PANAYIOTA, chatum puskat tiku stakli kʼakgtum isla kpupunu Mediterráneo, akxni kajku xakstakma tsukulh klakgati política. Titaxtulh kata tsukulh skuja la secretaria kʼakgtum partido político xalak kachikin niku xlama. Xʼan akgatunu chiki xlakata xpuki tumin xla uma partido. Pero, titaxtulh kilhtamaku lilipuwa, maski tiku xmakgtapakgsikgo kʼuma partido xlawanikgo pi lu tlan xlatalalinkgo chu xlimasiyakgo tlan xtalalinkgo, pero lhuwa xlaksakpaxkinankgo, lhuwa tuku xkgalhiputunkgo, ni akxtum xlakpuwanankgo chu xlalakgkatsanani.

Daniel minacha kfamilia niku lu kanajlanikgo Dios xalak Irlanda. Pero lu nitlan, xlakata lu lakapastaka tuku xtlawakgo sacerdotes xlakata xkgachikgo, xkgalhankgo tumin nema xmastakan, xkgamanankgo, pero xwanikgo pi komo xla xtlawalh tuku nitlan xʼama an kpupatin.

Jeffery lhuwa kata skujli xlakata xmalaknu chu ksta barcos nema xtlawakgo empresas xalak Reino Unido chu Estados Unidos. Lakapastaka pi makglhuwa tiku xmakgtamawakgo chu atanu tiku na kstanankgo xʼakgskgawinankgo akxni xkatalakkaxlakgo mapakgsinanin. Xlakata lakgaputiy xlikatsikgo, xʼakgskgawinankgo kaj xlakata xkafirmarlinika contrato.

Lu nitlan pero lhuwa chuna tlawakan. Kaniwa niku anan tiku lakgaputiy likatsikgo, kpolítica, ktakanajla chu knegocios. Uma tachuwin tiku lakgaputiy likatsikgo minancha kʼakgtum tachuwin xagriego nema kilhchanima tiku xmatitaxtikgo akgtum obra de teatro nema xmaklakaskinkgo máscara. Titaxtulh kilhtamaku tsukulh kilhchani putum tiku wi tuku tlawakgo xlakata naʼakgskgawikgo amakgapitsin o xlakata nakgalhikgo tuku lakaskinkgo.

Tiku kaʼakgskgawikan lu sitsikgo, nitlan makgkatsikgo chu lipuwankgo. Max xlakata ni katsikgo tuku natlawakgo wankgo: «¡Lu lhuwa lakgaputiy likatsikgo! ¿Namin kilhtamaku nasputa?». Anta xTachuwin Dios kinkawaniyan pi nasputa.

Biblia wan pi xapulana tiku lakgaputiy likatsilh wa chatum tiku xwi kʼakgapun. Akxni aku xtsukumakgolh latamanin, Satanás limaklakaskilh tantum luwa xlakata ni nakatsikan tiku xla chu akgskgawilh Eva, litaxtulh la tiku xmakgtayaputun (Génesis 3:1-5). Lata ama kilhtamaku lhuwa tiku limasiyakgonit tuku ni xlikana xlakata nakaʼakgskgawikgo  amakgapitsin chu nakgalhikgo tuku lakaskinkgo.

Makgasa, akxni kachikin Israel makgtanulh knixaxlikana takanajla, Dios makglhuwa kawanilh pi xlakata lakgaputiy xlikatsikgo nitlan xʼama kakitaxtuni. Limaklakaskilh palakachuwina Isaías xlakata nakawani: «Uma kachikin wan pi kimpaxki, pero ni kinkgalhakgaxmatni, kinkakninani pero ni xaʼakgstitum xnaku» (Isaías 29:13, Traducción en lenguaje actual). Israel ni kgalhakgaxmatnalh chu ni makgxtakgli tuku nitlan xtlawama, wa xlakata Dios mastalh talakaskin pi atanu kachikinin xʼakgchipakgolh niku xkakninanikgo: Jerusalén chu xtemplo. Xapulana wa babilonios, kkata 607 akxni nina xmin Jesús, chu alistalh kkata 70 akxni xminita Jesús. Uma limasiya pi Dios nitlan akxilha tiku lakgaputiy likatsikgo.

Pero Dios chu Jesús lu xlakaskinka akxilhkgo tiku xaʼakgstitum likatsikgo chu ni akgskgawinankgo. Akxni Jesús tsukulh lichuwinan Dios, akxilhli pi xlakgmima Natanael, xla wanilh: «Umin wa nti [...] litapakgsiniy Israel, wa nti ni ananiy ntakgskgawin» (Juan 1:47). Natanael, tiku na xlilakgapaskan Bartolomé, litaxtulh chatum xlikgalhkutiy xʼapóstoles Jesús (Lucas 6:13-16).

Jesús lhuwa kilhtamaku limaxtulh xlakata nakamasiyani kstalaninanin la lakpuwan Dios. Xlakan nila lakgaputiy xlalikatsinikgolh. Wata Jesús nitlan akxilhli xlakata tiku xpulalinkgo takanajla lakgaputiy xlikatsikgo chu amakgapitsin kuenta xlitlawatkan. ¿Tuku xtlawakgo umakgolh lakchixkuwin?

Xlimasiyakgo pi tlan xlikatsikgo xlakata xkaʼakxilhka. Jesús wa: «Kuintaj katlawatit mpi ni wa ntilitlawayatit mintalakgalhamankan mpala kaj tlan nalitasiyuyatit kxlakatin nchixkuwin [...] lantla ntlawakgoy lakaputiyunanin». Na kawanilh pi akxni wi tuku xtlawakgolh «xatsekg» xtlawakgolh, uma wamputun pi niti xkatsilh chu niti xkaʼakxilhli akxni xtlawakgolh oración. Chuna xlimasiyakgolh pi xtakakninkan xaxlikana xwanit chu Dios xkalakgalhamalh (Mateo 6:1-6).

Xlakgatikgo nitlan kalichuwinankgo amakgapitsin. Wa xlakata Jesús kwanilh tiku chuna xlikatsikgo: «Akgsanina, wata xapulh kamaxtu lhtakala [o viga] ntu lakpitanuman, lakimpi chuna ntlan nalakawanana, chuna chi nchu ntlan namaxtuniya mpalhma mintala ntu lakpitanuma» (Mateo 7:5). Tiku lichuwinan tuku nitlan tlawamakgolh amakgapitsin maski xla tlakg nitlan tuku tlawama, limasiyama tuku ni xlikana. Xlikana, “mpi paks lakgalhinankgo, na lu makgat wilanikgo Dios” (Romanos 3:23).

Nitlan tuku xtlawaputunkgo. Makgtum kilhtamaku makgapitsi kstalaninanin fariseos chu tiku xtatayakgo Herodes talakatsuwinikgolh chu kgalhskinkgolh xlakata impuestos. Pulana tlan lichuwinankgolh: «Makgalhtawakgana, kkatsiyaw pi wana tuku xaxlikana chu xlikana masiyaya xtiji Dios». Alistalh nitlan tuku xlakpuwamakgolh akxni kgalhskinkgolh komo xlilat naxokgokgo impuesto nema kskin César. Jesús kakgalhtilh: «Lakgaputiyunanin, ¿tuku xlakata kilamawaniputunaw tuku nitlan?». Lu tlan pi chuna kamapakuwilh, xlakata ni xkatsiputunkgo tuku xlakpuwan, wata xputsamakgolh «la namawanikgo tuku nitlan» (Mateo 22:15-22, TNM).

Akxni lakatsukulh congregación kPentecostés kkata 33, lakatanks xlamakgolh chu ni xlaʼakgskgawi. Kstalaninanin liskujkgolh xlakata ni lakgaputiy xlikatsikgolh. Apóstol Pedro kawanilh pi «[na]lakgachixkuwiyatit ntalulokgtat, xtachuna linatalan nkalapaxkitit nchatunu amakgapitsin, ni mpala anan ntalakgaputiyatna» (1 Pedro 1:22). Apóstol Pablo tlawalh pi xlamasiyanikgolh «tapaxkit [nema] nataxtuyacha kʼakgtum ni xaxkajwani naku chu ni xaxkajwani talakapastakni chu ni xalakgaputiy takanajla» (1 Timoteo 1:5, TNM).

Tuku masiyalh Jesús chu xʼapóstoles, nema tatsokgtawilakgonit kBiblia chuntiya lu kinkamasiyanikgoyan chuna la kxapulana siglo. Xlakata uma, Pablo tsokgli: «Xtachuwin Dios xastakna chu masta litliwakga chu tlakg stakaka nixawa kgantum espada  lakgaputiyu xlistakaka chu lu pulhman laktanu chatum chixku, chu masiya tuku wi kxpulakni chu kxmakni chu tlan mapitsi tuku tanunima takilhastukut, chu lakputsanani talakapastakni chu xtatlawaputu naku» (Hebreos 4:12, TNM). Akxni katsinikgo tuku wan Biblia chu liskujkgo xlakata nalilatamakgo tuku masiya, tlawanit pi lhuwa nialh lakgaputiy nalikatsikgo chu xaʼakgstitum latamakgo chu nialh akgskgawinankgo. Kaʼakxilhwi tuku lalh xlakata umakgolh kgalhtutu tiku pulana kalichuwinaw.

Xlatamat Panayiota lu talakgpalilh akxni xapulana kilalh kʼakgtum tamakxtumit xla xtatayananin Jehová. Kaks lilakawa xlakata niti kaj xlimasiya pi tlan xlikatsi xlakata amakgapitsin xʼakxilhkgo. Xla lakapastaka: «Kakxilhli pi xlikana xlapaxkikgo chu lu xlamakgtayaputunkgo, tuku ni xakakxilhnit akglhuwa kata nema xakmakgtanunit kpolítica».

Tsukulh likgalhtawakga Biblia, lakgpalilh xlatamat chu tamunulh la xtatayana Jehová. Titaxtunita puxamakaw kata. Xla wan: «Tuku tlawalh pi kilatamat tlakg tlan xwa, ni wa xakalh akgatunu chiki xlakata xaklichuwinalh akgtum partido político, wata naklichuwinan xTamapakgsin Dios, tiku tlan nalimin tuku xaʼakgstitum kkakilhtamaku».

Daniel na xtatayana Jehová litaxtulh chu lakgayawaka makgapitsi taskujut kcongregación. Pero akxni titaxtulh makgapitsi kata, tlawalh akgtum talakgalhin chu nitlan tsukulh limakgkatsi xtalakapastakni. Xla wan: «Stalanka xlakapastaka la lakgaputiy xlikatsikgo xalak pusikulan. Klakpuwa pi tlakg tlan xwa xakmakgxtakgli taskujut nema xkilakgayawakanit. Ni lakgaputiy xakkalikatsiniputun kinatalan».

Alistalh, Daniel lakpuwa pi xchanita kilhtamaku xlakgatayapa taskujut xlakata tlantiya xwi xtalakapastakni, chu lipaxuwalh akxni tsukupa tlawa makgapitsi taskujut kcongregación. Chuna likatsikgo tiku akgstitum skujnaniputunkgo Dios. Katsinikgo makgenukgo «lhtakala» o viga nema wi kxlakgastapu chu alistalh «mpalhma» nema wi kxlakgastapu xtala.

Jeffery, putum xlatamat kaj xtlawa negocios, xla wa: «Akxni tlakg xakkatsini xlakata Biblia, tlakg xakkatsi pi ni xlilat xakkaʼakgskgawilh latamanin kaj xlakata wi tuku xkimakgtamawakgolh. La uku kintalakapastakni xmaskuju textos xalak Biblia la Proverbios 11:1 niku wan pi “Jehová xkajni” tiku akgskgawinan». Jeffery ni likatsilh la ama lakchixkuwin tiku kgalhskinkgolh Jesús xlakata impuestos, wata katsinilh ni nakaʼakgskgawi latamanin, maski watiya o ni watiya takanajla xkgalhikgo la xla.

Lhuwa millones xtatayananin Jehová xlikalanka katiyatni liskujkgo xlakata nalilatamakgo tuku katsinikgonit kBiblia. Lhuwa liskujkgo natlawakgo uma tastakyaw: «Kalilakgpalinantit xasasti tayat nema tlawaka chuna la xtalakaskin Dios, kxaʼakgstitum chu ni makgxtakgnan» (Efesios 4:24, TNM). Kkamakgpuwantiniyan kakatsi tiku xtatayananin Jehová, tuku kanajlakgo chu la tlan namakgtayakgoyan nakatsiniya xlakata xasasti kakilhtamaku nema Dios wan pi nalimin. Niku ni naʼanan tiku lakgaputiy likatsikgo chu naʼanan tuku xaʼakgstitum (2 Pedro 3:13).