¡SKGALALH KATAWILA!
Lhkakna lu taliwakanit kxlikalanka katiyatni: ¿Tuku kinkawaniyan Biblia?
Julio kata 2022, kxlikalanka katiyatni tlakg taliwakalh lhkakna chuna la nikxni xtamakglhkatsinit:
«Kʼuma papaʼ, xlimakgtiy lata mapakgsinanin xalak China kamakatsinikgolh latamanin pi kuenta xtlawakgolh xlakata k70 kachikinin lu xʼama taliwaka lhkakna» (25 xla julio kata 2022, servicio de noticias de la CNN).
«Xlakata taliwakanit lhkakna kʼEuropa, lhuwa kakiwin lhkukgonit» (17 xla julio kata 2022, The Guardian).
«Domingo nema titaxtunita, kʼEstados Unidos tamakglhkatsilh lhkakna chuna la nikxni xtamakglhkatsinit, xlakata akgtum chichi un talakgatumilh kcosta este, ksur chu kxitat uma país» (24 xla julio kata 2022, The New York Times).
¿Kilhchanima uma pi namin kilhtamaku nialhla katilatamaw kkatiyatni? ¿Tuku wan Biblia xlakata uma?
¿Xlichuwinanita Biblia pi xʼama taliwaka lhkakna?
Chuna. Lhkakna nema taliwakanit kxlikalanka katiyatni limasiya pi kgantaxtuma tuku xlichuwinanit Biblia pi xʼama la kkinkilhtamakujkan. Akgtum liʼakxilhtit, Jesús lichuwinalh pi xʼama tasiya «tuku makgapekuanan» chu «natasiya tuku ni anan xtachuna» (Lucas 21:11). Lhuwa latamanin pekuankgo xlakata taliwakanit lhkakna kxlikalanka katiyatni, chu lakpuwankgo pi katiyatni namalakgsputukan.
¿Namin kilhtamaku nialhla katilatamaka kkatiyatni?
Ni. Dios tlawalh katiyatni xlakata latamanin putum kilhtamaku xlatamakgolh anta (Salmo 115:16; Eclesiastés 1:4). Xla ni katimastalh talakaskin pi latamanin namasputukgo katiyatni, wata malaknunit pi nakamalakgsputu «tiku malakgsputumakgolh katiyatni» (Apocalipsis 11:18).
Kaʼakxilhwi pulaktiy tamalaknun nema tlawanit Dios xpalakata katiyatni:
«Desierto chu xakaskakni tiyat lu napaxuwakgo, chu niku xakaxtum nema kaskawaw napaxuwa chu naxana la akgatum xanat» (Isaías 35:1). Dios ni katimastalh talakaskin pi putum katiyatni akgtum desierto nawan niku nialhla nalatamakan, wata nalakkaxtlawa putum tuku nitlan tlawanikanit.
«Wix kuentajtlawaya katiyatni chu tlawaya pi lu namakgalanan chu lu namasta xtawakat» (Salmo 65:9). Dios natlawa pi katiyatni akgtum stlan paraíso nawan.
Xlakata tlakg nakatsiya la kgantaxtuma tuku xwanit Biblia xlakata la xʼama taliwaka lhkakna, kalikgalhtawakga artículo «¿Qué dice la Biblia sobre el cambio climático y nuestro futuro?».
Komo tlakg katsiputuna tuku wan Biblia xlakata la nalakkaxtlawakan katiyatni, kalikgalhtawakga artículo «¿Quién salvará el planeta?».