Sean Gladwell/Moment via Getty Images
¡SKGALALH KATAWILA!
Laktlawakan liwaka 2 billones xla dólares xpalakata soldados xlikalanka katiyatni | ¿Tuku kinkawaniyan Biblia?
Kkata 2022, kichalh 2.24 billones xla dólares tumin nema laktlawaka xlakata tuku maklakaskinkgolh soldados. Uma chuna taliwakalh xlakata guerra nema lakgalhikgo Rusia chu Ucrania. Abril kata 2023 SIPRI, Stockholm International Peace Research Institute (Instituto Internacional de Estudios para la Paz de Estocolmo), lichuwinalh uma xlakata tuku lalh kkata 2022:
Tumin nema talaktlawalh xpalakata soldados anta k’Europa taliwakalh 13% uma kata, tlakg lhuwa ni xawa tuku laktlawaka kGuerra Fría.
«Lakpuwankan tuku laktlawakgolh xpalakata soldados xalak Rusia taliwakalh 9.2%». Rusia nema xwi xlipulakkitsis xlakata la xlilhuwa tumin laktlawa xpalakata soldados la uku wi xlipulaktutu.
Estados Unidos chuntiya wa país nema tlakg laktlawa tumin xpalakata xsoldados: «laktlawa 39% xla putum tumin nema maklakaskinkan xlikalanka katiyatni xpalakata soldados».
Doctor Nan Tian, tiku na makatsininalh tuku wa SIPRI lichuwinampara: «Chuna la xlilhuwa taliwaka la laktlawakan tumin xpalakata soldados uma xa’awatiya kata limasiya pi kalipekua lamaw».
Biblia lichuwinan pi x’ama taliwaka la x’amakgo lachipakgo kachikinin la uku. Na kinkawaniyan la nakgalhiyaw xaxlikana takaksni.
Lichuwinankanit la nataliwaka guerras
Biblia lichuwinan pi kilhtamaku nema lamaw wa xa’awatiya kilhtamaku (Daniel 8:19).
Libro xla Daniel lichuwinalh pi uma kilhtamaku x’ama anan laklanka kachikinin nema x’amakgo latalatlawakgo xlakata xkatsika tiku tlakg tliwakga. Chu k’umakgolh tatalachipat x’amakgo laktlawakgo lhuwa tumin (Daniel 11:40, 42, 43).
Komo tlakg katsiputuna xlakata uma tuku lichuwinanit Biblia ka’akxilhti video Kgantaxtuma tuku lichuwinan Biblia kDaniel 11.
¿Na’anan takaksni?
Biblia wan pi Dios nakamasputu xTamapakgsin latamanin. Dios «nawili akgtum tamapakgsin nema nikxni katimalakgsputuka chu ni katimatitaxtinika atanu kachikin. Uma tamapakgsin nakalakxpula chu nakamasputu putum umakgolh tamapakgsin chu kajwatiya uma tamapakgsin natawila putum kilhtamaku» (Daniel 2:44).
Jehová a nialh makgas natlawa pi ka’analh takaksni putum kilhtamaku, uma wa tuku latamanin nila tlawakgonit. ¿La natlawa? Xtamapakgsin Dios, nema wi k’akgapun namasputu tatalachipat chu tuku limakgninankan (Salmo 46:8, 9).
Komo tlakg katsiputuna xlakata la xTamapakgsin Dios namakgantaxti uma kalikgalhtawakga artículo «El Reino de Dios traerá “paz en abundancia”».
a Jehová wa xtukuwani Dios (Salmo 83:18).