¿Tiku ankgo kʼakgapun?
Biblia kinkamaxkiyan xatakgalhtin
Dios kalaksaknit makgapitsi kstalaninanin Cristo tiku ni makgxtakgkgo, nema akxni nikgo tunkun lakastakwanankgo xlakata nalatamakgo kʼakgapun (1 Pedro 1:3, 4). Akxni kalaksakkanita, talakaskin chuntiya nalimasiyakgo takanajla chu nalatamakgo chuna la Dios lakgati. Komo ni chuna natlawakgo nila katiʼankgolh latamakgo kʼakgapun (Efesios 5:5; Filipenses 3:12-14).
¿Tuku natlawakgo anta?
Natamapakgsinankgo Jesús chu sacerdotes nalitaxtukgo akgtum mil kata (Apocalipsis 5:9, 10; 20:6). Namakgtapakgsikgo kxasasti tamapakgsin xalak akgapun (tuku Biblia limapakuwi «xasasti akgapun») chu nakamapakgsikgo xasasti latamanin (o «xasasti katiyatni»). Umakgolh mapakgsinanin namakgtayanankgo xlakata latamanin nialh nakgalhikgo talakgalhin chu kajwatiya Dios nakakninanikgo, chuna la xla xlakpuwanit lata xapulana (Isaías 65:17; 2 Pedro 3:13).
¿La xlilhuwa naʼankgo kʼakgapun?
Biblia wan pi 144,000 latamanin nakamalakastakwanikan xlakata nalatamakgo kʼakgapun (Apocalipsis 7:4). Kʼakgtum talakawan, apóstol Juan akxilhli «Borrego [Jesucristo tiku xlakastakwananita] xya anta ksipi Sion, chu xtawilakgolh akgtum ciento tipuxamatati mil» (Apocalipsis 14:1-3; Juan 1:29; 1 Pedro 1:19). Sipi Sion kilhchanima lilanka nema Dios kamaxkinit Jesús chu 144,000 tiku natamapakgsinankgo (Salmo 2:6; Hebreos 12:22).
Tiku “katasanikanit chu kalaksakkanit” xlakata natamapakgsinankgo Cristo kxTamapakgsin Dios, na kalilakgapaskan «ni xalhuwa borregos» (Apocalipsis 17:14; Lucas 12:32). Uma limasiya pi tiku kalaksakkanit ni lhuwa, ni xtachuna putuminika xborregos Cristo (Juan 10:16).
Tuku lakpuwankgo makgapitsi xlakata tiku naʼankgo kʼakgapun
Tuku lakpuwankgo makgapitsi: Putum tiku tlan likatsikgo naʼankgo kʼakgapun.
Tuku xaxlikana: Dios malaknu pi lhuwa latamanin tiku tlan likatsikgo nalatamakgo kKatiyatni (Salmo 37:11, 29, 34).
Jesús wa: «Nipara chatum chixku anit kʼakgapun» (Juan 3:13). Uma tachuwin liwana masiya pi latamanin tiku tlan xlikatsikgo chu nikgolh akxni Jesús nina xniy, la Abrahán, Moisés, Job chu David, ni ankgolh kʼakgapun (Hechos 2:29, 34). Xlakan xkgalhikgo takgalhkgalhin pi xʼamaka kamalakastakwanikan xlakata nalatamakgo kKatiyatni (Job 14:13-15).
Tiku nakamalakastakwanikan kʼakgapun wa «tiku pulana lakastakwanankgo» (Apocalipsis 20:6). Uma wamputun pi naʼanan atanu talakastakwanat chu uma chuna nala kKatiyatni.
Biblia masiya pi kxTamapakgsin Dios «nialhti katinilh» (Apocalipsis 21:3, 4). Umakgolh tachuwin kilhchanima tuku nala kKatiyatni, xlakata kʼakgapun nikxni ananit linin.
Tuku lakpuwankgo makgapitsi: Chatunu lataman tlan nalaksaka komo latamaputun kʼakgapun o kKatiyatni.
Tuku xaxlikana: Wa Dios tiku kalaksaka kstalaninanin Cristo nema “namakglhtinankgo tatlaja”, uma wamputun, latamat kʼakgapun (Filipenses 3:14). Uma tatlaja ni makglhtinankan kaj xlakata chatum lataman chuna lakaskin o lakgati (Mateo 20:20-23).
Tuku lakpuwankgo makgapitsi: Tiku nalatamakgo kKatiyatni putum kilhtamaku wa tiku ni kaminini nalatamakgo kʼakgapun xlakata ni makgatsikgo tuku talakaskin.
Tuku xaxlikana: Tiku nalatamakgo kKatiyatni putum kilhtamaku, Dios kalimapakuwi «kinkachikin», «tiku kkalaksaknit» chu «tiku kasikulunatlawanit Jehová» (Isaías 65:21-23). Umakgolh latamanin namakgantaxtikgo tuku Dios xlakaskin lata xapulana: pi latamanin tiku ni kgalhikgo talakgalhin kalatamakgolh putum kilhtamaku kʼakgtum paraíso unu kKatiyatni (Génesis 1:28; Salmo 115:16; Isaías 45:18).
Tuku lakpuwankgo makgapitsi: Número 144,000 nema lichuwinan Apocalipsis kaj wi tuku kilhchanima.
Tuku xaxlikana: Xlikana pi lhuwa números nema lichuwinan uma libro kaj wi tuku kilhchanima, pero makgapitsi ni chuna. Akgtum liʼakxilhtit wa «akgkutiy xtukuwanikan kgalhkutiy xʼapóstoles Borrego» (Apocalipsis 21:14). Kaʼakxilhwi atanu tuku masiya pi 144,000 ni kaj wi tuku kilhchanima.
Apocalipsis 7:4 wan «la xlikgalhlit xʼamaka kawilinikan sello [uma wamputun tiku nalatamakgo kʼakgapun]: akgtum ciento tipuxamatati mil», chu akxni aku xwankanit uma número kalichuwinankan «lhuwa latamanin nema nila tiku tlan xkaputlekge». Umakgolh «lhuwa latamanin» na lakgtaxtukgo (Apocalipsis 7:9, 10). Komo número 144,000 wa kakilhchanima latamanin tiku nila kaputlekgekan, ni xtalakaskilh tanu tanu la nakalichuwinankan uma akgtiy grupo. a
Nachuna, wankan pi 144,000 «katamawaxtuka kxlakgstipankan latamanin, chu wa pulana tamakgalan» (Apocalipsis 14:4). Tachuwin «pulana tamakgalan» kilhchanima kaj tsinu tuku laksakxtukanit xliputum latamanin. Uma liwana kalichuwinan tiku natamapakgsinankgo Cristo kʼakgapun chu nakamapakgsikgo lhuwa latamanin tiku nila kaputlekgekan nema nalatamakgo kKatiyatni (Apocalipsis 5:10).
a Wa uma tuku Makgalhtawakgena Robert Thomas tsokgwililh xlakata número 144,000 nema lichuwinan Apocalipsis 7:4: «Uma número ni kaj wi tuku kilhchanima, ni xtachuna tuku min k7:9. Komo nawanaw pi uma kaj wi tuku kilhchanima, putum números nema min kʼuma libro na kaj wi tuku kilhchanimakgo». (Revelation 1-7: An Exegetical Commentary [Comentario exegético de Revelación 1-7], página 474).
You May Also Like
ESSENTIAL BIBLE TEACHINGS
¿Tuku xTamapakgsin Dios?
Jesús tlakg lichuwinalh xTamapakgsin Dios nixawa atanu. Akglhuwa ciento kata kstalaninanin skinkgonit kʼoración kamilh uma Tamapakgsin.
