Nina makgas, mapakgsinanin, científicos chu tiku lu katsinikgo xlakata tecnología lichuwinankgonit tuku tlan tlawakgo xalakgskgalalan máquinas (XM). Maski wankgo pi kinkamakgtayayan, na lilakgaputsakgo komo nitlan nalimaklakaskinkan.

•    «Xalakgskgalalan máquinas wa pulaktum tuku lu xlakaskinka tlawakanit chu nema tlan nakamakgtaya xlatamatkan latamanin […]. Pero na tlan natlawa pi kalipekua natawilayaw, nila natlawayaw tuku kinkalakgchanan chu pi amakgapitsin ni tuwa nakatsikgo kimpalakatakan, chu asta tlan natlawa pi nialh nakalipawanaw mapakgsinanin» (Kamala Harris, vicepresidenta xalak Estados Unidos, 4 xla mayo kata 2023).

•    «Maski xalakgskgalalan máquinas (XM) malaknukgo pi tlakg tlan nakinkamakuchikanan, na tlan natlawa pi ni lu tlan natawilayaw chu natatatlayaw» (Makgapitsi makuchinanin chu tiku katsinikgo xlakata likuchun, tiku kapulalima wa doctor Frederik Federspiel, BMJ Global Health, 9 xla mayo kata 2023). a

•    «La uku latamanin tlan limaklakaskinkgo xalakgskgalalan máquinas xlakata namalakgatumikgo nixaxlikana tamakatsin. Nialh makgas tlan natlawa pi latamanin nialh nakgalhikgo taskujut. Chu makgapitsi tiku lu katsinikgo xlakata tecnología, wankgo pi namin kilhtamaku katuwa nakawili latamanin» (The New York Times, 1 xla mayo kata 2023).

 Chuna la natitaxtu kilhtamaku naʼakxilhaw komo xalakgskgalalan máquinas tlan la limaklakaskimaka o ni. ¿Tuku kinkawaniyan Biblia?

 Biblia wan tuku xlakata latamanin nila limasiyakgo pi tuku tlawakgonit xlakata tecnología nalimaklakaskinkan kaj xlakata natlawakan tuku tlan.

1.  1. Maski latamanin tlawaputunkgo tuku tlan, nila tlawakgo pi tlan kakitaxtulh tuku laksakkgo.

   •    «Wi kgantum tiji nema kxlakatin chixku xatlan tasiya, pero linan kkalinin» (Proverbios 14:12).

2.  2. Ni chatum akinin tlan natlawa komo amakgapitsin tlan nalimaklakaskinkgo kintaskujutkan o ni.

   •    «Nakmakgxtakgni [kintaskujut] tiku aku namin. ¿Chu tiku katsi komo xaskgalala o xatonto? Maski skgalala o ni, xla namapakgsi putum tuku kkgalhi nema lu kliskujnit kxtampin chichini» (Eclesiastés 2:18, 19).

 Xlakata lilakgaputsayaw uma, limasiya pi maklakaskinaw nakinkapulalinan kiMalakatsukinakan.

 KiMalakatsukinakan malaknu pi nikxni katimastalh talakaskin pi latamanin chu tuku tlawakgonit xlakata tecnología, namasputu Katiyatni chu latamanin.

•    «Katiyatni nikxni katisputli» (Eclesiastés 1:4).

•    «Tiku xa’akgstitum wa nakamaxkikan katiyatni chu putum kilhtamaku nalatamakgo anta» (Salmo 37:29).

 Anta kBiblia, kiMalakatsukinakan kinkamaxkiyan tapulalit xlakata nakgalhiyaw takaksni chu nitu nalipekuanaw kkilhtamaku nema aku mima. Komo tlakg katsiputuna tuku kinkawaniyan Biblia, kalikgalhtawakga artículos «¿Tuku nakinkamakgtayayan nakgalhiyaw tlan latamat?» chu «La esperanza real de un mañana mejor».