Dios katachuwinanit latamanin. Limaklakaskinit xʼespíritu santo, xlitliwakga, xlakata nawili xtalakapastakni kxtapuwankan tiku tsokgkgolh Biblia (2 Pedro 1:20, 21). Wa xlakata tlan lakgapasaw Dios akxni likgalhtawakgayaw xTachuwin. (Kalikgalhtawakga Juan 17:17 chu 2 Timoteo 3:16.)

Anta kBiblia Dios lhuwa tuku kinkamakatsininitan xlakata xla. Kinkawaniyan tuku xlakata katlawalh latamanin, tuku natlawa xpalakatakan chu la lakaskin nalinaw kilatamatkan (Hechos 17:24-27). Jehová lakaskin pi kakatsiw tuku xaxlikana xlakata xla. (Kalikgalhtawakga 1 Timoteo 2:3, 4.)

Jehová wa Dios xla xaxlikana chu makamilh xKgawasa, Jesucristo xlakata nakinkamasiyaniyan. Wa xlakata tiku putsakgo xaxlikana makgamakglhtinankgo xtamasiy Jesús (Juan 18:37). Wa uma latamanin tiku Dios lakaskin kakakninanikgolh. (Kalikgalhtawakga Juan 4:23, 24.)

Satanás tlawanit pi lhuwa latamanin ni kalakgapaskgolh Dios akxni malakgatumi taʼakgsanin xlakata Dios (2 Corintios 4:3, 4). Tiku ni katsiputunkgo tuku xaxlikana kaj litamakgxtakgkgo ni xaxlikana tamasiy (Romanos 1:25). La uku, millones latamanin tekgskgo tuku xaxlikana xlakata Dios akxni likgalhtawakgakgo tuku wan Biblia (Kalikgalhtawakga Hechos 17:11.)