Nichuna. Biblia liwana wan pi Dios kamalakatsukilh latamanin chu putum tuku staknankgo chuna la pulakatunu xliwanat o xgénero, a lata animales chu plantas (Génesis 1:12, 21, 25, 27; Apocalipsis 4:11). Biblia wan pi Adán chu Eva wa xnatlatnikan putum latamanin (Génesis 3:20; 4:1). Biblia ni tataya evolución teística, uma kilhchanima akxni latamanin wankgo pi Dios maklakaskilh evolución xlakata natlawa tanu tanu tuku staknankgo. Pero Biblia ni talalakatawaka tuku tekgskgonit científicos akxni wankgo pi tlan talakgpali tsinu chuna la xliwanat pulakatunu tuku staknankgo (Génesis 3:20; 4:1).

•  ¿Tuku wankgo makgapitsi latamanin?

•  ¿Tatalakxtumi tuku wankan xlakata evolución chu tuku wan Biblia?

•  Akxni animales chu plantas talakgpalikgo tsinu, ¿wamputun pi evolucionarlikgolh?

 Tachuwin evolución teística pulaklhuwa tuku kilhchanima. Chuna la wan Encyclopædia Britannica, wamputun pi «chuna la tsinu talakgpalikgo tuku staknankgo wa tuku Dios maklakaskin xlakata nakamalatamani putum tuku anan».

 Evolución teística max na kilhchanima uma:

•   Putum tuku staknankgo watiya xkilhtsukutkan kgalhikgo nema latamakgolh makgasata kilhtamaku.

•   Pulaktum tuku staknan tlan natalakgpali asta atanu tuku nalitaxtu.

•   Wa Dios tiku tlawa pi kalalh uma talakgpalit.

 Komo evolución teística xaxlikana, tuku lichuwinan Génesis xlakata tamalakatsukin nixaxlikana xwa. Pero Jesús wa pi xlikana tuku lichuwinan Génesis (Génesis 1:26, 27; 2:18-24; Mateo 19:4-6). Biblia wan pi akxni Jesús nina xmin kKatiyatni, xtalama Dios kʼakgapun chu makgtayalh namalakatsuki «putum tuku anan» (Juan 1:3). Wa xlakata akxni wankan pi Dios maklakaskilh evolución xlakata namalakatsuki putum tuku anan ni tatalakxtumi tuku masiya Biblia.

 Biblia ni lichuwinan asta la xlilhuwa tlan talakgpali akgtum género o chuna la pulakatunu xliwanat tuku staknankgo. Na ni wan pi animales chu plantas nema Dios kamalakatsukilh ni talakgpalikgo akxni talhuwikgo o kalinkan kʼatanu pulataman. Makgapitsi wankgo pi uma talakgpalit evolución, pero tuku xaxlikana wa pi kaj tsinu talakgpalikgo chu ni atanu tuku litaxtukgo.