Komo nakakgalhiya laktlan amigos, nialh mi’akstu katimakgkatsi | Biblia tlan namakgtayayan
Kata 2023, makuchinanin kxlikalanka katiyatni lilakgaputsakgolh xlakata xwilakgolh lhuwa latamanin tiku xʼakstu xmakgkatsikgo chu putsakgolh tuku natlawakgo xlakata nakamakgtayakgo. ¿Tuku xlitatlawat xlakata nialh na’anan uma tapuwan?
«Akxni kiʼakstukan makgkatsiyaw chu akxni katamakgatliniyaw amakgapitsin nitlan nakinkakitaxtuniyan kkilatamatkan. Pero wi tuku tlan natlawayaw chali chali xlakata nialh chuna namakgkatsiyaw chu tlan natsukuyaw katalalinaw amakgapitsin» (Vivek Murthy, director general de Salud Pública de Estados Unidos). a
Maski chatum lataman katawi amakgapitsin na tlan xʼakstu namakgkatsikan. Pero maski chuna, Biblia kinkawaniyan tuku tlan natlawayaw xlakata nialh chuna namakgkatsiyaw, chuna la komo naliskujaw nakgalhiyaw xalaktlan amigos nema nakinkamakgtayakgoyan nialh lu chuna namakgkatsiyaw.
Biblia wan tuku tlan natlawaya nema tlan namakgtayayan
Tlakg kakatalalipi amakgapitsin. Uma wamputun pi ni kajwatiya ankgalhin nawana tuku makgkatsiya, wata na nakakgaxpatniya amakgapitsin tuku xlakan makgkatsikgo. Akxni tlakg nakalilakgaputsaya amakgapitsin, natlawa pi tlakg tlan nakatalalipina.
Biblia wan: «Ni kajwatiya kalilakpuwantit tuku tlakg tlan kitaxtu mimpalakatakan, wata na kalilakpuwantit tuku tlakg tlan xpalakatakan amakgapitsin» (Filipenses 2:4).
Tlakg lhuwa tiku kakatalalipi. Kakatalalipi tiku ni watiya kata kgalhikgo la wix o tiku xalak alakatanu kachikin o tiku kgalhikgo tanu tanu talismanin.
Biblia wan: «Lanka kamalakkitit minakujkan» (2 Corintios 6:13).
Komo tlakg katsiputuna la nakgalhiya laktlan amigos, kalikgalhtawakga artículo «Cómo saciar la sed de amistad».
a Our Epidemic of Loneliness and Isolation: The U.S. Surgeon General’s Advisory on the Healing Effects of Social Connection and Community (La epidemia de la soledad y el aislamiento: Informe del director general de Salud Pública de Estados Unidos sobre los beneficios de las conexiones sociales y la comunidad), 2023.