía tiku xtatamakgaxtokgnit chatum griego * chu Loida xtse kaks kgaxmatnikgolh Pablo chu Bernabé. Xchanita kilhtamaku nakamakatsinikan judíos tuku lu xkgaxmatputunkgo: xchinit Mesías chu xmakgantaxtinit lhuwa tuku xwankanit xpalakata.

¿La makgkatsilh Timoteo xlakata Pablo lakgapaxialhnalh? Xla xmasiyanikanit lata «aktsu kgawasa xwanit» pi napaxki xasanto tatsokgni xahebreo (2 Timoteo 3:15). Xtachuna la xtse chu xnana, katsilh pi Pablo chu Bernabé xmasiyakgo tuku xaxlikana xlakata Mesías. La uku, kalakapastakti uma chixku tiku nila xtlawan chu Pablo makuchilh. Max lata aktsinajku xwanit Timoteo makglhuwa akxilhli  xtiji Listra. ¡La uku xlimakgtumku xʼakxilhma pi xtlawama! Wa xlakata Eunice, Loida chu Timoteo kstalaninanin Cristo wankgolh. Natlatni chu tatajni lhuwa tuku kamasiyani Eunice chu Loida. Wixin nachuna lu tlan liʼakxilhtit nawanatit xpalakata lakgkgawasan.

Max tiku xlitaxtukgonit kstalaninanin Cristo kʼListra lu xpaxuwamakgolh xlakata xasasti takgalhkgalhin. Pero nachuna katsikgolh pi kstalaninanin Cristo litaxtukan tuwa xwanit. Judíos xalak Iconio chu Antioquía tiku ni xlakgatikgo tuku xmasiyakgo Pablo chu Bernabé chankgolh kʼListra chu tlawakgolh pi latamanin tlakg ksitsinikgolh Pablo chu Bernabé. Alistalh umakgolh latamanin tiku lu xsitsikgonit aktalakgolh Pablo. Akxni makglhuwata xʼaktalakgonit, tamacha kkatiyatni. Xwatamaxtukgolh kachikin chu lakpuwankgolh pi xninit (Hechos 14:19).

Kstalaninanin Cristo xalak Listra ankgolh niku xmacha chu makgstilikgolh. ¡Skaya limakgkatsikgolh akxni Pablo tsukulh tatsuwi, takilh chu ni pekualh tanupa kkachikin! Lichali, xla chu Bernabé ankgolh kDerbe xlakata chuntiya nalichuwinankgo Dios. Anta na tlawakgolh pi makgapitsi na kstalaninanin Cristo xwankgolh, alistalh ni pekuankgolh chu taspitparakgolh kʼListra, maski lu katuwa xwanit. ¿Tuku xlakata taspitparakgolh? Xlakata chuntiya «xmakgatanksamakgo xtakgpuwantinkan limakgalhtawakgat, kstakyawamakgoka lantla natapalhinikgoy kxtakanajlakan». Kalilakpuwanti kgawasa Timoteo, kaks lilakawan akxni kakgaxmatni Pablo chu Bernabé. Xkawanimakgo kstalaninanin Cristo pi takgalhkgalhin nema xʼamakgolh makglhtinankgo lu tlan xwanit chu xtlawa pi tapatin nema xkgalhikgo nitu xlitaxtulh. Kawanikgolh: «Xlakaskinka napatiya xlakata xlilhuwa tapatin, lakimpi chuna nalitanuya kxtapakgsin Dios» (Hechos 14:20-22).

Timoteo akxilhli pi Pablo xlin xlatamat chuna la xwan, ni xpekuan akxni xputsastalanikan xlakata xkamasiyani xalakwan xalaksasti amakgapitsin latamanin. Timoteo xkatsi pi komo kstalanilh xliʼakxilhtit, na xʼamaka putsastalanikan. Max asta xtlat ni xlakaskilh. Pero ni xʼama masta talakaskin pi wi tiku xtlawalh ni kskujnanilh Dios. La uku na wilakgolh lhuwa lakgkgawasan la Timoteo. Limasiyakgo liskgalala akxni kaputsakgo amigos nema tliwakga wi xtakanajlakan nema kawanikgo chu  kamakgtayakgo tlakg naskujnanikgo Dios. Xlakan na ni mastakgo talakaskin pi akxni kaputsastalanikan natlawa pi nialh naskujnanikgo xaxlikana Dios.

Max xtitaxtunita akgtiy o akgtutu kata, Pablo taspitpa kʼListra chuna la talichuwinalh niku tsuku artículo. Max xchik Timoteo lu xpaxuwamakgolh xlakata xʼakxilhmaparakgolh Pablo, chu Silas tiku xtaʼan. Pablo na lu xpaxuwa xlakata xtaspitparanit. La uku tlan xʼakxilha la staknit xaxlikana takanajla nema xchanit. Anta katekgsli Loida chu Eunice, xtsumat, chatiy kstalaninanin Cristo tiku ni xmakgxtakgkgo Dios tiku Pablo lu tlan akxilha “xaʼakgstitum xtakanajlakan” (2 Timoteo 1:5). ¿Chu Timoteo?

Pablo katsilh pi uma kgawasa lhuwa kstaknit xtakanajla lata xaʼawatiya xlakgapaxialhnanit. Natalan tlan «xlichuwinankgo» kʼListra chu kʼIconio, nema xwi 32 kilómetros knoreste (Hechos 16:2). ¿Tuku xtlawanit xlakata tlan xlichuwinanka?

Tuku xwi «xasanto tatsokgni» nema Timoteo xmasiyaninit xtse chu xnana “akxni aktsinajku xwanit” xʼanan tastakyaw nema xkamakgtaya lakgkgawasan (2 Timoteo 3:15). Pulaktum wa uma: «Kalakapastakti lu xaTlan miMalakatsukina la uku akxni kgawasaku wix» (Eclesiastés 12:1). Uma tachuwin lu xlakaskinka litaxtulh akxni Timoteo kstalanina Cristo wa. Katsilh pi tuku lu xlakaskinka wa lakapastakkan Malakatsukina akxni lichuwinankan xlakata xKgawasa, Jesucristo. Liskujli xlakata ni lu xpekualh chu lichuwinalh xalakwan tamakatsin.

Lakchixkuwin tiku xpulalinkgo congregaciones akxilhkgolh la stakli xtakanajla Timoteo. Lu xlipaxuwakgo akxni xʼakxilhkgo pi uma kgawasa xkamatliwakglha amakgapitsin. Chu tuku tlakg xlakaskinka, Jehová na xʼakxilha la xtatliwakglhma xtakanajla. Dios tlawalh pi xwanka tuku xʼama tlawa Timoteo klhuwa congregaciones. Akxni Pablo lakgapaxialhnalh Listra, katsilh pi tlan xmakgtayalh akxni xʼan lichuwinan Dios kʼatanu kachikinin. Natalan tiku xlakgapaskgo kgawasa tlan xʼakxilhkgo tuku xlakpuwan apóstol. Akwilikgolh Timoteo xmakankan, uma xlimasiya pi xlaksakkgonit xlakata xtlawalh akgtum lu xlakaskinka xtaskujut Dios (1 Timoteo 1:18; 4:14).

Max Timoteo nipara tsinu xkgalhkgalhima chu kaks lilakawa akxni akxilhli pi xnatalan lu xlipawankgo. Xtakaxnita xlakata nataʼan Pablo. * ¿Tuku max wa xtlat Timoteo, tiku ni kstalanina Cristo xwanit, akxni katsilh pi xkgawasa xʼama latapuli xlakata xmakgantaxtilh taskujut nema xmakglhtinanit? Max xla xlakpuwanit atanu tuku xtlawalh xkgawasa. ¿Chu tuku xʼamakgolh lakpuwankgo xtse chu xnana Timoteo? Max lu xlipaxuwakgo, pero ni xlimasiyaputunkgo pi xpekuankgo xlakata ni xkatsikgo komo tlan xʼama tawila.

Niku tsuku artículo lichuwinaw akxni Timoteo chu Pablo, matsukilh xasasti latamat nema xtlawalh pi lakalhuwa akxtum xʼankgolh. Chuna la xtamakgatlinima Listra, akxni xmakasanan chiwix chu tuwan xkilhchanima pi xʼama niku ni xlakgapasnan chu makgat lata niku xwilakgolh xfamilias. Akxni lhuwata xtlawankgonit, kgotanulh, Pablo, Silas chu Timoteo chankgolh kʼIconio. Kgawasa akxilhli la Pablo chu Silas tsukukgolh wankgo tuku apóstoles chu lakgkgolotsin xalak Jerusalén xlakkaxwilikgonit natatlawa. Na akxilhli la kamatliwakglhnikgolh xtakanajlakan xalak ama kachikin (Hechos 16:4, 5). Pero uma aku xtsukuma.

Akxni xkalakgapaxialhnankgonita congregaciones xalak Galacia, makgxtakgkgolh laklanka calzadas romanas chu akglhuwa cientos kilómetros tlawankgolh anta kxkaxtum Frigia, pulana ankgolh knorte chu alistalh kʼoeste. Xlakata xʼespíritu santo Dios kapulalilh, chankgolh kTroas chu tiyakgolh barco xlakata xʼankgolh kMacedonia (Hechos 16:6-12). Ama kilhtamaku Pablo xʼakxilhnita pi Timoteo lu xmakgtayama. Tamalakgachalh Silas kBerea (Hechos 17:14). Chu asta mastalh talakaskin pi uma kgawasa xakstu xʼalh kTesalónica.  Timoteo tlawalh chuna la xkatsininit chu kamatliwakglhnilh xtakanajlakan tiku anta xwilakgolh (1 Tesalonicenses 3:1-3).

Pablo tsokgli xlakata Timoteo: «Sampi ti ni chatum kkgalhi mpala na chuna lakapastaka lantla xla, chu mpala lu wa xlikana nakalakgkatsanan mimpalakatakan» (Filipenses 2:20). Ni kaj akglakgwa chuna xlilakgapaskan Timoteo, chuna xlilakgapaskan xlakata lu xaskujni xwanit, xtataktuju chu tayanilh talakgaputsit nema titaxtulh. ¡Kawilini akgtum lu tlan liʼakxilhtit lakgkgawasan xala uku! Komo kgawasaku wix kalakapastakti pi nalilakgapaskana xlakata tuku natlawaya la uku. Wi tuku lu xlakaskinka tlan natlawaya: nalilakgapaskana pi tlawaya tuku tlan komo pulana wiliya kmilatamat naskujnaniya Jehová, tlan likatsiya chu kamaxkiya kakni amakgapitsin.

Titaxtulh 14 kata, chu Timoteo akglhuwa kilhtamaku taskujli xʼamigo Pablo. Kgalhikgolh lhuwa tapaxuwan maski na titaxtukgolh lhuwa tuku lipekua (2 Corintios 11:24-27). Akgtum kilhtamaku asta tamaknuka kpulachin xlakata xlichuwinama Dios (Hebreos 13:23). Xtachuna la Pablo, Timoteo lu xkapaxki natalan chu xkalilakgaputsa. Apóstol Pablo tsokgli: «Klakapastaka lantla ntitasa» (2 Timoteo 1:4). Timoteo na xkatatasa tiku xtasakgo, xlakata xmakgkatsi tuku xtitaxtumakgolh, xkamatliwakglha chu tlan xkamamakgkatsini (Romanos 12:15). Putum akinin nachuna kilitlawatkan.

Wa xlakata Timoteo lu tlan xlakskujni Dios litaxtulh. Pablo wanilh kakalakgapaxialhnalh congregaciones chu xkamatliwakglhli, xkalaksakli lakchixkuwin tiku tlan xtlawakgo taskujut xlakata lakgkgolotsin chu siervos ministeriales xlitaxtukgolh (1 Timoteo 5:22).

Pablo lu xpaxki Timoteo; la chatum tlat, wanilh tuku xlitlawat chu stakyawalh. Putum kilhtamaku wanilh pi xtalakaskin xkuentajtlawalh la talalin Dios nachuna pi chuntiya kastakli xtakanajla (1 Timoteo 4:15, 16). Wanilh pi maski kgawasaku xwanit o xlakata kgalhi talakgalhin uma ni xtlawalh pi xlimakgxtakgli natlawa tuku xaʼakgstitum akxni talakaskin (1 Timoteo 1:3; 4:6, 7, 11, 12). Pablo asta wanilh tuku tlan xtlawalh xlakata ni xmakgasni xpakatsan (1 Timoteo 5:23).

Titaxtulh kilhtamaku, Pablo katsilh pi nialh makgas xʼamaka makgnikan, wa xlakata tsokgnilh xaʼawatiya carta Timoteo. Skinilh: «Fuerzaj katlawani nakilakgtana tunkan» (2 Timoteo 4:9). Pablo lu xpaxki Timoteo asta limapakuwilh: «Xatapaxkin nkinkam xpalakata nkimPuchinakan» (1 Corintios 4:17). Wa xlakata xlakaskin pi anta xtawi xaʼawatiya kilhtamaku kxlatamat. Chu akinin, ¿tlan kamamakgkatsiniyaw amakgapitsin? ¿Kinkaputsakgoyan tiku titaxtumakgolh tuku nitlan?

¿Chalh Timoteo akxni Pablo nina xmakgnikan? Ni katsiyaw. Pero tlan nawanaw pi tlawalh putum tuku xtalakaskin xlakata tlan mamakgkatsinilh Pablo chu atanu kstalaninanin Cristo. Tlan nawanaw pi Timoteo lilh xlatamat chuna la kilhchani xtukuwani, «maxki kakni Dios». Wa xlakata lakgkgawasan chu tiku laklankata kinkamakgxtakgnin akgtum lu tlan liʼakxilhtit xla lu tlan takanajla.