Tlan nakinkamakgtayayan. Dios kalilakgaputsa kskujnin tiku tatatlakgo. Wa uma tuku Biblia wan xpalakatakan: «Jehová na[ka]makgtaya akxni natatatla[kgo]» (Salmo 41:3). Wa uma pulaktutu tuku tlan natlawayaw komo kgalhiyaw akgtum tajatat:

1.   Kaskiniw Dios litliwakga xlakata natayaniyaw. Dios nakinkamaxkiyan «takaksni nema latamanin nila akgatekgskgo» nema nakinkamakgtayayan ni lu nalakgaputsayaw chu nakinkamaxkiyan litliwakga nema maklakaskinaw xlakata natayaniyaw (Filipenses 4:6, 7).

2.   Ni kajwatiya kalilakpuwaw tuku nitlan. Biblia wan: «Naku nema paxuwa mapaksanan, pero talipuwan tlawa pi ni nakgalhiya litliwakga» (Proverbios 17:22, Dios habla hoy [Versión Popular]). Akxni litsinaw ni kajwatiya kinkamakgapaxuwayan, wata na tlakg tlan kinkamamakgkatsiniyan.

3.   Chuntiya kalakapastakwi kintakgalhkgalhinkan. Takgalhkgalhin kinkamakgtayayan napaxuwayaw maski kinkamakgapatinaman akgtum tajatat (Romanos 12:12). Biblia kinkawaniyan pi nachan kilhtamaku akxni nialhti nawan: «Ktatatlay» (Isaías 33:24). Dios namapaksa putum tajatat nema likuchun nila mapaksa. Nachuna, Dios tsinu tsinu namasputu tuku nitlan kitaxtu akxni kgolonaw. Biblia wan: «Xmakni kaskgatampa nixawa la akxni kgawasaku xwanit; kakgalhipa litliwakga nema xkgalhi akxni kgawasaku xwanit» (Job 33:25).

 Nota: Xtatayananin Jehová klipawanaw pi Dios kinkamakgtayayan, pero na kputsayaw likuchun akxni ktatatlayaw (Marcos 2:17). Maski chuna, ni kkawaniyaw amakgapitsin tuku likuchun xliputsatkan, xlakata chatunu chatunu xlilaksakat tuku nalikuchun akxni tatatla.