¿Tuku wan Biblia xlakata tatsinkstat kkakilhtamaku?
«Nialh katianalh tatsinkstat». Wa tuku tlawaputunkgo mapakgsinanin xpalakata latamanin: pi ni kakatsankganilh liwat. a Pero ¿namin kilhtamaku akxni nialh katianalh tatsinkstat? ¿Tuku kinkawaniyan Biblia?
Biblia lichuwinalh pi x’ama sputa liwat
Biblia lichuwinalh pi kkinkilhtamakujkan nema litalakgapasa «kxaʼawatiya kilhtamaku»—x’ama sputa liwat (2 Timoteo 3:1). Dios ni wa xkuenta, xla xkinkawaninitan pi chuna x’ama la (Santiago 1:13). Ka’akxilhti pulaktiy tuku xlichuwinanit Biblia.
«Kaniwa [...] naʼanan tatsinksni» (Mateo 24:7). Chuna la xlichuwinankanit, kaniwa x’ama anan tatsinksni. Akgtum tamakatsinin nema mastakgolh latamanin tiku lakputsananikgo uma, wankgo: «Latamanin nialh liwana skujmakgo xlakata namasputukgo tatsinkstat o komo amakgapitsin nakgalhikgo liwat chuna la xlilat». b Lhuwa millones latamanin xalak klakalhuwa países nila kgalhikgo liwat nema maklakaskinkgo chu uma tlawa pi lhuwa latamanin nikgo.
«Chu kakxilhli tantum xatsitsakga kawayu. Tiku xkgewi xlin kxmakan akgtum pupulhkan» (Apocalipsis 6:5). Uma tuku xlichuwinankanit, kawayu chu tiku xkgewi kilhchanima tatsinkstat k’uma xa’awatiya kilhtamaku. c Tiku xkgewi xlin kxmakan akgtum pupulhkan xlakata napulhka liwat chu tlakg nalimakti. Uma tiku kgewi kawayu, makatsininantilha pi liwat natapalaxla chu kawani latamanin pi ni paxkat katlawakgolh (Apocalipsis 6:6). Tuku xlichuwinankanit litasiya tuku lama kkinkilhtamakujkan, niku lhuwa millones latamanin nila kgalhikgo chu nila xokgokgo xatlan liwat nema maklakaskinkgo.
Tatsinkstat nasputa
Tiku lakputsananikgo wankgo pi katiyatni makgala lhuwa liwat. Pero, ¿tuku xlakata anan lhuwa tatsinksni? Chuna la wan Biblia, ¿tuku natlawa kimalakatsukinakan, Jehová, d xlakata nalakkaxtlawa uma ta’akglhuwit?
Ta’akglhuwit: Mapakgsinanin nila masputukgo talixmakgen chu xlakata ni lakxtum kgalhikgo tumin tlawa pi latamanin natitaxtukgo tatsinkstat.
La nalakkaxtlawakan: Mapakgsinanin tiku makglakgalhinanin, nakamapanukan chu xlakgxokgo natawila xTamapakgsin Dios, tiku namapakgsinan wa Jesucristo (Daniel 2:44; Mateo 6:10). La uku, lhuwa latamanin tiku laklimaxkgen tuwa makgkatsikgo naxokgokgo liwat. Pero uma natalakgpali kxTamapakgsin Dios. Biblia wan tuku natlawa Jesús: «Xla nalakgmaxtu tiku pixlanka skima tamakgtay, nachuna tiku taktuju chu putum tiku ni kgalhi tiku namakgtaya. [...] Lhuwa namakgalanankan kkatiyatni, lu lhuwa namakgalanankan kkasipijni» (Salmo 72:12, 16).
Ta’akglhuwit: Guerras masputunan, uma tlawa pi nialh na’anan tumin chu pi ni liwana namakgpitsikan liwat.
La nalakkaxtlawakan: «[Jehová] masputu guerra kxlikalanka katiyatni. Laktukxa arco chu laktsu laktsu tlawa lanza, kalhkuyu carro xla guerra» (Salmo 46:9). Dios namasputu tuku limakgninankan chu latamanin tiku malakatsukikgo guerras. Komo chuna natlawa, putum latamanin tlan nakgalhikgo liwat. Biblia malaknu: «Tiku xaʼakgstitum napulha la tuwan, chu lhuwa naʼanan takaksni» (Salmo 72:7).
Ta’akglhuwit: Xlakata la talakgpali kilhtamaku chu tuku masputunan laktlawa tachanan chu kamakgni animales.
La nalakkaxtlawakan: Dios namalakgachokgo tuku masputunan chu tuku nachankan namakgalanan. Biblia wan: «[Jehová] makaksa tliwakga un; takakskgo xtakgayawana pupunu [...] Tlawa pi kxakaskakni tiyat na’anan chankat chu na’anan chuchut nema taxtukgo ktiyat. Tlawa pi tiku tsinksnimakgolh anta natamakgxtakgkgo [...]. Xlakan chananankgo kkakiwin chu chankgo kiwi nema lhuwa makgalanankgo» (Salmo 107:29, 35-37).
Ta’akglhuwit: Latamanin tiku nitlan likatsikgo chu lhuwa tuku kgalhiputunkgo makgalakgo liwat nema ni xatlan o ni mastakgo talakaskin pi liwat nakalakgchan tiku maklakaskinkgo.
La nalakkaxtlawakan: Xtamapakgsin Dios nakamalakgsputu latamanin tiku akgsaninankgo chu kgalhanankgo (Salmo 37:10, 11; Isaías 61:8). Biblia wan pi Jehová «xa’akgstitum kalikatsini tiku palha kamaskujukan chu kamaxki kaxtilanchu tiku tsinksnimakgolh» (Salmo 146:7).
Ta’akglhuwit: Akgatunu kata, lhuwa liwat tamakgan chu paxkat tlawakgo.
La nalakkaxtlawakan: Xtamapakgsin Dios namasta liwat chuna la xlilat. Akxni Jesús xlama unu kkatiyatni kuentajtlawalh xlakata ni paxkat natlawa liwat. Akgtum li’akxilhtit, akgtum kilhtamaku kamawilh liwaka 5.000 latamanin. Alistalh kawanilh kstalaninanin: «Kamamakgstokgtit xatalakgchakgataman nema akgataxtulh, xlakata ni kaj paxkat nawan» (Juan 6:5-13).
Xlakata xTamapakgsin Dios namasputu ta’akglhuwit nema limin tatsinkstat, putum latamanin tlan nalipaxuwakgo lakgkgama chu lhuwa liwat (Isaías 25:6). Chu ¿tuku kilhtamaku chuna nala? Xlakata nakatsiya, ka’akxilhti artículo «¿Tuku kilhtamaku namapakgsinan xTamapakgsin Dios kKatiyatni?».
a Kata 2015 lhuwa laklanka kachikin nema tapakgsikgo kNaciones Unidas lakkaxwilikgolh pi kkata 2030 nialh na’anan tatsinksni.
b Tamakatsinin nema mastalh Organización de las Naciones Unidas xlakata Alimentación, Agricultura, Fondo Internacional de Desarrollo Agrícola, Fondo de las Naciones Unidas para la Infancia, Programa Mundial de Alimentos de las Naciones Unidas chu Organización Mundial de la Salud.
c Komo tlakg katsiputuna xlakata kgalhtati tiku kgewi xkawayu nema lichuwinan Apocalipsis, ka’akxilhti artículo «¿Qué representan los jinetes del Apocalipsis?».
d Jehová wa xtukuwani Dios (Salmo 83:18). Ka’akxilhti artículo «¿Tiku Jehová?»
You May Also Like
TAKGALHSKININ XLAKATA BIBLIA
¿Tuku nalitasiya pi wilaw «kxaʼawatiya kilhtamaku» o «ksputat kakilhtamaku»?
Biblia lichuwinalh lhuwa tuku lakxtum xʼama la chu xʼama limasiya pi wilaw kxaʼawatiya kilhtamaku.
ESSENTIAL BIBLE TEACHINGS
¿Tuku xTamapakgsin Dios?
Jesús tlakg lichuwinalh xTamapakgsin Dios nixawa atanu. Akglhuwa ciento kata kstalaninanin skinkgonit kʼoración kamilh uma Tamapakgsin.
