Chuna, tlan namakgtayayan xlakata wa xTachuwin Dios xla tlan kamamakgkatsini tiku lipuwankgo (2 Corintios 7:6). Maski Biblia ni maktum libro nema tlan nalimakuchikan tiku tatatla kxtalakapastakni, kamakgtayanit lhuwa latamanin nalakgpalikgo xtalakapastaknikan komo akstu kamakgniputunkan. Tastakyaw nema limin na tlan namakgtayayan wix.

•  ¿Tuku laktlan tastakyaw kinkamaxkiyan Biblia?

•  ¿Kalichuwinan Biblia latamanin tiku nialh xlatamaputunkgo?

•  ¿Tuku versículo xalak Biblia namakgtayayan nialh nalakpuwana mi’akstu namakgnikana?

•  ¿Tuku tlan natlawayaw komo chatum amigo kinkawaniyan pi nialh latamaputun?

•  ¿Chu komo klitsaksanita ki’akstu nakimakgnikan?

• ● Kawanti tuku makgkatsiya.

   Tuku wan Biblia: «Xaxlikana amigo putum kilhtamaku paxkinan, chu litaxtu la chatum tala akxni anan talakgaputsit» (Proverbios 17:17).

   Tuku wamputun: Akxni kgalhiyaw tapuwan nema tlawa pi lu nalilakgaputsayaw maklakaskinaw tamakgtay.

   Komo niti nawaniya tuku makgkatsiya tlakg tuwa nawan mimpalakata. Pero komo nawana tuku makgkatsiya, nialh lu katililipuwanti chu tanu la na’akxilha minta’akglhuwit.

   Katlawa uma: La uku wi tiku katachuwinti, max chatum tiku xla mifamilia o chatum amigo tiku tlan talalipina. a Nachuna tlan natsokgwiliya tuku makgkatsiya.

• ● Kaputsa xtamakgtay makuchina.

   Tuku wan Biblia: «Latamanin tiku ni tatatlakgo ni maklakaskinkgo makuchina, pero tiku tatatlakgo maklakaskinkgo makuchina» (Mateo 9:12).

   Tuku wamputun: Akxni tatatlayaw talakaskin nalakganaw chatum makuchina.

   Talakapastakni xlakata mi’akstu namakgnikana max wamputun pi nitlan makgkatsiya o ni tlan wi mintalakapastakni. Ni limaxananaw komo kgalhiyaw akgtum tajatat kimaknikan, nachuna ni nalimaxananaw komo kgalhiyaw akgtum tajatat xla kintalakapastaknikan o la makgkatsiyaw. Umakgolh tajatat tlan kamakuchikan.

   Katlawa uma: Kaputsa xtamakgtay chatum makuchina.

• ● Kalakapastakti pi Dios lhuwa xtapalh akxilhan.

   Tuku wan Biblia: «Tankitsis laktsu tsiktsi kalistakan okgxtiy tumin nema ni lhuwa xtapalh, ¿ni xlikana? Pero Dios nipara tantum kapatsankga. Ni kapekuantit; wixin tlakg xtapalh litaxtuyatit nixawa lhuwa laktsu tsiktsi» (Lucas 12:6, 7).

   Tuku wamputun: Lhuwa xtapalh akxilhan Dios.

   Max mi’akstu makgkatsina, pero ni chuna. Dios katsi tuku titaxtupat. Chu maski nialh latapaputuna Dios lilakgaputsayan. Salmo 51:17 wan pi Dios ni lakgmakgan akgtum «naku nema lu lilipuwan chu ni tlan makgkatsi». Xlikana pi Dios lu paxkiyan chu xla lakaskin kalatapa.

   Katlawa uma: Kaputsa kBiblia niku masiya pi Dios paxkiyan. Akgtum li’akxilhtit kcapítulo 24 xla libro Acerquémonos a Jehová natekgsa makgapitsi.

• ● Katlawani oración Dios.

   Tuku wan Biblia: «Kawilitit putum mintalakgaputsitkan kxmakan xlakata xla kalilakgaputsayan» (1 Pedro 5:7).

   Tuku wamputun: Dios lakaskin pi wix kawani tuku makgkatsiya chu tuku lilakgaputsaya.

   Dios namaxkiyan takaksni chu litliwakga xlakata tlan natayaniya (Filipenses 4:6, 7, 13). Chuna kamakgtaya Dios tiku talakatsuwinikgo (Salmo 55:22).

   Katlawa uma: Katlawani la uku oración Dios. Kamaklakaskinti xtukuwani Jehová chu kawani tuku makgkatsiya (Salmo 83:18). Kaskini tamakgtay xlakata chuntiya natayaniya.

• ● Kalilakpuwanti takgalhkgalhin nema masta xlakata kilhtamaku nema aku mima.

   Tuku wan Biblia: Uma «kintakgalhkgalhinkan tliwakglh wili kilatamatkan xtachuna la tuku limachokgowilikan barco» (Hebreos 6:19).

   Tuku wamputun: Xlakata tuku makgkatsiya tanu tanu tuku namalakpuwaniyan chuna la akgtum lanka unisen anu anu lin barco pero takgalhkgalhin nema masta Biblia tlan nakinkamakgtayayan xtachuna la tuku limachokgowilikan barco.

   Uma takgalhkgalhin ni kaj akgtum ta’akgsanin, xlakata takilhtiyanit xtamalaknun Dios pi namalakgsputu putum tuku kinkamakgapatinanan (Apocalipsis 21:4).

   Katlawa uma: Tlakg kalikgalhtawakga xlakata takgalhkgalhin nema masta Biblia klección 5 xla folleto Lakwan tamakatsin masta Dios.

• ● Katlawa tuku wix lakgatiya.

   Tuku wan Biblia: «Akgtum naku nema paxuwa mapaksanan» (Proverbios 17:22).

   Tuku wamputun: Akxni tlawayaw tuku akinin lakgatiyaw kinkamakgtayayan tlakg tlan natawila kintalakapastaknikan chu tlakg tlan namakgkatsiyaw.

   Katlawa uma: Katlawa tuku wix lakgatiya. Akgtum li’akxilhtit kakgaxpatti tatlakgni nema tlan namamakgkatsiniyan, wi tuku kalikgalhtawakga nema namakgpuwantiniyan o atanu tuku tlan natlawaya. Na nakgalhiya tapaxuwan akxni nakamakgtayaya amakgapitsin maski ni lhuwa tuku natlawaya (Hechos 20:35).

• ● Kuenta katlawa mimakni.

   Tuku wan Biblia: «Xlakata makgatawakgakan [...] makgtayanan» (1 Timoteo 4:8).

   Tuku wamputun: Tlawakan ejercicio, liwana lhtatakan chu liwana wayankan namakgtayayan xlakata ni natatatlaya.

   Katlawa uma: Kataxtu chu lakapala katlawanti maski kaj akgkukitsis minuto.

• ● Kalakapastakti pi tuku makgkatsiyaw chu tuku titaxtuyaw kilatamatkan, talakgpali.

   Tuku wan Biblia: «Wixin ni katsiyatit tuku nakaʼakgspulayan chali» (Santiago 4:14).

   Tuku wamputun: Ta’akglhuwit nema lilakgaputsayaw chu lakpuwanaw pi nikxni katilakkaxlalh namin kilhtamaku nalakgsputa.

   Maski lu tuwa makgkatsiya tuku titaxtupat la uku, tlan natalakgpali chali. Wa xlakata chuntiya katayani (2 Corintios 4:8). Ta’akglhuwit nema tlawa pi nalakgaputsaya namin kilhtamaku natalakgpali, pero komo chatum lataman xʼakstu namakgnikan nialhla tuku tlawakan.

   Katlawa uma: Kalikgalhtawakga kBiblia xli’akxilhtitkan latamanin tiku taxlajwanikgolh chu xniputunkgo. Ka’akxilhtit pi titaxtulh kilhtamaku kaj xalan talakgpalilh xlatamatkan. Ka’akxilhwi makgapitsi li’akxilhtit.

 Chuna. Biblia lichuwinan pi makgapitsi latamanin wankgolh pi xniputunkgo. Dios ni kasitsinilh wata kamakgtayalh. Nachuna natlawa mimpalakata.

Elías

•  ● ¿Tiku xwanit Elías? Maski ni xpekuan chu chatum palakachuwina xlitaxtu, milh kilhtamaku taxlajwanilh. Santiago 5:17 wan pi «Elías nachuna xmakgkatsi chuna la akinin».

•  ● ¿Tuku xlakata xniputun? Milh kilhtamaku, Elías xʼakstu xmakgkatsikan, pekualh chu lakpuwa pi nitu xlitaxtu wa xlakata tasakilh «Oh Jehová kakimakglhti kilatamat» (1 Reyes 19:4).

•  ● ¿Tuku makgtayalh? Elías wanilh Dios tuku xmakgkatsi. ¿La makgpuwantinilh Jehová? Limasiyanilh pi xlilakgaputsa chu makxilhnilh xlitliwakga. Nachuna wanilh pi lhuwa xtapalh xlitaxtu chu maxkilh chatum xmakgtayana tiku x’ama kuentajtlawa.

•  ▸ Kalikgalhtawakga xlakata Elías: 1 Reyes 19:2-18.

Job

•  ● ¿Tiku xwanit Job? Chatum chixku tuku lanka familia xkgalhi chu na xkgalhi lhuwa tumin, nachuna kskujnanilh xaxlikana Dios.

•  ● ¿Tuku xlakata xniputun? Xlatamat Job kaj lakapala talakgpalilh makgatsankgalh putum tuku xkgalhi, putum xkamanan nikgolh chu kgalhilh akgtum nitlan tajatat. Pero ni kajwatiya uma, nitlan likatsinikgolh chu limawakakgolh ta’akgsanin pi tuku nitlan xtitaxtuma wa xlin kuenta. Job lu xkajnilh xlatamat asta wa: «Nialh klatamaputun» (Job 7:16).

•  ● ¿Tuku makgtayalh? Job tlawanilh oración Jehová chu katachuwinalh amakgapitsin (Job 10:1-3). Chatum amigo akgatekgsnilh chu makgpuwantinilh, Elihú tiku makgtayalh tanu na’akxilha tuku tuwa xtitaxtuma. Pero tuku tlakg xlakaskinka wa pi Job mastalh talakaskin pi xpulalilh chu xmakgtayalh Dios.

•  ▸ Kalikgalhtawakga xlakata Job: Job 1:1-3, 13- 22; 2:7; 3:1-13; 36:1-7; 38:1-3; 42:1, 2, 10-13.

Moisés

•  ● ¿Tiku xwanit Moisés? Chatum tiku pulalilh makgasa kachikin Israel chu chatum palakachuwina tiku ni xmakgxtakgnan.

•  ● ¿Tuku xlakata xniputun? Moisés xkgalhi lhuwa taskujut, ankgalhin nitlan xlichuwinankan chu milh kilhtamaku tlakgwalh, wa xlakata tasaskinilh Dios: katlawa litlan «kakimakgni» (Números 11:11, 15).

•  ● ¿Tuku makgtayalh? Moisés wanilh Dios tuku xmakgkatsi. Dios makgtayalh xlakata nialh xkgalhilh lhuwa taskujut chu tlan xmakgkatsilh.

•  ▸ Kalikgalhtawakga xlakata Moisés: Números 11:4-6, 10-17.