¿La xtasiya Jesús?
Biblia kinkamaxkiyan xatakgalhtin
Niti liwana katsi la xtasiya Jesús, xlakata Biblia ni lichuwinan. Uma kinkamasiyaniyan pi ni lu xlakaskinka la xtasiya. Maski chuna, Biblia kinkalitachuwinanan makgapitsi tuku kinkamakgtayayan nakatsiyaw la max xtasiya Jesús.
La xtasiya: Xlakata Jesús judío xwanit max xtse matitaxtinilh chuna la xtasiyakgo semitas (Hebreos 7:14). Ni lu tanu xwanit la amakgapitsin, xlakata akgtum kilhtamaku akxni taxtulh kʼGalilea chu alh Jerusalén, makgat tlawalh chu niti lakgapasli (Juan 7:10, 11). Max xtachuna xtasiya la makgapitsi kstalaninanin tiku lu xtalatapulikgo. Kalakapastakwi pi akxni latamanin ankgolh chipakgo Jesús, talakaskilh pi Judas Iscariote xkamasiyanilh tiku Jesús (Mateo 26:47-49).
Xchixit: Max xchixit Jesús ni laklhman xwanit, xlakata Biblia wan pi «komo laklhman xchixit chixku uma mamaxani» (1 Corintios 11:14).
Xkgalhchixit: Jesús xkgalhi xkgalhchixit. Jesús kgalhakgaxmatli limapakgsin nema xkamaxkikanit judíos nema xwan pi lakchixkuwin ni xlichukutkan xwanit xkgalhchixitkan (Levítico 19:27; Gálatas 4:4). Nachuna, pulaktum tuku lichuwinan Biblia xlakata la xʼama patinan Jesús, masiya pi xkgalhi xkgalhchixit (Isaías 50:6).
Xmakni: Jesús chatum tliwakga chixku xwanit. Akglhuwa kilómetros tlawalh akxni xʼan lichuwinan Dios (Mateo 9:35). Makgtiy katlakgaxtulh ktemplo tiku kstanankgo anta, kamakgpuspitnilh xmesajkan chu kasnokgxtulh wakax (Lucas 19:45, 46; Juan 2:14, 15). Maktum tatsokgni wan: «Putum tuku lichuwinan Evangelios limasiya pi Jesús tliwakga xwanit chu ni xtatatla» (Cyclopedia xla M’Clintock chu Strong, volumen IV, página 884).
La xtasiya xlakan: Jesús lu xapaxkina chu xalakgalhamanina xwanit, chu liwana katsiyaw pi uma xlitasiya kxlakan (Mateo 11:28, 29). Lhuwa latamanin xputsakgo xlakata xkamakgtayalh chu tlan xkamamakgkatsinilh (Lucas 5:12, 13; 7:37, 38). Asta laktsu kamanan lu xpaxuwakgo akxtum xtatawilakgo (Mateo 19:13-15; Marcos 9:35-37).
Makgapitsi tuku lakpuwankgo latamanin xlakata la xtasiya Jesús pero ni xlikana
Tuku lakpuwankgo makgapitsi: Makgapitsi latamanin lakpuwankgo pi Jesús tsitsakga xwanit xlakata libro xla Apocalipsis (o Revelación) wan pi xchixit xtachuna lana chu xtantun xtachuna «bronce bruñido» (Apocalipsis 1:14, 15, Biblia del Peregrino).
Tuku xaxlikana: Tuku lichuwinan libro xla Apocalipsis kaj wi «tuku kilhchanima» (Apocalipsis 1:1). Tuku wan xlakata xchixit chu xtantun Jesús kaj wi tuku kilhchanima chu limasiya makgapitsi tayat nema kgalhilh Jesús akxni xlakastakwananita. Ni wa lichuwinama la xtasiya Jesús akxni kilachi kKatiyatni. Akxni Apocalipsis 1:14 wan pi «xʼakchixit lu snapapa xwanit xtachuna la miki», lichuwinama xcolor xchixit. Xasnapapa chixit limasiya liskgalala nema Jesús kgalhi xlakata makgasa latamanit (Apocalipsis 3:14). Uma versículo ni wan pi xchixit Jesús xtachuna tamakgkatsi la miki.
Libro xla Apocalipsis wan pi xtantun Jesús xtachuna xwanit «xaskulunku cobre nema lakgskgo akxni tanuma kʼhorno» (Apocalipsis 1:15). Na wan pi xlakan xtachuna xwanit «la chichini akxni maxkgakgenan xliputum xlitliwakga» (Apocalipsis 1:16). Liwana tasiya pi uma kaj wi tuku kilhchanima xlakata ni anan nipara akgtum raza nema chuna tasiyakgo la tuku talichuwinan kʼuma versículo. Unu lichuwinankan Jesús akxni lakastakwananita chu «wi niku anan lhuwa kakni chu nipara chatum lataman tlan talakatsuwi» (1 Timoteo 6:16).
Tuku lakpuwankgo makgapitsi: Jesús ni tliwakga xwanit.
Tuku xaxlikana: Jesús tliwakga xwanit chu ni xpekuan. Akgtum liʼakxilhtit, akxni lhuwa latamanin ankgolh putsakgo xlakata nachipakgo xla ni pekualh chu kawanilh pi wa tiku xputsamakgo (Juan 18:4-8). Nachuna, xlakata Jesús xwakna xwanit, xtalakaskin pi tliwakga xwa (Marcos 6:3).
Pero ¿tuku xlakata talakaskilh pi wi tiku xmakgtayalh akxni xkukalima kiwi niku xʼama xtokgowakakan? ¿Chu tuku xlakata Jesús lakapala nilh nixawa amakgapitsi tiku na xkaxtokgowakakanit? (Lucas 23:26; Juan 19:31-33). Akxni nina xmakgnikan, xmakni lu xtaxlakwaninita. Tantaskaka ni lhtatalh xlakata xlakgaputsama (Lucas 22:42-44). Judíos tantaskaka lu makgapatinankgolh chu lichali romanos kgesnokgmikgolh (Mateo 26:67, 68; Juan 19:1-3). Putum uma max wa tuku tlawalh pi lakapala xnilh.
Tuku lakpuwankgo makgapitsi: Jesús putum kilhtamaku xlipuwan.
Tuku xaxlikana: Jesús liwana limasiyalh xtayat xTlat xalak akgapun, Jehová. Chu Biblia wan pi Jehová «xapaxuwana Dios» (1 Timoteo 1:11; Juan 14:9). Jesús asta kamasiyanilh amakgapitsin tuku xlitlawatkan xwanit xlakata xpaxuwakgolh (Mateo 5:3-9; Lucas 11:28). Wa xlakata tlan nawanaw pi xlakan Jesús putum kilhtamaku xlimasiya pi xpaxuwa.
Max na nalakgatiya uma
ESSENTIAL BIBLE TEACHINGS
¿Tuku xlakata lipawanaw pi xlikana tuku wan Biblia?
Komo Biblia wa Dios matsokgninalh, uma wamputun pi ni xtachuna la amakgapitsin libros nema katsokgkanit.
XLAKATA AKININ
Kaskinti nalakgapaxialhnankana
Kakatsi xtakgalhtin akgtum takgalhskinin xalak Biblia o tlakg kakalakgapasti xtatayananin Jehová.