Jesús kawanilh kstalaninanin: «Nalichuwinanatit kimpalakata […] kxlikalanka katiyatni» (Hechos 1:8). Xtatayananin Jehová lu liskujkgo xlakata namakgantaxtikgo uma taskujut. Maski chuna, ananku kachikinin niku nina lichuwinankan xlakata Dios, akgtum liʼakxilhtit, kmakgapitsi laklanka kachikinin chu niku lu lhuwa wilaka. Nachuna, kmakgapitsi países ni lhuwa anankgo xtatayananin Jehová (Mateo 9:37, 38). ¿Tuku ktlawamaw xlakata tlakg lhuwa latamanin nakalitachuwinankan xlakata Dios?

 Xlakata tlan namakgantaxtikan tuku kinkalimapakgsin Jesús, Comité de Servicio xla Lakgkgolotsin tiku Pulalinkgo xTatayananin Jehová kamalakgacha misioneros niku tlakg talakaskin tiku nalichuwinankgo Dios. La uku anan 3,090 tiku lichuwinamakgo Dios kxlikalanka katiyatni. a Atsinu ni lhuwa kamasiyanikanit kʼakgtum escuela niku masiyakan xlakata Biblia, la Escuela xla Tiku lichuwinankgo xTamapakgsin Dios. Umakgolh misioneros xatapaxuwan makgxtakgkgonit xchikkan chu ankgonit kʼalakatanu países. Xlakata tuku kamasiyanikanit, tuku titaxtukgonit chu xlakata tliwakga xtakanajlakan, makgtayanankgonit xlakata natalichuwinan xalaktlan tamakatsinin chu kawilinikgonit akgtum tlan liʼakxilhtit tiku aku tsukumakgo lichuwinankgo Dios.

 Kʼakgatunu sucursales, Sección de Ministros en el Campo xla Departamento de Servicio akxtum taskujkgo Comité de Sucursal xlakata nakamaxkikan misioneros tuku maklakaskinkgo. Kalimakgtayakan niku natawilakgo, tuku nalikuchunkgo, chu kalimakgtayakan aktsu tumin xlakata nalitamawakgo tuku maklakaskinkgo. Kkata 2020, xtatayananin Jehová laktlawakgolh atsinu ni akchan 27 millones xla dólares xlakata kamakgtayaka misioneros. Xlakata uma tamakgtay, misioneros kajwatiya tlan nalilakgaputsakgo chu nalimaklakaskinkgo xlitliwakgakan xlakata nalichuwinankgo Dios, chu nachuna nakamatliwakglhkgo congregaciones.

 ¿La makgtayanamakgo misioneros xlakata chuntiya natalichuwinan Dios? Frank Madsen, tiku makgtapakgsi kComité de Sucursal xalak Malaui, wan: «Xlakata ni pekuankgo chu xlakata tuku katsinikgo tlawakgo. Misioneros kamakgtayakgonit congregaciones nalichuwinankgo Dios kkachikinin niku lu tuwa xwanit, la niku nila xtanukan chu kkachikinin niku chuwinankan atanu tachuwin. Nachuna, akxni kakxilhaw la liskujkgo xlakata nakatsinikgo tachuwin nema chuwinankan niku kamalakgachakan chu talismanin nema anan kʼuma kachikin, kawilinikgo lu tlan liʼakxilhtit amakgapitsin. Putum tuku tlawakgo kamakgpuwantinikgo kamanan xlakata na naskujnanikgo Jehová putum kilhtamaku. Kilipaxtikatsinitkan Jehová xlakata anan misioneros».

 Chatum tiku xalak atanu país chu makgtapakgsi kComité de Sucursal wan: «Misioneros akgtum lu tlan liʼakxilhtit nema limasiya pi xtatayananin Jehová makxtum wilakgo kxlikalanka katiyatni. Asta tiku ni xtatayananin Jehová akxilhkgo pi talismanin ni kinkamapapitsiyan. Tuku katsiniyaw kBiblia tlawa pi akgtum familia nalitaxtuyaw kxlikalanka katiyatni».

 ¿Chu la kamakgtayamakgo misioneros natalan xalak congregación niku makgtayanamakgolh? Paulo, xalak Timor Oriental, lu paxtikatsini taskujut nema tlawakgo misioneros tiku makgtayanamakgolh kxcongregación. Xla kinkawaniyan: «Klamanaw kʼakgtum kachikin niku lu lhkaknan. Chu maski xkachikinkan misioneros lu lonkgnan, ni tlawa pi lhkakna nakamachokgo. Ankgalhin ankgo ktamakxtumit nema tatlawa tsisa xlakata naʼankan lichuwinankan Dios, chu makglhuwa asta tastunut tamakgxtakgkgo xlakata natlawakgo revisitas akxni lu lhkaknan. Chu asta kakgotanun chuntiya lichuwinankgo Dios. Kamakgtayakgonit lhuwa latamanin nakatsikgo tuku xaxlikana, chuna la akit. Xatapaxuwan xkujnanikgo Jehová, chu uma kamakgpuwantini congregación xlakata na tlakg naskujnanikgo».

 Ketti, chatum precursora regular xalak Malaui, lichuwinan la akgtum tamakgaxtokgat tiku misioneros litaxtukgo makgtayalh xfamilia: «Akxni kamalakgachaka kkincongregación, kajwatiya akit xtatayana Jehová xaklitaxtu kkifamilia. Xlakan lu kimakgtayakgolh chu xʼamigos litaxtukgolh putum kifamilia. Xpalakata xlakan kinkamanan katsikgolh pi skujnanikan Jehová wa tuku xlikana makgapaxuwanan. Xlakata xatlan xliʼakxilhtitkan, kgalhtutu kilaktsuman precursoras litaxtukgo chu kinchixku tsukunit an ktamakxtumit».

 ¿Chu niku tiyakan tumin nema kalimakgtayakan misioneros? Maklakaskinkan tumin nema xatapaxuwan mastakan xpalakata taskujut nema tatlawama kxlikalanka katiyatni. Lhuwa uma tlawakan kdonate.pr418.com. Paxtikatsinilh xlakata xatapaxuwan mastayatit mintuminkan.