Kaʼakxilhwi tuku wankgonit makgapitsi xpulalinanin takanajla xlakata guerra nema lama kʼUcrania:

•   «Xpulalina Iglesia Ortodoxa Rusa, Patriarca Kirill ninajtu wan xlakata guerra nema matsukinit Rusia [...]. Putin liwana maklakaskinit uma tuku nitlan lichuwinankgonit xpulalinanin iglesia, xlakata natataya guerra nema tlawamakgolh». (EUobserver, 7 xla marzo kata 2022).

•   «Patriarca Kirill [...] wan pi guerra nema Rusia tatlawama Ucrania tatlawama xlakata namalakgsputukan talakgalhin. Wa uma tuku likilh’an xlakata nalimasiya pi tlan tuku tlawama xpaís». (AP News, 8 xla marzo kata 2022).

•   «Xpulalina Iglesia Ortodoxa Ucraniana, Metropolitano Epifanio I xla Kiev, lunes, sikulunatlawalh xkachikin chu kamakgpuwantinilh xkatalachipakgolh talatlawananin xalak Rusia. Nachuna wa pi ni akgtum talakgalhin kamakgnikan soldados xalak Rusia». (The Jerusalem Post, 16 xla marzo kata 2022).

•   «Kkatatayayaw soldados xalak Ucrania chu putum tiku kinkamakgtayakgoyan. Ksikukunatlawayaw putum tuku tlawamakgolh xlakata nakuentajtlawakgo Ucrania xpalakata tiku talatlawamakgo chu kkapalakaskinaw kki’oracionkan» (Declaración del Consejo de Iglesias y Organizaciones Religiosas de Ucrania, a 24 xla febrero kata 2022).

 ¿Tuku lakpuwana? ¿Xlilat pi tiku wankgo pi stalanikgo Cristo nakamakgpuwantinikgo tiku anta tapakgsikgo pi ka’ankgolh kʼguerra? ¿Tuku wan Biblia xlakata uma?

Takanajla chu guerra nema ananit

 Tuku lanit masiyanit pi takanajla nema wankgo pi putsakgo takaksni, makgtayanankgonit chu asta makgtlawakgonit guerras. Lhuwata kata lata xtatayananin Jehová lichuwinankgonit pi uma tuku tlawamakgo nichuna xlilat. Ka’akxilhti makgapitsi tuku lichuwinanit kilikgalhtawakgakan:

•   Artículo «Las cruzadas: ‘trágica ilusión» lichuwinan pi Iglesia católica romana na lin kuenta xlakata lhuwa latamanin kamakgnika chu limaklakaskilh xtukuwani Dios chu Cristo.

•   Artículo «La Iglesia Católica y África» lichuwinan pi takanajla nila machokgolh la lamakgnikgolh lhuwa latamanin chu akxni lalh tuku lilakgapaskan genocidio.

•   Artículos «¿Tiene la culpa la religión?», «El papel de la religión en las guerras» chu «La religión toma partido» masiyakgo pi clérigos católicos, ortodoxos chu protestantes kgalhmakgtayakgo tiku xlachipamakgo anta kʼguerra.

¿Xlimakgtanutkan Iglesias cristianas anta k’guerras?

 Tuku masiyalh Jesús: «Milipaxkit mintalataman chuna la miʼakstu paxkikana» (Mateo 22:39). «Kakapaxkitit mintalatlawanakan» (Mateo 5:44-47).

 Tuku masiyalh Jesús: «KinTamapakgsin ni xalak uma kakilhtamaku. Komo kinTamapakgsin xalak uma kakilhtamaku xwa, kilakskujnin xchipanankgolh xlakata ni xkimakamastaka» (Juan 18:36). «Putum tiku maklakaskinkgo xʼespadajkan nakalimakgnikan espada» (Mateo 26:47-52).

 Kalilakpuwanti uma: Komo kstalaninanin Cristo ni limaklakaskinkgolh tuku limakgninankan, asta nipara akxni chipaka Jesús, ¿xlilat tlan atanu tuku xlakata chuna xtlawakgolh? Xlakata tlan na’akxilha xli’akxilhtitkan xapulana kstalaninanin Cristo, tiku stalanikgolh xtamasiy Jesús, kalikgalhtawakga artículo «El cristianismo y la guerra: ¿son compatibles?».

¿Tuku naka’akgspula takanajla nema makgtanukgo k’guerra?

 Biblia lichuwinan pi Dios kalakgmakgan takanajla nema wankgo pi stalanimakgo xtamasiy Jesús, pero tuku tlawakgo limasiya pi ni chuna (Mateo 7:21-23; Tito 1:16).

•   Libro xla Apocalipsis masiya pi Dios kawani amakgo takanajla pi wa linkgo kuenta xlakata «putum tiku kamakgnikanit kkatiyatni» (Apocalipsis 18:21, 24). Komo tlakg katsiputuna, ka’akxilhti artículo «¿Qué es Babilonia la Grande?».

•   Jesús wa pi Dios nakamalakgsputu putum takanajla nema tlawamakgo tuku nitlan, xtachuna la kgantum kiwi xamasni nema masta nixatlan tawakat «kakan chu lhkuyukan» (Mateo 7:15-20). Komo tlakg katsiputuna la nakgantaxtu uma, kalikgalhtawakga artículo «¡Se acerca el fin de la religión falsa!».

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images