Lu tlan tuku lalh kʼasamblea regional kata 2020. Xlimakgtumku grabarlika programa xlakata tlan xkgaxmatkgolh putum latamanin anta kʼinternet. Pero natalan xalak Malaui chu Mozambique maski ni kgalhikgo internet na lipaxuwakgolh asamblea. ¿La chuna kitaxtulh?

 Comité de Coordinadores chu Comité de Enseñanza xla Lakgkgolotsin tiku Pulalinankgo mastakgolh talakaskin pi kMalaui chu kMozambique xmatitaxtika asamblea regional kradio chu ktelevisión. ¿Tuku xlakata chuna tlawaka? Xlakata kMalaui internet tlakg tapalaxla nixawa alakatanu. Wa xlakata lhuwa natalan ni kgalhikgo internet. William Chumbi, chatum tiku makgtapakgsi Comité de Sucursal xalak Malaui, wan: «Kajwatiya radio chu televisión tlan xaklimaklakaskiw xlakata natalan tlan xkgalhikgolh taway xaʼespiritual». Luka Sibeko, tiku na makgtapakgsi Comité de Sucursal xalak Malaui, na wa: «Komo ni xaktilimaklakaskiw radio chu televisión, ni lhuwa natalan xalak kisucursalkan xlitamakgtayakgolh asamblea». Anta kMozambique nachuna titaxtulh. Lhuwa natalan nila tamawakgo akgtum dispositivo electrónico chu nipara internet.

 Xlakata analh pandemia COVID-19, kintamakxtumitkan xmatitaxtimakaja kradio chu ktelevisión. a Wa xlakata kinatalankan skinkgolh tlakg akglhuwa horas xlakata tlan xmatitaxtika asamblea regional.

 Pero natalan xalak Malaui wi tuku tuwa titaxtukgolh. Radio chu televisión kaj mastakgo talakaskin pi akgtum hora namatitaxtikan akgtum programa, xlakata lakpuwankgo pi komo tlakg namakgapala, latamanin nialh katikgaxmatputunkgolh. Pero natalan kawanikgolh pi programa xʼama kamakgtaya latamanin. Wankgolh pi maski la uku nila ktaxtuyaw chuntiya kamakatsinimaw latamanin tuku wan Biblia. Uma kamakgtaya tlan nalikatsikgo chu xatapaxuwan natawilakgo kxfamiliajkan. Akxni kgaxmatkgolh uma, emisoras xla radio chu televisión mastakgolh talakaskin pi akglhuwa horas xmatitaxtika programa.

 Anta kMalaui, akgtum emisora xla radio chu atanu emisora xla televisión matitaxtikgolh asamblea regional. Chu chuna lhuwa millón latamanin xalak uma kachikin kgaxmatkgolh asamblea. Anta kMozambique, 85 emisoras xla radio chu akgtum emisora xla televisión matitaxtikgolh asamblea.

 Xlakata tlan xmatitaxtika asamblea regional ktelevisión laktlawaka 28.227 dólares b chu atsinu 20.000 dólares xlakata tlan xmatitaxtika kradio kʼakgtiy kachikinin. Emisoras tanu tanu la matajinankgolh, wi tiku matajinalh 15 dólares chu wi tiku matajinalh 2.777 dólares.

 Kinatalankan lu kuenta tlawakgolh la limaklakaskinkgolh donaciones. Akgtum liʼakxilhtit, kMalaui tlawakgolh pi ni tapalaxla xkamatajika. Akgtum kilhtamaku kaj 70 por ciento xokgokgolh. Komo chuna lalh, akgataxtulh 1.711 dólares. Makgapitsi emisoras xalak Mozambique limaktikgolh la xmatajinankgo kaj xlakata xtatayananin Jehová kalilakgapaskan pi ni akgskgawinankgo chu sokg xokgonankgo.

 Kinatalankan lu paxtikatsininankgolh pi tlan akxilhkgolh chu kgaxmatkgolh asamblea kradio chu ktelevisión. Patrick, chatum kgolotsin xalak Malaui, wa: «Lu kapaxtikatsiniyaw Lakgkgolotsin tiku Pulalinankgo xlakata lakkaxwilikgolh pi tlan xakkgalhiw kiʼasambleajkan kʼuma pandemia». Atanu tala xalak Malaui, tiku wanikan Isaac, na wa: «Ni kkgalhiyaw atanu dispositivos electrónicos. Wa xlakata lu kpaxtikatsiniyaw pi tlan kkgaxmatwi asamblea regional kradio. Uma akgtum tamaskiwin nema kinkamaxkin xkachikin Jehová. Xlakata chuna tlawaka putum kifamilia litamakgtayakgolh programa. Liwana kʼakgatekgsaw pi Jehová kapaxki xkachikin».

 Chatum publicador xalak Mozambique xlimakgtumku kgalhilh xʼasamblea regional kkata 2020. Xla wa: «Akxni kakxilhli asamblea anta ktelevisión kimalakapastakalh pi Jehová kgalhi putum litliwakga. Pandemia ni tlawalh pi Jehová ni xkinkamaxkin taway xaʼespiritual chu pi xkinkamaxkin anta kkinchikkan. Liwana kakxilhli pi xlakskujnin Jehová xlikana lapaxkikgo, chu liwana kkatsi pi wa uma xaxlikana takanajla».

 Chatum kgolotsin xalak congregación tiku wanikan Wyson wa: «Kpaxtikatsiniputun skujni xatalipaw xlakata lu kinkakuentajtlawan kʼuma pandemia. Ni lhuwa tuku kkgalhiyaw chu niku klamaw ni lhuwa anan tumin. Pero xlakata kkgalhiw asamblea kradio chu ktelevisión, lu klipaxuwaw chu klitamakgtayaw».

 Comité de Coordinadores chu Comité de Enseñanza amakgtum mastaparakgolh talakaskin pi xmatitaxtiparaka asamblea regional kata 2021 kradio chu ktelevisión kmakgapitsi kachikinin. ¿La xokgokan uma? Limaklakaskinkan tumin nema xatapaxuwan mastakan xpalakata obra mundial. Anta ksitio xla internet donate.pr418.com tlakg kinkawaniyan la tlan namastayaw kintuminkan. Lu kapaxtikatsiniyan tuku wixin mastayatit.