Xtamakamastan Jesús wa tuku Jehová maklakaskin xlakata nakalakgmaxtu latamanin ktalakgalhin chu klinin. Biblia wan pi xkgalhni Jesús wa tuku lixokgoka uma talakgmaxtut (Efesios 1:7; 1 Pedro 1:18, 19). Wa xlakata, Jesús wa pi milh «xlakata namasta xlatamat chu nakalilakgmaxtu lhuwa latamanin» (Mateo 20:28).

¿Tuku xlakata xtalakaskin pi “xkalakgmaxtuka latamanin”?

 Adán, xapulana chixku tiku Dios tlawalh, ni xkgalhi talakgalhin. Nachuna, tlan xlatamalh putum kilhtamaku, pero nila chuna lalh xlakata ni kgalhakgaxmatli Dios (Génesis 3:17-19). Adán kamatitaxtinilh talakgalhin putum xkamanan (Romanos 5:12). Wa xlakata Biblia wan pi Adán tastatanulh chu kastalh xkamanan ktalakgalhin chu klinin xlakata kskujni xlitaxtukgolh (Romanos 7:14). Nila tiku tamawaxtu tuku xla makgatsankgalh xlakata putum akinin makglakgalhinanin (Salmo 49:7, 8).

 Dios kalakgalhamalh xkamanan Adán xlakata ni xkgalhikgo takgalhkgalhin (Juan 3:16). Pero Jehová xaʼakgstitum, chu wa xlakata nila kaj xachunata xkatapatilh, wi tuku xtalakaskin xlakata chuna xtlawalh (Salmo 89:14; Romanos 3:23-26). Xlakata Dios kapaxki latamanin mastalh talakgmaxtut, nema tlawa pi nakatapati xtalakgalhinkan, chu na nalimaklakaskin xlakata namasputu talakgalhin (Romanos 5:6-8).

¿Tuku kilhchanima talakgmaxtut?

 Anta kBiblia, tachuwin talakgmaxtut pulaktutu tuku kilhchanima:

1.   Wa xtapalh tuku lixokgonankan (Números 3:46, 47).

2.   Akxni chuna tlawakan wi tiku o wi tuku lakgmaxtukan (Éxodo 21:30).

3.   Tuku xtachuna xtapalh nema xokgoxtumaka. a

 Kaʼakxilhwi la xtamakamastan Jesucristo makgantaxtilh uma tuku lichuwinamaw.

1.   Xtapalh tuku lixokgonankan. Biblia wan pi kstalaninanin Cristo “lu tapalaxla kaxokgoka” (1 Corintios 6:20; 7:23). Xkgalhni Jesús wa tuku lixokgonanka chu wa uma tuku xla kalitamawalh «latamanin xlakata kskujnikgolh Dios xliputum laklanka familias chu kachikinin chu laklanka kachikinin chu tipalhuwa tachuwin chuwinankgo» (Apocalipsis 5:8, 9).

2.   Lakgtaxtut. Xtamakamastan Jesús kinkalakgmaxtuyan ktalakgalhin (1 Corintios 1:30; Colosenses 1:14; Hebreos 9:15).

3.   Tuku xtachuna xtapalh. Latamat nema Jesús mastalh xtachuna latamat nema Adán makgatsankgalh (1 Corintios 15:21, 22, 45, 46). Biblia wan: «Chuna la lhuwa latamanin lakgalhinanin litaxtukgolh kaj xlakata chatum chixku [Adán] ni kgalhakgaxmatli Dios, nachuna, lhuwa latamanin xaʼakgstitum nalitaxtukgo xlakata chatum chixku [Jesucristo] kgalhakgaxmatnalh» (Romanos 5:19). Uma liwana kinkamasiyaniyan tuku xlakata xlinin kaj chatum chixku tlan kalakgmaxtu lhuwa makglakgalhinanin. Xtamakamastan Jesús «xokgolh tuku xtalakaskin xlakata nakalakgmaxtu putum latamanin» tiku litamakgtayaputunkgo uma tamakamastan (1 Timoteo 2:5, 6).