Xlikana: Dios akxilha tapatin nema anan kakilhtamaku chu wi tuku natlawa (Salmo 72:13, 14). Anta kBiblia, Dios wan pi nakamakgtaya tiku “patinamakgolh”. ¿Tuku kilhtamaku chuna natlawa? «Akxni naminacha nkakgapun nkimPuchinakan Jesús, nataminkgoy xʼángeles wa nti nkgalhikgoy xlitliwakga [...], lakimpi nalitamakgapuspitnikgoy wa nti ni lakgapaskgolh Dios, chu na ni kgalhakgaxmatkgoy xatlan xtamakatsinin nkimPuchinakan Jesucristo.» (2 Tesalonicenses 1:7, 8.) Uma tuku talichuwinan xlakata Jesús aku nakgantaxtu, «ntlanka [x]kilhtamaku xliminat Dios nti mpaks kgalhiy xlitliwakga», nema na lilakgapaskan Armagedón (Apocalipsis [Revelación] 16:14, 16).

Akxni nachan uma kilhtamaku, Dios ni nakamalakgacha latamanin, wata xKgawasa Jesucristo chu ángeles xlakata nakatatlawakgo guerra tiku nitlan likatsikgo. Wa Jesús tiku nakamasputu tiku akgchipanankgo (Isaías 11:4; Apocalipsis 19:11-16).

Uma wamputun pi Dios ni lakgpalinit la akxilha guerra. Chuntiya akxilha la tuku limaklakaskin xlakata namasputu tuku nitlan chu tiku akgchipakgo amakgapitsin. Chuna la makgasa, kajwatiya Dios tlan wan tuku kilhtamaku natsuku uma guerra chu tiku namakgtayanan. Akxilhnitawa pi Dios  lakkaxwilinita pi nialh makgas namasputu tuku nitlan chu nakamakgtaya tiku katlawanikan tuku nitlan chu Jesucristo napulalin uma guerra. Uma wamputun pi Dios nitlan akxilha guerras xala uku, maski tasiya pi talakaskin chuna natlawakan.

Kawiliw akgtum liʼakxilhtit: kalilakpuwanti chatiy natalan tiku tsukukgo lachipakgo akxni xtlatkan nitu wi kchiki. Lamakgxtakga tsinu chu tachuwinankgo kteléfono. Chatum wani pi xtala matsukilh talachipat chu atanu wan pi xtala nitlan likatsinilh. Xchatiykan lakaskinkgo pi xtlatkan kakanajlanilh. Pero alistalh, akxni xatlat kakgaxmatnikgonita, kawani pi nialh kalachipakgolh chu kakgalhkgalhikgolh asta akxni xtaspitli. Natalan kaj tsinu kgalhakgaxmatkgo, pero tsukuparakgo lachipaparakgo. Akxni chin xatlat, xchatiykan kasitsini chu kamalakgaxokge xlakata ni kgalhakgaxmatnankgolh.

Uku, kachikinin tiku lachipakgo skinikgo xtamakgtay Dios. Pero xla ni makgtanu kʼuma guerras. Asta Biblia wan: «Ti mpala tu xkatlawanin ntu ni tlan, ni chuna ntitamakgapuspitniyatit» chu nawampara: «Ni titamakgapuspitnikgoyatit» (Romanos 12:17, 19). Asta kamakatsininita latamanin pi xlikgalhkgalhitkan asta akxni xla wi tuku natlawa, chu uma chuna nala kʼArmagedón (Salmo 37:7). Xla ni lakgati akxni kachikinin la chipakgo chu liʼakxilha xtachuna la lakatayamakgolh. Wa xlakata kʼArmagedón lu nasitsi chu namasputukgo guerras xlikalanka katiyatni (Salmo 46:9; Isaías 34:2). Xlikana, Armagedón wa guerra nema namasputu putum guerras.

Akxni namasputukan putum guerras akgtum tasikulunalin nawan nema nalimin xTamapakgsin Dios. Jesús lichuwinalh uma tamapakgsin kʼoración nema lu lakgapaskan: «Kamilh minTamapakgsin. Katatlawalh mintalakaskin, chuna la kʼakgapun, nachuna kkatiyatni» (Mateo 6:10, TNM). Ni kajwatiya namasputu guerras, wata namasputu tuku tlawa pi kaʼanalh guerra (Salmo 37:9, 10, 14, 15). * Wa xlakata kstalaninanin Cristo lakaskinawa tasikulunalin nema nalimin xTamapakgsin Dios (2 Pedro 3:13).

¿Lhuwa kilhtamaku tsankga xlakata xTamapakgsin Dios namasputu tapatin, tiku akgchipakgo amakgapitsin chu tuku nitlan? Tuku kgantaxtuma nema talichuwinan kBiblia limasiya pi lamaw «xaʼawatiya kilhtamaku» (2 Timoteo 3:1-5). * Nialh makgas xTamapakgsin Dios natawila unu Katiyatni akxni Armagedón natitaxtu.

Akxilhwi pi tiku nanikgo uma kxaʼawatiya guerra nawankgo latamanin tiku ni kgalhakgaxmatkgo «xatlan xtamakatsinin nkimPuchinakan Jesucristo» (2 Tesalonicenses 1:8). Pero kalakapastakwi pi Dios ni lakgati wi tiku nani, nipara tiku nitlan likatsikgo (Ezequiel 33:11). Xla ni lakaskin «pi nipara chatum kalakgsputli» kʼuma xaʼawatiya guerra wata lakaskin pi «natalichuwinan kputum katiyatni xlakata natamakatsininan kputum laklanka kachikinin» akxni nina min lisputni (2 Pedro 3:8, 9; Mateo 24:14; 1 Timoteo 2:3, 4, TNM). Xlakata xtatayananin Jehová lichuwinamakgolh Dios kxlikalanka katiyatni, latamanin tlan lakgapaskgo Dios, xlakata nakgalhakgaxmatkgo xalakwan xalaksasti xla nkimPuchinakan Jesucristo chu tlan nalatamakgo niku nialh naʼanan guerra.