Armagedón wa xaʼawatiya tatalachipat nema Dios nakatatlawa mapakgsinanin. Umakgolh mapakgsinanin chu tiku tatayakgo talalakatawakakgo Dios xlakata ni tapakgsiniputunkgo (Salmo 2:2). Guerra xla Armagedón namasputu xtamapakgsinkan latamanin (Daniel 2:44).

 Tachuwin Armagedón, nema na tsokgwilikan Har–Magedón, kajwatiya makgtum min kBiblia, anta kxlibro Revelación, o Apocalipsis. Uma libro lichuwinan tuku aku ama la chu wan pi «mapakgsinanin kxliputum katiyatni» nakamamakxtumikan «kʼguerra nema natlawakan klanka xkilhtamaku Dios, Tiku kgalhi putum litliwakga». Uma guerra nala «anta niku kxahebreo wanikan Armagedón» (Apocalipsis 16:14, 16).

 ¿Tiku namakgtlawakgo guerra xla Armagedón? Namakgtlawakgo ángeles xalak akgapun nema nakapulalin Jesucristo. Xlakan nakamakgatlajakgo xtalamakgasitsin Dios (Apocalipsis 19:11-16, 19-21). Na nakamakgatlajakan tiku ni natapakgsiniputunkgo xtamapakgsin Dios chu nalakgmakgankgo (Ezequiel 39:7).

 ¿Natlawakan Armagedón klakatum kachikin? Ni. Guerra xla Armagedón ni kajwatiya kʼakgtum kachikin katitlawaka, wata natlawakan kxlikalanka Katiyatni (Jeremías 25:32-34; Ezequiel 39:17-20).

 Tachuwin Armagedón (kxahebreo, Har Meghiddóhn) wamputun «sipi xla Meguidó». Meguidó akgtum kachikin xwanit nema xwi niku xlamakgo xamakgan kachikin Israel. Tuku tekgskgonit historiadores masiya pi lakatsu kʼuma kachikin tlawaka lu xlakaskinka tatalachipat. Biblia na lichuwinan makgapitsi umakgolh tatalachipat (Jueces 5:19, 20; 2 Reyes 9:27; 23:29). Pero Armagedón ni wa kilhchanima lakatum niku xwi xamakgan Meguidó, xlakata anta ni anan akgtum sipi. Nachuna, kxakaxtum Jezreel, niku wi Meguidó, nila katikamamakxtumikgoka putum tiku natalachipakgo Dios. Wa xlakata Armagedón kilhchanima tuku nala kxlikalanka katiyatni akxni putum mapakgsinanin makxtum nalakgo xlakata xaʼawatiya natalachipakgo xtamapakgsin Dios.

 ¿Tuku nala kʼguerra xla Armagedón? Ni katsiyaw la namaklakaskin Dios xlitliwakga, pero tlan namaklakaskin tuku maklakaskinita makgasa: namakamin chijit, nalakchiki tiyat, nalimatsamanan chuchut, namakamin lhkuyat chu azufre, makglipni chu tajatat (Job 38:22, 23; Ezequiel 38:19, 22; Habacuc 3:10, 11; Zacarías 14:12). Xlakata xtalamakgasitsin nialh katikatsikgolh tuku natlawakgo, xʼakstukan nalamakgnikgo, pero xaʼawatiya nakatsikgo pi wa Dios tiku katalachipama (Ezequiel 38:21, 23; Zacarías 14:13).

 ¿Namasputukan kakilhtamaku kʼArmagedón? Kimplanetajkan ni katimasputuka kʼArmagedón. Katiyatni tlawaka xlakata latamanin nalatamakgo anta putum kilhtamaku (Salmo 37:29; 96:10; Eclesiastés 1:4). Wa xlakata kʼArmagedón ni putumika katimasputunanka. Kʼguerra xla Armagedón nalakgtaxtukgo «lhuwa latamanin» tiku ni makgxtakgkgo Dios (Apocalipsis 7:9, 14; Salmo 37:34).

 Pero ¿ni masiya Biblia pi Armagedón nalimin «xlisputni kakilhtamaku»? Xlikana pi makgapitsi textos maklakaskin tachuwin kakilhtamaku akxni lichuwinan kimplanetajkan. Pero Biblia na maklakaskin uma tachuwin akxni kalichuwinan latamanin tiku talalakatawakakgo Dios (1 Juan 2:15-17). Wa uma tuku wamputun akxni wan pi Armagedón nalimin «xlisputni kakilhtamaku» (Mateo 24:3).

 ¿Tuku kilhtamaku natsuku Armagedón? Akxni Jesús lichuwinalh «lhuwa tapatin» nema nalitsuku guerra xla Armagedón, wa: «Xlakata ama kilhtamaku chu tukuya hora niti katsi, nipara ángeles xalak akgapun, nipara xaKgawasa, kajwatiya xaTlat» (Mateo 24:21, 36). Pero Biblia masiya pi Armagedón nala kkilhtamaku nema talilakgapasa akxni kinkatawilan nawan Cristo, nema tsukulh kkata 1914 (Mateo 24:37-39).