Talakgalhin wa kaxatukawa tuku tlawayaw, tuku makgkatsiyaw o lakapastakaw nema talalakatawaka xlimapakgsin Dios (1 Juan 3:4; 5:17). Biblia wan pi akxni tlawayaw talakgalhin tlawamaw tuku ni xaʼakgstitum (Santiago 4:17).

 Akxni tsokgwilika Biblia, tachuwin nema xmatitaxtikan «talakgalhin» xwamputun ni malakgchanikan. Akgtum liʼakxilhtit, Biblia kalichuwinan makgapitsi soldados xalak makgan Israel tiku lu xkatsinikgo maklakaskinkgo honda chu lu makastujwa xwankgonit, «xmalakgchanikgo» tuku xtalaputunkgo akxni xmakgosukgo chiwix. Komo uma tachuwin xmatitaxtika chuna la pulana xtaʼakgatekgsa, xwa: «ni xmakglakgalhinankgo» (Jueces 20:16, Nueva Biblia Española). Wa xlakata, lakgalhinankan wamputun ni malakgchanikan o ni makgantaxtikan xaʼakgstitum xlimapakgsin Dios.

 Xlakata Dios wa Malakatsukina, lakgchan nakinkawaniyan tuku kilitlawatkan (Apocalipsis 4:11). Chu akinin kinkalakgchanan namastayaw kuenta kxlakatin Dios (Romanos 14:12).

¿Tlan nikxni namakglakgalhinanaw?

 Nila, xlakata Biblia wan pi «putum makglakgalhinankgonit chu nila limasiyakgo xlikakni Dios» (Romanos 3:23; 1 Reyes 8:46; Eclesiastés 7:20; 1 Juan 1:8). ¿Tuku xlakata chuna la?

 Xapulana, Adán chu Eva ni xlakgalhinankgo, xlakata akxni kamalakatsukika ni xkgalhikgo talakgalhin chu tlan xlimasiyakgo tayat nema kgalhi Dios (Génesis 1:27). Pero makglakgalhinanin litaxtukgolh akxni nialh kgalhakgaxmatkgolh Malakatsukina (Génesis 3:5, 6, 17-19). Akxni kgalhikgolh xkamankan kamatitaxtinikgolh talakgalhin chu tuku nitlan xtachuna la akgtum tajatat (Romanos 5:12). Chuna la wa mapakgsina David: «Akxni klakachilh xakkgalhiya talakgalhin» (Salmo 51:5).

¿Wilakgo talakgalhin nema tlakg laklanka nixawa amakgapitsin?

 Chuna. Akgtum liʼakxilhtit, Biblia wan pi lakchixkuwin xalak Sodoma «lu nitlan xlikatsikgo chu xtlawakgo laklanka talakgalhin», chu «xlikana lu lanka xtalakgalhinkan» xwanit (Génesis 13:13; 18:20). Kaʼakxilhwi pulaktutu tuku nakinkamakgtayayan nakatsiyaw la xlilixkajnit akgtum talakgalhin.

1.   La xlilanka. Biblia wan pi ni kilitlawatkan laklanka talakgalhin la talakgxtumit nema ni xlitatlawat, takaknin nema kamaxkikan tatlawamakgxtu, takgalhan, takgachin, wi tuku akgskgawimakglhtinankan, lamakgnikan chu taskuwan (1 Corintios 6:9-11; Revelación 21:8). Biblia wan pi umakgolh talakgalhin ni xtachuna la amakgapitsi talakgalhin nema ni xlakpuwanitaw natlawayaw, la akxni wanaw o tlawayaw tuku nitlan mamakgkatsini achatum (Proverbios 12:18; Efesios 4:31, 32). Pero Biblia kinkawaniyan pi kuenta kilitlawatkan, xlakata akgtum talakgalhin nema lakpuwanaw pi ni lu xlakaskinka max nakinkamatlawiyan atanu tlakg lanka talakgalhin (Mateo 5:27, 28).

2.   Tuku xlakata chuna tlawaka. Makgapitsi tlawakgo talakgalhin xlakata ni lakgapaskgo xlimapakgsin Dios (Hechos 17:30; 1 Timoteo 1:13). Maski Biblia ni wan pi uma tlan, kinkawaniyan pi uma ni xtachuna la akxni wi tiku xatapaxuwan tlawa talakgalhin chu liwana katsi pi lakatsalama xlimapakgsin Dios (Números 15:30, 31). Biblia wan pi tiku xatapaxuwan tlawa akgtum talakgalhin kgalhi akgtum “nixatlan naku” (Jeremías 16:12).

3.   La xlimakglhuwa tlawakan. Biblia wan pi tlawakan akgtum talakgalhin kaj makgtum ni xtachuna makglhuwa tlawakan watiya talakgalhin (1 Juan 3:4-8). Dios nakamalakgaxokge tiku chuntiya tlawakgo talakgalhin maski katsikgoya pi nitlan tuku tlawamakgo (Hebreos 10:26, 27).

 Latamanin tiku tlawakgonit laklanka talakgalhin max nitlan limakgkatsikgo. Akgtum liʼakxilhtit, mapakgsina David tsokgwililh: «Kintalakgalhin wi kkiʼakgxakga, xtachuna la tsinka takuka, lu lhuwa chu nila kkukalin» (Salmo 38:4). Pero Biblia masta uma takgalhkgalhin: «Tiku nitlan likatsi kamakgxtakgli xtiji chu chixku tiku nitlan tuku tlawa kamakgxtakgli xtalakapastakni; kalakgtaspitli Jehová, tiku nalakgalhaman, kalakgtaspitli kiDioskan, xlakata xla xatapaxuwan natapati» (Isaías 55:7).