Chuna. Dios lakaskin pi latamanin katamakxtumikgolh xlakata nakakninanikgo. Biblia wan: «Kalalilakgaputsaw chatunu chatunu xlakata tlakg naʼanan tapaxkit chu xalaktlan tatlaw, ni namakgxtakgaw chuna la tamakxtumiyaw» (Hebreos 10:24, 25).

 Jesús masiyalh pi kstalaninanin xʼamakgo makgtapakgsikgo kʼakgtum takanajla o religión nema liwana xtalakkaxtawilalh. Xla wa: «Wa uma tuku nalitalakgapasatit pi wixin kintamakgalhtawakgen: komo lapaxkiyatit» (Juan 13:35). Kstalaninanin Cristo tlan xlimasiyakgolh uma tapaxkit akxni akxtum xkatatawilakgolh amakgapitsi kstalaninanin Cristo. Xlakata tlan akxtum xtawilakgolh, xtalakaskin pi xmakgtapakgsikgolh kcongregaciones chu xtamakxtumikgolh xlakata xkakninanikgolh Dios (1 Corintios 16:19). Xputumkan linatalan xʼamakgo litaxtukgo kxlikalanka katiyatni (1 Pedro 2:17).

Ni kajwatiya talakaskin namakgtapakgsiyaw kʼakgtum takanajla

 Biblia masiya pi latamanin xlitamakxtumitkan xlakata nakakninanikgo Dios. Pero ni wan pi kajwatiya talakaskin namakgtapakgsiyaw kʼakgtum takanajla xlakata tlan namakgapaxuwayaw Dios. Talakaskin nalilatamayaw tuku kinkamasiyaniyan kintakanajlakan. Akgtum liʼakxilhtit, Biblia wan: «Takaknin nema kinTlatkan Dios akxilha pi skulunku chu ni taxkajwaninit [wa pi] nakakuentajtlawayaw akxni titaxtumakgolh tuku tuwa tiku ni kgalhikgo xnatlatnikan chu tiku nikgonita xchixkukan chu ni nalixkajwananaw kakilhtamaku» (Santiago 1:27).