Lhuwa latamanin tiku akstu katlawanikan umakgolh takgalhskinin, max ninit chatum tiku lu xpaxkikgo chu ni kajwatiya katsiputunkgo xatakgalhtin umakgolh takgalhskinin, wata putsamakgo tuku tlan nakamamakgkatsini. Makgapitsi lakpuwankgo pi Holocausto wa tuku tlakg nitlan lanit chu ni kanajlakgo pi anan chatum Dios.

 Tuku ni xaxlikana: Akgtum talakgalhin kgalhskininankan tuku xlakata Dios mastalh talakaskin pi xkamakgnika lhuwa judíos.

 Tuku xaxlikana: Lakchixkuwin chu lakpuskatin tiku kanajlanikgo Dios kgalhskininankgonit tuku xlakata Dios masta talakaskin kaʼanalh tuku nitlan. Akgtum liʼakxilhtit, palakachuwina Habacuc kgalhskilh Dios: «¿Tuku xlakata kimaʼakxilhniya lhuwa tuku ni xaʼakgstitum chu nitu tlawaya akxni akxilha pi kamapatinimaka latamanin?» (Habacuc 1:3, Martín Nieto, 1992). Dios ni lakakilhnilh uma palakachuwina, wata matsokgninalh tuku xla kgalhskininalh xlakata putum akinin tlan nalitamakgtayayaw.

 Tuku ni xaxlikana: Dios ni lilakgaputsa akxni akxilha pi patinamaw.

 Tuku xaxlikana: Dios nipara tsinu akxilhputun tapatin chu tuku tlawa pi kaʼanalh tapatin (Proverbios 6:16-19). Biblia lichuwinan pi kxkilhtamaku Noé, Dios «lu katsanilh xnaku» akxni akxilhli pi Katiyatni xlitatsamanit tuku nitlan (Génesis 6:5, 6). Uma kinkamasiyaniyan pi Dios na lu katsanilh akxni kamakgnika lhuwa judíos (Malaquías 3:6).

 Tuku ni xaxlikana: Holocausto wa tuku Dios kalimalakgaxokgelh judíos.

 Tuku xaxlikana: Kxapulana siglo, Dios mastalh talakaskin pi romanos xmasputukgolh Jerusalén (Mateo 23:37–24:2). Pero lata amacha kilhtamaku asta la uku, ni ananit akgtum kachikin nema Dios kamalakgaxokgenit o tlakg kalimasiyaninit xtalakgalhaman. Dios «ni kalaksakpaxki judíos chu tiku ni judíos» (Romanos 10:12, Dios habla hoy [Versión Popular]).

 Tuku ni xaxlikana: Komo anan chatum Dios tiku kgalhi putum litliwakga chu kinkapaxkiyan, ni xmastalh talakaskin pi xkamakgnika lhuwa judíos.

 Tuku xaxlikana: Dios ni wa tiku tlawa pi kapatinaw, pero min kilhtamaku masta talakaskin kaʼanalh tapatin (Santiago 1:13; 5:11).

 Xlakata nalimasiya komo xlikana o ni xlikana tuku wanka lata makgasa. Chu na wa uma tuku xlakata mastanit talakaskin pi kaʼanalh tapatin lata makgasa. Biblia liwana kinkawaniyan pi wa Akgskgawini tiku mapakgsinama kʼuma kakilhtamaku chu ni wa Dios (Lucas 4:1, 2, 6; Juan 12:31). Pulaktiy tuku lichuwinan Biblia kinkamakgtayayan naʼakgatekgsaw tuku xlakata Dios mastalh talakaskin pi xkamakgnika lhuwa judíos.

1.   Akxni Dios malakatsukilh chixku, maxkilh talakaskin nalaksaka tuku natlawa. Dios kawanilh xapulana latamanin, Adán chu Eva, tuku xlitlawatkan xwanit; pero ni kamafuerzajlinilh chuna natlawakgo. Xlakan lakpuwankgolh pi tlan xʼakstukan xlaksakkgolh tuku tlan chu tuku nitlan. Chu tuku laksakkgolh lu nitlan kitaxtulh (Génesis 2:17; 3:6; Romanos 5:12). Lata ama kilhtamaku, latamanin lipatinankgonit tuku nitlan laksakkgonit. Likgalhtawakga nema wanikan Statement of Principles of Conservative Judaism (Lichuwinan tastakyaw nema xlilatamakgo judíos) wan: «Lhuwa anan tapatin xlakata ni liwana maklakaskinitaw tuku Dios kinkamaxkin: kiʼakstukan nalaksakaw tuku natlawayaw». Pero Dios ni tlawanit pi latamanin nialhla nalaksakkgo tuku natlawakgo, wata kamaxkinit kilhtamaku xlakata xʼakstukan nalapulalinkgo.

2.   Dios tlan nalakkaxtlawa chu lakkaxtlawaputun putum tuku nitlan kitaxtulh kʼHolocausto. Xla malaknu pi nakamalakastakwani lhuwa latamanin tiku nikgonita, chu na anta makgtanumakgo tiku nikgolh kʼHolocausto. Na natlawa pi tiku lakgtaxtukgolh kʼHolocausto nialh nalakapastakkgo putum tuku nitlan titaxtukgolh (Isaías 65:17; Hechos 24:15). Dios namakgantaxti umakgolh tamalaknun xlakata lu kapaxki latamanin (Juan 3:16).

 Lhuwa latamanin tiku patinankgolh kʼHolocausto la uku paxuwakgo chu chuntiya kanajlanikgo Dios. ¿Tuku kamakgtayalh? Akgatekgskgolh tuku xlakata Dios masta talakaskin kaʼanalh tuku nitlan chu katsikgolh pi Dios namasputu putum tuku nitlan.