Biblia kaj makgtum lichuwinan tatuajes anta kLevítico 19:28, niku wan: «ni kakgalhitit tatuajes». Dios kamaxkilh uma limapakgsin israelitas xlakata ni xlakaskin pi xlikatsikgolh la xlikatsikgo amakgapitsi kachikin tiku xtlawakgo tatuajes, niku xtsokgwilikgo xtukuwanikan o klhkaxtukgo la xtasiyakgo xdioseskan (Deuteronomio 14:2). Maski kstalaninanin Cristo nialh wa stalanikgo limapakgsin nema xkamaxkinit Dios israelitas, tastakyaw nema limin uma limapakgsin chuntiya tlan lilakpuwankan.

¿Tlan chatum kstalanina Cristo nakgalhi tatuajes?

 Ka’akxilhwi makgapitsi textos xalak Biblia nema tlan nakinkamakgtayayan nakatsiyaw xatakgalhtin.

•   «lakpuskatin xlilhakganatkan […] chuna la xlilat, kalimasiyakgolh tlan talakapastakni» (1Timoteo 2:9.) Uma tastakyaw na kalakgchan lakchixkuwin. Kstalanina Cristo ni natlawa pi kajwatiya wa na’akxilhkan o nitlan nakamamakgkatsini amakgapitsin kaj xlakata la tasiya.

•   Makgapitsi latamanin kawilinikan tatuajes kaj xlakata nalimasiyakgo tuku litaxtukgo, nalitasiyakgo pi xlakan tlawakgo tuku lakaskinkgo o nalimasiyakgo pi wa katapakgsini xmaknikan. Pero Biblia, kawani kstalaninanin Cristo: «kamakamastatit mimaknikan xtachuna la xastakna tamakamastan, xasanto, nema Dios tlan makgamakglhtinan; uma wamputun maklakaskinkan talakapastakni akxni maxkikan Dios xasanto taskujut» (Romanos 12:1). Tachuwin, «maklakaskinkan talakapastakni» tlan namakgtaya tiku lakaskin tatuaje nalilakpuwan tuku xlakata kgalhiputun. Max kaj kgalhiputun xlakata akxilha pi amakgapitsin na kgalhikgo o limasiyaputun pi tapakgsi k’akgtum grupo. Wa xlakata tlan nalilakpuwan uma:«¿Tuku naktlawa komo tatuajes nialh lu xlakaskinka nali’akxilhkan o nialh ktilakgatilh?». Komo nalilakpuwana tuku xlakata kgalhiputuna tatuaje, namakgtayayan nalaksaka tuku tlan (Proverbios 4:7).

•   «Akxni liwana lakkaxwili tuku natlawa tiku skulujwa lu tlan kitaxtuni; pero tiku lakapala tuku tlawa nitu katikgalhilh» (Proverbios 21:5.) Ankgalhin akxni tlawakan akgtum tatuaje kaj lakapala chuna lakpuwankan. Pero tiku kaj lakapala chuna tlawa max lhuwa kilhtamaku nitlan nakitaxtuni. Nachuna, xapakan akgtum tatuaje lu tapalaxla kitaxtu chu na lu katsan. Akxilhkanit pi lhuwa tiku kgalhikgo tatuaje nitlan limakgkatsikgo. Chu uma chuna limasiya xlakata anan lhuwa negocios niku xapakan tatuajes.