¡SKGALALH KATAWILA!
¿Natawila akgtum guerra kxlikalanka katiyatni? | ¿Tuku kinkawaniyan Biblia?
Lata puxamakaw kata nema titaxtunit, lhuwa latamanin xwankgo pi mapakgsinanin xmakgtayanankgolh pi ni xʼanalh taʼakglhuwit chu pi asta xʼanama takaksni. Pero uma tapuwan tsukuma talakgpali, chuna la limasiyakgo umakgolh tamakatsinin:
«Latamanin tlakg lilakgaputsamakgo pi Guerra xla Gaza tlakg nastaka xlakata latalatlawamakgo Israel chu Hizbulá anta niku tapakgta Líbano» (Reuters, 6 xla enero kata 2024).
«Rusia chu China tatayakgolh Irán, chu lakpuwama nakatalachipa países xalak occidente. Grupos nema tatayakgo Irán lakalhuwa niku tsukukgonit talatlawanankgo, chu Irán tsukupa katlawa armas nucleares» (The New York Times, 7 xla enero kata 2024).
«Rusia chuntiya tlawanima tuku nitlan Ucrania» (UN News, 11 xla enero kata 2024).
«China tlakg kgalhima tumin chu lhuwa soldados, Taiwan lilankajwanan xlakata xkachikin chu xlakata ni laʼakxilhputunkgo Pekin chu Washington, putum uma limasiya pi kaj lakapala naʼanan talachipat» (The Japan Times, 9 xla enero kata 2024).
¿Wi tuku wan Bilbia xlakata tuku nitlan lama kkakilhtamaku la uku? ¿Natlawa uma pi naʼanan akgtum lanka guerra kxlikalanka katiyatni?
Biblia lichuwinanit tuku lama la uku
Biblia ni lichuwinalh akgtum guerra xtachuna nema kaʼakxlihmaw la uku. Pero, lichuwinan putum tuku nitlan nema mapanu «takaksni kkatiyatni» (Apocalipsis 6:4).
Libro xla Daniel lichuwinalh pi «akxni sputmaja kilhtamaku» mapakgsinanin xʼamakgo “lalitalachipa” tamapakgsin. Kʼuma tatalachipat xʼamakgo masiyakgo la xlilhuwa litliwakga kgalhikgo chu xʼamakgo laktlawakgo «lhuwa tuku xtapalh», uma wamputun, lhuwa tumin (Daniel 11:40, 42, 43).
Talakatsuwima akgtum guerra
Biblia wan pi tuku lama kkakilhtamaku tlakg nitlan xʼama natawila. Jesucristo lichuwinalh: «Naʼanan lhuwa tapatin chuna la ni makgstum chuna lanit lata kxkilhtsukut kakilhtamaku asta uku, chu nikxni chuna katilapa» (Mateo 24:21). Uma «lhuwa tapatin» nakikgalhsputa kʼakgtum guerra nema wanikan Armagedón, nema nalilakgapaskan «guerra nema natlawakan klanka xkilhtamaku Dios, Tiku kgalhi putum litliwakga» (Apocalipsis 16:14, 16).
Pero Armagedón ni katimalakgsputulh latamanin, wata nalakgmaxtu. Kʼuma guerra, Dios nakamalakgsputu xmapakgsinanin latamanin, nema linkgo kuenta xlakata lhuwa guerras nema masputunan. Komo katsiputuna la Armagedón natlawa kaʼanalh takaksni xliputum kilhtamaku, kalikgalhtawakga artículos: