¡SKGALALH KATAWILA!
Mapakgsinanin wankgo pi talakatsuwima Armagedón: ¿Tuku wan Biblia?
Tsisa lunes 10 xla octubre kata 2022, lhuwa misil xalak Rusia pankgolh kmakgapitsi kachikinin xalak Ucrania. Uma chuna tlawaka xlakata 8 xla octubre lakxtlawaka akgtum puente nema lu xlakaskinka xlitaxtu xpalakata Crimea chu Rusia. Nina makgas makgapitsi mapakgsinanin xlichuwinankgonit pi Armagedón xtalakatsuwimaja.
«Lata xmakpasinama Kennedy [mapakgsina xalak Estados Unidos] chu Cuba xlimaklakaskimputun xmisiles ni lu xtalakatsuwininitaw Armagedón la uku. [...] Nila katilimaklakaskiw lhuwa tuku limakgninankan chu ni namatsukiyaw Armagedón» (Joe Biden, mapakgsina xalak Estados Unidos, 6 xla octubre kata 2022).
«Na klakpuwan pi uma wa Armagedón; nitlan tuku natlawa xlikalanka Katiyatni» (chuna wan Volodímir Zelenski, mapakgsina xalak Ucrania, akxni kgalhskinka xlakata tuku nitlan kitaxtu akxni limaklakaskinkan lhuwa tuku limakgninankan; BBC News, 8 xla octubre kata 2022).
¿Tlan nalitsuku Armagedón xlakata limaklakaskinkan lhuwa tuku limakgninankan? ¿Tuku wan Biblia?
¿Lhuwa tuku limakgninankan tlan nalimatsuki Armagedón?
Ni. Tachuwin Armagedón kaj makgtum min kBiblia, nak Apocalipsis 16:16. Chu uma ni kilhchanima guerras nema tlawakgo kachikinin, wata kilhchanima guerra nema Dios katakgalhi «putum mapakgsinanin kxliputum katiyatni» (Apocalipsis 16:14). Dios nalimaklakaskin guerra xla Armagedón xlakata nakamasputu putum mapakgsinanin xalak katiyatni (Daniel 2:44).
Xlakata tlakg nakatsiya tuku nala kKatiyatni akxni lama nawan Armagedón, kalikgalhtawakga artículo «¿Tuku Armagedón?».
¿Namalakgsputukan Katiyatni chu tiku lamakgolh anta xlakata guerra niku lu limaklakaskinkan tuku limakgninankan?
Ni. Max mapakgsinanin namaklakaskinkgo tuku limakgninankan kkilhtamaku nema aku mima, pero Dios ni katimastalh talakaskin pi Katiyatni namalakgsputukan. Biblia wan:
«Katiyatni nikxni katisputli» (Eclesiastés 1:4).
«Tiku xa’akgstitum wa nakamaxkikan katiyatni chu putum kilhtamaku nalatamakgo anta» (Salmo 37:29).
Pero, tuku lichuwinan Biblia chu tuku lama la uku limasiyakgo pi lamaw lu xlakaskinka kilhtamaku xpalakata latamanin (Mateo 24:3-7; 2 Timoteo 3:1-5). Tlakg kakatsini tuku wan Biblia xlakata kilhtamaku nema aku mima takgalhtawakga xalak Biblia nema ni taxokgo.