¡SKGALALH KATAWILA!
Nialh senan: ¿Tuku kinkawaniyan Biblia?
«La uku kChina patima tlakg tliwakga lhkakna chuna la nikxni patinit, chu na wa uma kata nema tlakg makgapalama lhkakna» (The Guardian, 7 xla septiembre kata 2022).
«Kmakgapitsi países xalak África, xliʼakgkitsis kata asta la uku nitu senama chu chuntiya ni katisenalh» (Noticias ONU, 26 xla agosto kata 2022).
«Lhuwa países xalak Europa katuwa wilakgolh xlakata nitu senama; kliwaka 500 kata nema titaxtunita nikxni lu lhkaknanit chuna la uku» (BBC News, 23 xla agosto kata 2022).
Lhuwa tiku lakputsanankgo xlakata uma, wankgo pi chuntiya ni katisenalh chu nataliwaka lhkakna makgapitsi kata nema aku mima. ¿Namin kilhtamaku nialh chuna katiwa? ¿Tuku wan Biblia?
Tuku lichuwinan Biblia xlakata nialh senan
Wa uma tuku lichuwinalh Biblia nema xʼama kgantaxtu kinkilhtamakujkan:
«Kaniwa […], lakatum lakatum naʼanan tatsinksni» (Lucas 21:11).
Akxni ni senan, tlawa pi naʼanan tatsinksni. Chu wa uma tuku lichuwinan Biblia, xlakata akxni anan tatsinksni limin tapatin chu linin (Apocalipsis 6:6, 8).
¿Tuku xlakata nialh min sen chu lu lhkaknan?
Biblia lichuwinan tuku xlakata. Anta wan:
«Chixku ni lakgchan xʼakstu napulalinkan» (Jeremías 10:23).
Uma kilhchanima pi latamanin nitlan katikakitaxtunilh komo xʼakstukan nakapulalinkan. Chu tuku nitlan laksakkgo, tlawa pi xakaskakni tiyat natawila chu nialh naʼanan chuchut.
Lhuwa científicos wankgo pi putum tuku tlawakgo latamanin tlawa pi lu nalhkaknan. Chu uma tlawama pi kxlikalanka katiyatni xakaskakni natawila.
Chuchut nema anankgo ama sputa. ¿Tuku xlakata? Xlakata latamanin lu lakgatikgo tumin, ni liwana limaklakaskimakgo tuku anan. Akgtum liʼakxilhtit, masputumakgo kiwi chu lu maxkajwanimakgo katiyatni.
Pero Biblia kinkamaxkiyan akgtum takgalhkgalhin.
¿Namin kilhtamaku natalakgpali uma?
Biblia malaknu pi Dios natlawa pi kaʼanalh lhuwa chuchut. ¿La natlawa?
1. Dios nakamasputu «tiku malakgsputumakgolh katiyatni» (Apocalipsis 11:18). Nakamasputu tiku tlawakgonit pi nasputa chuchut: wa latamanin tiku nitlan likatsikgo chu lhuwa tuku kgalhiputunkgo nema maxkajwimakgo katiyatni (2 Timoteo 3:1, 2).
2. «Niku lu kachichi xwanit nataʼakgstokgtawilakgo chuchut» (Isaías 35:1, 6, 7). Dios nalakkaxtlawa putum tuku nitlan lanit xlakata nialh senan chu natlawa pi katiyatni akgtum paraíso nawan niku lhuwa chuchut naʼanan.
3. «Wix kuentajtlawaya katiyatni chu tlawaya pi lu namakgalanan chu lu namasta xtawakat» (Salmo 65:9). Xlakata xtasikulunalin Dios, kKatiyatni naʼanan lhuwa liwat chu lhuwa chuchut.