Biblia masiya pi Dios ni lakaskin natlawayaw «talakgxtumit nema ni xlitatlawat» (1 Tesalonicenses 4:3). Biblia wan pi, «talakgxtumit nema ni xlitatlawat» na anta makgtanuma tiku akgskgawima tiku tamakgaxtokga, lakchixkuwin tiku mastakgo talakaskin pi nakatatalakgxtumikgo xtachixkukan, chu talakgxtumit nema kgalhikgo chatum chixku chu chatum puskat tiku ni makgaxtokgkgo.

•  ¿Tuku xlakata xlakaskinka akxilha Dios natamakgaxtokgkan?

•  ¿Tuku lakpuwan Dios xlakata chixku chu puskat akxtum nalatamakgo maski ni tamakgaxtokgkgonit kaj xlakata naʼakxilhkgo komo tlan nakakitaxtuni?

•  ¿La tlan nakgalhikan akgtum xatapaxuwan tamakgaxtokgat?

•   Dios lakkaxwililh tamakgaxtokgat. Chuna tlawalh akxni kamamakgaxtokgli xapulana chixku chu xapulana puskat (Génesis 2:22-24). Dios ni xlakaskin pi chixku chu puskat akxtum xlatamakgolh komo ni xtamakgaxtokgkgonit.

•   Dios katsi tuku tlakg tlan kimpalakatakan. Dios lakkaxwililh tamakgaxtokgat xlakata chixku chu puskat akxtum xlatamakgolh putum kilhtamaku. Dios xlakaskin pi tamakgaxtokgat xkamakgtayalh putum tiku makgtapakgsikgo kfamilia. Kalilakpuwanti uma: xlakata wi tuku namalakgnuyaw, talakaskin natlawayaw tuku wan tiku tlawalh. Xtachuna ktamakgaxtokgat, komo paxuwaputunaw kfamilia, kilitlawatkan tuku wan Dios. Ankgalhin tlan nakinkakitaxtuniyan komo chuna natlawayaw (Isaías 48:17, 18).

•   Tlawakan talakgxtumit maski nina tamakgaxtokgkan limin lhuwa tuku nitlan. Chuna la kgalhikan skgata nema ni xlakaskinkan, tajatat xlakata tlawakan talakgxtumit xalimaxana chu talipuwan.

•   Dios kamaxkilh tamaskiwin latamanin: tlan nakgalhikgo skgata akxni tlawakgo talakgxtumit. Uma tamaskiwin kgalhi lhuwa xtapalh. Kalilakpuwaw pi Dios akxilha latamat chuna la xasanto. Wa xlakata xla lakaskin pi kamaxkiw kakni uma tamaskiwin chu kajwatiya natakgalhiyaw tiku tamakgaxtokgaw. Chuna namaxkiyaw kakni tamakgaxtokgat (Hebreos 13:4).

 Xlakata nakgalhikan akgtum xatapaxuwan tamakgaxtokgat, ni talakaskin akxtum nalatamakan kaj xlakata naliʼakxilhkan komo tlan nakitaxtu chu komo ni chuna tlan nalamakgxtakgkan. Wata tamakgaxtokgat tatliwakglha akxni tlawakgo tuku xlilat chu xchatiykan akxtum skujkgo chu nalakkaxwilikgo taʼakglhuwit. a Chu kajwatiya ktamakgaxtokgat tlan tlawakan uma (Mateo 19:6).

 Kputum tamakgaxtokgat anan taʼakglhuwit. Pero tlan kgalhikan akgtum xatapaxuwan tamakgaxtokgat, komo makgantaxtikan xtastakyaw Biblia. Kaʼakxilhwi makgapitsi:

•   Pulana kawili tuku tlakg tlan xpalakata achatum nixawa mimpalakata (1 Corintios 7:3-5; Filipenses 2:3, 4).

•   Kaliskujtit ankgalhin nalapaxkiyatit chu nalalimasiyaniyatit kakni (Efesios 5:25, 33).

•   Ankgalhin pulana kalakapastakti tuku nawana (Proverbios 12:18).

•   Ni lakapala kasitsitit chu tunkun kalatapatitit (Colosenses 3:13, 14).