¡SKGALALH KATAWILA!
Guerra chu la talakgpalima kilhtamaku tlawa pi tlakg na’anan tatsinksni kxlilakgatum katiyatni | ¿Tuku kinkawaniyan Biblia?
Guerra xla Ucrania chu la talakgpalima kilhtamaku chuntiya tlawama pi kxlilakgatum katiyatni nialh na’anan liwat. Chuna titaxtumakgo niku makgalakan lhuwa liwat, anta niku latamanin palha skujkgo xlakata tlan nakgalhikgo liwat nema maklakaskinkgo.
«Xlakata taʼakglhuwit, la talakgpalima kilhtamaku, la tapalaxlama luz chu atanu tlawama pi nialh lu na’anan liwat» (António Guterres, secretario general de las Naciones Unidas, 17 xla julio kata 2023).
«Lakgskgalalan lakchixkuwin wankgo pi xlakata Rusia nialh nakamalakgachani liwat amakgapitsin kachikin natlawa pi tlakg natapalaxlanan kʼatanu kkachikinin niku ni lu anan tumin la komo knorte xla África chu kʼOriente Medio» (Atalayar.com, 23 xla julio kata 2023).
Ka’akxilhti tuku wan Biblia xlakata sputma liwat chu tuku nala kilhtamaku nema aku mima.
Biblia xlichuwinanit pi ni xʼama anan liwat
Jesús lichuwinalh: «Nalatalatlawa laklanka kachikinin chu nalatalatlawa tamapakgsin, chu naʼanan tatsinksni» (Mateo 24:7).
Libro xla Apocalipsis, lichuwinan tantati kawayu nema kgosnamakgo. Tantum kawayu kilhchanima guerra chu tiku stalani kilhchanima tatsinksni. Biblia lichuwinanit pi xʼama min kilhtamaku nialh xʼama akchan liwat chu lu laktapalaxla x’ama wan. «Kakxilhli tantum xatsitsakga kawayu. Tiku xkgewi xlin kxmakan akgtum pupulhkan. Chu […] kkgaxmatli akgtum tachuwin nema xwan: “Kajwatiya akgtum kilo xla trigo xtapalh nawan xtatlaja akgtum kilhtamaku, chu akgtutu kilo xla cebada xtapalh nawan xtatlaja akgtum kilhtamaku”» (Apocalipsis 6:5, 6).
Tuku xlichuwinanit Biblia pi nala kgantaxtuma la uku, anta wan pi uma kilhtamaku wanikan «xaʼawatiya kilhtamaku» (2 Timoteo 3:1). Komo tlakg katsiputuna xlakata «xaʼawatiya kilhtamaku» chu la kgosnamakgo tantati kawayu, kaʼakxilhti video Lata kkata 1914 kakilhtamaku talakgpalilh chu kalikgalhtawakga artículo «¿Qué representan los jinetes del Apocalipsis?».
¿La kinkamakgtayayan Biblia?
Biblia kinkamaxkiyan tastakyaw nema kinkamakgtayayan xlakata tlan natayaniyaw taʼakglhuwit, la komo ni anan liwat chu lu tapalaxlanama. Tlan natekgsa makgapitsi tastakyaw kʼuma artículo «Cómo vivir con menos».
Biblia na kinkamaxkiyan takgalhkgalhin pi putum natalakgpali. Biblia malaknu pi namin kilhtamaku «lhuwa namakgalanankan kkatiyatn» chu nialhti katikgalhilh tatsinksni (Salmo 72:16). Komo tlakg katsiputuna xlakata uma takgalhkgalhin chu tuku xlakata tlan nalipawana, kalikgalhtawakga artículo «La esperanza real de un mañana mejor».