¿Tuku wan Biblia xlakata sputma xastalanka chuchut?
Putum maklakaskinaw xastalanka chuchut xlakata tlan nalatamayaw. Pero «xlakata chali chali lhuwa chuchut tamaklakaskin, nialh lhuwa chuchut anan», chuna wa Secretario General de las Naciones Unidas, António Guterres. Lhuwa millones latamanin kxlikalanka katiyatni tuwa makgkatsikgo natekgskgo chuchut nema tlan nawakgo.
Strdel/AFP via Getty Images
¿Namin kilhtamaku putum nakgalhiyaw xastalanka chuchut? ¿O ankgalhin nalipatinanaw xlakata ni anan chuchut? ¿Tuku wan Biblia?
Tuku Biblia malaknu xlakata chuchut
Biblia malaknu pi namin kilhtamaku nikxni kintikatsankganin chuchut. Naʼanan xastalanka chu xaskgawiwi chuchut.
«Kdesierto naʼanan chuchut chu kxakaskakni tiyat natawilakgo taxtunu. Kxakaskakni tiyat naʼanan chuchut chu tuwan, chu niku ni anan chuchut, naʼanan lhuwa chuchut» (Isaías 35:6,7).
¿Tuku xlakata tlan nalipawanaw uma tamalaknun? Kaʼakxilhwi pulaktum tuku wan Biblia xlakata la tlawakanit Katiyatni.
Tuku wan Biblia xlakata chuchut
«[Dios] ni tlawalh [katiyatni] xlakata nitu nalilakan, wata tlawalh xlakata nalatamakan anta» (Isaías 45:18).
Xlakata Dios lakaskin pi kaʼanalh latamat kKatiyatni, lakkaxwililh tuku talakaskin xlakata xʼanalh lhuwa chuchut.
«[Dios] tlawa pi chuchut natawaka, mixinat taʼakgstokgtawila xlakata sen nalitaxtu; alistalh puklhni xtakgamakgankgo katutsu, kamalakgachanikgo latamanin» (Job 36:27, 28).
Uma texto lichuwinan la Dios lakkaxwililh chuchut xlakata nikxni nakitsankga. Chuchut nema anan ktiyat chu kpupunu mixinan, alistalh puklhni wan chu taktapara la sen. Putum uma tlawa pi latamanin chu animales nakgalhikgo xastalanka chuchut (Eclesiastés 1:7; Amos 5:8).
«Nakkamalakgachaniyan sen akxni xlilat, chu tiyat xlikana namakgalanan chu kiwi namasta xtawakat» (Levítico 26:4).
Dios kamalaknunilh israelitas pi xʼama kasikulunatlawa. Xlakata xlakan xliskujkgo tachanan, xmaklakaskinkgo chuchut xlakata tlan xmakgalanankgolh, chu Dios kamaxkilh. Xla katsi pi tamaklakaskin lhuwa chuchut xlakata naʼanan lhuwa liwat.
Tuku Dios tlawalh kxamakgan Israel, nialh makgas natlawa kxlikalanka Katiyatni (Isaías 30:23). Pero xlakata nina chin ama kilhtamaku, klakalhuwa kachikinin tlakg sputma chuchut chu na nialh lhuwa senan. ¿Tuku atanu wan Biblia xlakata la nalakkaxtlawakan taʼakglhuwit nema anan xlakata chuchut?
La natlawakan xlakata nialh nakinkatsankganiyan chuchut
Biblia wan pi xTamapakgsin Dios nalakkaxtlawa putum taʼakglhuwit nema anan kKatiyatni, chu pulaktum wa taʼakglhuwit xlakata chuchut (Mateo 6:9, 10). Xtamapakgsin Dios namapakgsinan kxlikalanka Katiyatni (Daniel 2:44; Apocalipsis 11:15). Nachuna, xTamapakgsin Dios natlawa tuku mapakgsinanin xalak Katiyatni nila tlawakgo: namapanu tuku tlawa pi ni naʼanan chuchut.
Taʼakglhuwit: La uku, lu talakgpalinit kilhtamaku. Kaj xalan lu lhkaknan chu kaj xalan lu senan o chuchut nema anan kpupunu taliwaka. Putum uma tlawa pi chuchut nialh nataspita kʼakgapun chuna la Dios lakkaxwililh.
La nalakkaxtlawa Dios: Xtamapakgsin Dios namasasti Katiyatni xlakata tlan naskujpara chuna la xapulana xtlawakanit. Dios malaknunit uma: «¡Kaʼakxilhti! Kmasastima putum tuku anan» (Apocalipsis 21:5). Anta kxakaskakni tiyat naʼanan lhuwa chuchut, chu naʼanan latamat niku la uku nila latamakan (Isaías 41:17-20). Jesucristo, xMapakgsina xTamapakgsin Dios, na namachokgo tuku masputunan, chuna la huracán o atanu.
Akxni Jesús xlama kKatiyatni, makaksalh sen, chuna limasiyalh pi Dios xmaxkinit litliwakga (Marcos 4:39, 41). Anta kxTamapakgsin Dios, Cristo namapanu putum tuku masputunan. Latamanin nakgalhikgo takaksni chu nitu katilipekuankgolh.
Taʼakglhuwit: Lhuwa latamanin chu empresas tiku tlajaputunkgo lhuwa tumin maxkajwikgo chuchut nema anan kkgalhtuchukgo, lagos chu chuchut nema anan kxtampin tiyat, putum uma tlawa pi nialh naʼanan chuchut nema xastalanka.
La nalakkaxtlawa Dios: Dios namaskulunki Katiyatni chu putum niku anan chuchut. Katiyatni akgtum paraíso nawan. Biblia wan: «Desierto chu xakaskakni tiyat lu napaxuwakgo, chu niku xakaxtum nema kaskawaw napaxuwa chu naxana la akgatum xanat» (Isaías 35:1).
¿Tuku nakaʼakgspula tiku nipara tsinu lilakgaputsakgo tuku anan kKatiyatni chu xtalatamaninkan? Dios malaknu pi nakamasputu «tiku malakgsputumakgolh katiyatni» (Apocalipsis 11:18, Proverbios 2:21, 22).
Taʼakglhuwit: Ni liwana tamakgpitsima chuchut chu tlakg lhuwa chuchut talaktlawama nixawa la xlilhuwa anan.
La nalakkaxtlawa Dios: Xtamapakgsin Dios natlawa pi kakgantaxtulh xtalakaskin Dios, chu ni wa xtalakaskin latamanin tiku kaj xʼakstukan kapaxkikan (Mateo 6:9, 10). Uma Tamapakgsin na nakamasiyani latamanin la tlakg tlan linkan latamat. Isaías 11:9 wan: «Katiyatni nalitatsama xtamasiy Jehová». a Uma tamasiy nema nakamaxkikan chu tapaxkit nema nakgalhinikgo Dios chu xtamalakatsukin, natlawa pi latamanin liwana nakuentajtlawakgo Katiyatni chu putum tuku anan.
Xlakata tlakg nakatsiya tuku natlawa xTamapakgsin Dios, kalikgalhtawakga artículo «¿Qué cosas logrará el Reino de Dios?».
Kaputsa kBiblia capítulo 35 xla Isaías xlakata nalikgalhtawakgaya la uma Katiyatni akgtum paraíso nawan.
Komo katsiputuna tuku xlakata Dios katlawalh Katiyatni chu latamanin, kaʼakxilhti video ¿Tuku xlakata tlawalh Dios Katiyatni?
a Xtukuwani Dios wa Jehová (Salmo 83:18). Kalikgalhtawakga artículo «¿Tiku Jehová?».
You May Also Like
¡SKGALALH KATAWILA!
Nialh senan: ¿Tuku kinkawaniyan Biblia?
¿Tlan nalakkaxtlawakan uma taʼakglhuwit kxlikalanka katiyatni? ¿Namin kilhtamaku nialh chuna katiwa?
ESSENTIAL BIBLE TEACHINGS
¿Tuku xTamapakgsin Dios?
Jesús tlakg lichuwinalh xTamapakgsin Dios nixawa atanu. Akglhuwa ciento kata kstalaninanin skinkgonit kʼoración kamilh uma Tamapakgsin.
XLAKATA AKININ
Kaskinti nalakgapaxialhnankana
Kakatsi xtakgalhtin akgtum takgalhskinin xalak Biblia o tlakg kakalakgapasti xtatayananin Jehová.
