¡SKGALALH KATAWILA!
2022: Kata niku ananit lhuwa taʼakglhuwit. ¿Tuku lichuwinan Biblia?
Kata 2022, guerras, ta’akglhuwit xlakata ni anan tumin chu tuku masputunan. Wa uma tuku tlakg talichuwinanit knoticias. Kaj watiya Biblia tlan nakinkawaniyan tuku kilhchanima.
Tuku kilhchanima taʼakglhuwit xla kata 2022
Putum tuku titaxtunitaw kʼuma kata, liwana limasiya pi lamaw kkilhtamaku nema Biblia limapakuwi «kxaʼawatiya kilhtamaku» (2 Timoteo 3:1). Uma kilhtamaku tsukulh kkata 1914. Kaʼakxilhti pi tuku lama masiya pi kgantaxtuma tuku Biblia lichuwinanit pi xʼama la kkinkilhtamakujkan:
«Guerras» (Mateo 24:6).
2022: Kʼuma kata Europa akxilhpa tuku nitlan tlawaninan guerra. a
Kaʼakxilhti artículo «Rusia akgchipama Ucrania».
«Naʼanan tatsinksni» (Mateo 24:7).
2022: Kʼuma kata analh lhuwa tatsinkgsni. b
Kaʼakxilhti artículo «Guerra xalak Ucrania maliwaka tatsinksni kxlikalanka katiyatni».
«Laklixkajni tajata» (Lucas 21:11).
Tsukupa tajatat Poliomielitis, viruela del mono chu COVID-19 kamakgatatatlama latamanin. Uma limasiya pi lu nitlan tlawaninan akgtum tajatat nema ni tuwa pasanan chu kalipekua wili xlatamatkan latamanin. c
Kaʼakxilhti artículo «Nikgolh akgchaxan millón latamanin xlakata COVID».
«Natasiya tuku makgapekuanan» (Lucas 21:11).
Tliwakga lhkaknan, ni senan, lhkunanan o masputunan chuchut. Kata 2022 nachuna lu nalakapastakkan xlakata lu lipekua tuku lalh, nikgolh lhuwa mil latamanin chu lhuwa latamanin makgatsankgakgolh xchikkan. d
Kaʼakxilhti artículo «Lhkakna lu taliwakanit kxlikalanka katiyatni».
«Taʼakglhuwit» (Lucas 21:9).
Latamanin lu ksitsimakgo xlakata ni anan tumin chu xlakata lu tapalaxlanit tuku maklakaskinkgo uma tlawalh pi xtsukukgolh lakatakikgo mapakgsinanin kkata 2022. e
Kaʼakxilhti artículo «Putum tapalaxlama kxlikalanka katiyatni».
¿Tuku nala kata nema aku mima?
Niti katsi tuku liwana nala kkata 2023. Pero tuku liwana katsiyaw wa pi nialh makgas xTamapakgsin Dios, Tamapakgsin xalak akgapun nalakgpali tuku anan kkatiyatni (Daniel 2:44). Uma Tamapakgsin namasputu xtapatinkan latamanin chu natlawa pi nakgantaxtu tuku Dios lakaskin xpalakata katiyatni (Mateo 6:9, 10).
Kamakgpuwantiniyan kastalani xtastakyaw Jesucristo chu ankgalhin «skgalalh katawila» chuna la kgantaxtuma kkilhtamaku tuku lichuwinanit Biblia (Marcos 13:37). Tlan nakilatachuwinanaw xlakata tlakg nakatsiniya tuku masiya Biblia chu la tlan namakgtayayan wix chu mi familia nakgalhiyatit xatlan takgalhkgalhin kilhtamaku nema aku mima.
a Noticias AP, «2022 Wa kata niku Europa akxilhpa tuku nitlan tlawa guerra», chuna wan Jill Lawless, 8 xla diciembre kata 2022.
b Programa de Alimentación Mundial, «sputma liwat xlikalanka katiyatni».
c JAMA nema lichuwinan xlakata tajatat, «latamakan kilhtamaku niku anan pandemias: COVID-19, viruela del mono, poliomielitis chu atanu tajatat», chuna wan Lawrence O. Gostin, JD, 22 xla septiembre kata 2022.
d Earth.Org, «¿Tuku kilhchanima xlakata la xʼama taliwaka lhkakna kkata 2022?», chuna wan Martina Igini, 24 xla octubre kata 2022.
e Fundación Carnegie para la Paz International, «Tasitsi xlakata ni anan tumin tlawalh pi nalakatakikan mapakgsinanin kkata 2022», chuna wan Thomas Carothers chu Benjamin Feldman, 8 xla diciembre kata 2022.