Biblia kinkamakgpuwantiniyan namastayaw tuku kgalhiyaw pero xatapaxuwan natlawayaw chu kinakujkan chuna nakinkamakgpuwantiniyan. Akxni chuna tlawayaw, ni kajwatiya litamakgtaya tiku makglhtinan, wata akinin nalitamakgtayayaw (Proverbios 11:25; Lucas 6:38). Jesús wa: «Tlakg anan tapaxuwan akxni mastakan nixawa akxni makglhtinankan» (Hechos 20:35).

•  ¿Tuku kilhtamaku tlan namastakan tuku kgalhikan?

•  ¿Tuku kilhtamaku nitlan namastakan tuku kgalhikan?

•  Textos xalak Biblia nema lichuwinankgo xlakata namastakan tuku kgalhikan

 Akxni ni xafuerza mastayaw tuku kgalhiyaw tlan kinkakitaxtuniyan. Biblia wan: «Chatunu chatunu katlawalh chuna la lakkaxwilinit kxnaku, ni xatasitsi chu ni xafuerza katlawalh, xlakata Dios paxki tiku xatapaxuwan masta» (2 Corintios 9:7).

 Dios lakaskin pi tiku kakninaniyaw xatapaxuwan namastayaw tuku kgalhiyaw (Santiago 1:27). Komo nakamakgtayayaw tiku maklakaskinkgo, makxtum taskujmaw Dios, chu xla lakpuwan pi kinkalakliniyan xlakata kamakgtayamaw amakgapitsin (Proverbios 19:17). Biblia wan pi Dios nakinkasikulunatlawayan (Lucas 14:12- 14).

 Akxni kaj litlankajwanamputunkan. Makgapitsi li’akxilhtit:

•   Akxni lakaskinaw pi makgapitsin nakinkamalankikgoyan (Mateo 6:2).

•   Akxni wi tuku makglhtinamputunaw (Lucas 14:12-14).

•   Akxni lakaskinaw kakinkalakgmaxtukan (Salmo 49:6, 7).

 Akxni makgtayayaw tuku Dios nitlan akxilha. La akxni, maxkiyaw tumin tiku kaj namakgkgamanan o naliwa kuchu o drogas (1 Corintios 6:9, 10; 2 Corintios 7:1). Na ni tlan maxkikan tumin tiku tlan skuja pero ni skujputun (2 Tesalonicenses 3:10).

 Akxni nila makgantaxtiyaw tuku Dios kinkalakgayawanitan. Biblia wan pi xakgxakga familia xlimaxkit tuku maklakaskin xfamilia (1 Timoteo 5:8). Nitlan xkitaxtulh komo xkamaxkilh amakgapitsin tuku kgalhi chu ni xkamaxkilh xfamilia tuku maklakaskinkgo. Nachuna, Jesús nitlan akxilhli tiku ni xmaxkikgo xnatlatnikan tuku xmaklakaskinkgo kaj xlakata xwankgo pi tuku xkgalhikgo “xmalaknunikgonita pi namaxkikgo Dios” (Marcos 7:9-13).