¡SKGALALH KATAWILA!
Tapekua xlakata latalamaka: ¿Tuku kinkawaniyan Biblia?
Papaʼ julio kata 2022 lhuwa latamanin katalakanit chu kamakgnikanit kxlikalanka katiyatni:
«Latamanin xalak Japón chu xlikalanka katiyatni lu pekuamakgo xlakata makgnika político tiku tlakg xlakgapaskan kJapón [tiku primer ministro xlitaxtunit, Shinzo Abe], liwaka xlakata kʼuma país ni lu anan tatalatlawat chu anakgo limapakgsin nema wankgo pi ni xlitamaklakaskinat tuku limakgninankan» (10 xla julio kata 2022, The Japan Times).
«Chatum chixku tiku kamakgnilh kgalhtutu latamanin kʼakgtum centro comercial xalak Copenhague tlawa pi latamanin xalak Dinamarca napekuankgo» (4 xla julio kata 2022, Reuters).
«Anta kSudáfrica makgapitsi lakchixkuwin tsukukgolh mapakgekgo litalatni niku stakan kuchu kSoweto chu kamakgnikgo 15 latamanin» (10 xla julio kata 2022, The Guardian).
«Anta kʼEstados Unidos, liwaka 220 latamanin nikgolh xlakata katalaka 4 xla julio akxni xpaskuajnamakgo» (5 xla julio kata 2022, CBS News).
¿Wi tuku tlan nalikanajlayaw pi nasputa putum uma tuku nitlan? ¿Tuku kinkawaniyan Biblia?
Nasputa talamakgnin
Biblia masiya pi lamaw «kxaʼawatiya kilhtamaku», kilhtamaku akxni latamanin lu lixkajni likatsikgo, lakluku chu makgapekuanankgo (2 Timoteo 3:1, 3). Akxni tlawakgo umakgolh tuku lu nitlan, tlawakgo pi latamanin lu napekuankgo (Lucas 21:11). Pero Biblia malaknu pi namin kilhtamaku akxni nialh katiʼanalh tatalatlawat, chu latamanin nalatamakgo “niku naʼanan takaksni chu niku nitu katilipekuankgolh chu najaxkgo niku nitu katikamaʼakglhuwilh” (Isaías 32:18). Pero, ¿la namasputukan talamakgnin?
Dios nakamasputu putum tiku nitlan likatsikgo chu putum tuku limakgninankan
«Tiku nitlan likatsikgo, nakamasputukan kkatiyatni» (Proverbios 2:22).
«[Dios] masputu guerra kxlikalanka katiyatni. Laktukxa arco chu laktsu laktsu tlawa lanza, kalhkuyu carro xla guerra» (Salmo 46:9).
Dios nakamasiyani latamanin la nakgalhikgo takaksni, chu chuna namasputu talamakgnin.
«Ni katitlawakgolh tuku nitlan chu ni katimasputunankgolh kputum xasanto kisipi, xlakata katiyatni nalitatsama xtamasiy Jehová chuna la chuchut litsama pupunu» (Isaías 11:9).
La uku, Dios kamasiyanima latamanin xlikalanka katiyatni ni nalatalatlawakgo chu «namastalankikgo xʼespadajkan chu nalitlawakgo arado, chu xlanzaskan nalitlawakgo tuku liʼakgsitkan kiwi» (Miqueas 4:3).
Komo tlakg katsiputuna tuku malaknu Biblia xlakata nialh katiʼanalh tapekua, kalikgalhtawakga artículo «¿Es posible librarse del miedo?».
Komo tlakg katsiputuna xlakata la nasputa talamakgnin, kalikgalhtawakga artículo «¡Por fin paz en la Tierra!».