Domingo 20 xla noviembre kata 2022 sputli xtamakxtumitkan Conferencia de las Naciones Unidas sobre el Cambio Climatico (COP27). Tiku tamakxtumikgolh lakkaxwilikgolh nakamaxkikgo tumin países tiku tlakg kamakgapatinan tuku masputunan. Maski lu tlan tuku lakkaxwilikgolh lhuwa lakpuwankgo pi uma ni katimasputulh uma ta’akglhuwit.

•   «Lu tlan klimakgkatsi pi klaksakwi nakalimakgtayayaw tumin tiku lu patinankgo xlakata tuku masputunan [...]. Liwana katsiyaw pi uma kaj tsinu namakgtayanan [...]. Kinkatiyatni chuntiya lanima tuku nitlan» (António Guterres, secretario general de las Naciones Unidas; 19 xla noviembre kata 2022).

•   «Nialh makgas Katiyatni nalakgmin tuku tlakg nitlan nema masputunan» (Mary Robinson, tiku xmapakgsinan Irlanda chu xlakgayawakanit lu xlakaskinka taskujut k’ONU para los Derechos Humanos; 20 xla noviembre kata 2022).

 Kamanan lu lilakgaputsakgo xlakata tuku na’akgspula Katiyatni kilhtamaku nema aku mima. ¿Wi tuku natlawakgo mapakgsinanin xlakata namasputukgo tuku tlawanima tuku nitlan Katiyatni? ¿Tuku wan Biblia?

 Maski lhuwa tiku xlikana liskujmakgo xlakata nialh na’an tuku masputunan, Biblia limasiya pi nila lhuwa tuku tlawakgo. Ka’akxilhwi pulaktiy tuku xlakata:

•   «Tuku lhkgotili nila matsajkan» (Eclesiastés 1:15).

   Uma wamputun pi: Mapakgsinanin nila makgantaxtikgo putum tuku lakkaxwilikgonit xlakata ni kalakgchan x’akstukan nakamapakgsikan (Jeremías 10:23). Maski putum mapakgsinanin makxtum naskujkgo nikxni katilakkaxtlawakgolh putum ta’akglhuwit nema anan kkakilhtamaku.

•   «Xlakata lakchixkuwin xʼakstukan nakapaxkikan, napaxkikgo tumin, […] nila wi tuku nakatalakkaxlakan» (2 Timoteo 3:2, 3).

   Uma wamputun pi: Biblia lichuwinan pi latamanin xala uku x’akstukan x’amaka kalilakgaputsakan chu ni makxtum x’amakgo skujkgo xlakata tlan xkakitaxtunilh amakgapitsin. Chu wa uma tuku akxilhaw.

 Xlakata ni nalani tuku nitlan kinkatiyatnikan ni wa mapakgsinanin tiku nalakkaxwilikgo. Dios lakgayawanita chatum mapakgsina tiku nalakkaxwili kakilhtamaku: Jesucristo. Uma tuku wan Biblia xpalakata:

•   «Xtamapakgsin natawila kxpakgxtun. Chu nawanikan tlakg xaTlan Stakyawana, Tliwakga Dios, Tlat tiku putum kilhtamaku wi, xPuxku Takaksni» (Isaías 9:6).

 Jesús wa xmapakgsina xTamapakgsin Dios, akgtum tamapakgsin xalak akgapun (Mateo 6:10) Xla kgalhi litliwakga, liskgala chu kuentajtlawaputun kinKatiyatnikan chu tiku nalatamakgo anta (Salmo 72:12, 16). Akxni mapakgsinama nawan tamapakgsin xalak akgapun nakamalakgsputu «tiku malakgsputumakgolh katiyatni» chu nialh kati’analh tuku namalakgsputunan (Apocalipsis 11:18, Isaías 35:1, 7).

 Komo tlakg katsiputuna xlakata la nalakkaxtlawakan Katiyatni xlakata nialh na’anan tuku masputunan, kalikgalhtawakga artículo «¿Qué dice la Biblia sobre el cambio climático y nuestro futuro?».