Ni, xTamapakgsin Dios ni anta wi kxnakujkan kstalaninanin Cristo. a Biblia liwana wan niku wi uma Tamapakgsin akxni limapakuwi «Tamapakgsin xalak akgapun» (Mateo 4:17). Na masiya pi uma akgtum gobierno nema mapakgsinamaja lata kʼakgapun. Kaʼakxilhwi.

•   Xtamapakgsin Dios kgalhi xmapakgsinanin, tiku tapakgsinikgo chu xlimapakgsin. Uma Tamapakgsin na natlawa pi kakgantaxtulh xtalakaskin Dios kʼakgapun chu kKatiyatni (Mateo 6:10; Apocalipsis 5:10).

•   Xtamapakgsin Dios nakamapakgsi «putum kachikinin, laklanka kachikinin chu tipalhuwa xtachuwinkan» (Daniel 7:13, 14). Uma gobierno ni wa laksakkgonit latamanin; wa Dios tiku laksaknit chu lakgayawanit nakapulalin latamanin (Salmo 2:4-6; Isaías 9:7).

•   Jesús kawanilh xʼapóstoles tiku ni xmakgxtakgkgo pi xʼamakgolh tatawilakgo kTamapakgsin xalak akgapun. ¿Tuku xlakata? Jesús wa: «Xlakata [...] natawilayatit kpumapakgsin», uma wamputun xlakata akxtum xtamapakgsinankgolh (Lucas 22:28, 30).

•   Xtamapakgsin Dios nakamasputu xtalamakgasitsin (Salmo 2:1, 2, 8, 9; 110:1, 2; 1 Corintios 15:25, 26).

 Wa xlakata, Biblia ni masiya pi xTamapakgsin Dios mapakgsinan lata kkinakujkan. Uma wamputun pi xTamapakgsin Dios ni anta wi kkinakujkan. Wata tuku Biblia masiya wa pi «xatlan tamakatsinin xla Tamapakgsin» o «tachuwin xlakata Tamapakgsin», tlan nalakgpali chu xlilakgpalit tuku wi kkinakujkan (Mateo 13:19; 24:14).

Pero ¿tuku xlakata Jesús wa pi xTamapakgsin Dios wi kkimpulaknikan?

 Lhuwa latamanin lakpuwankgo pi xTamapakgsin Dios wi kkinakujkan xlakata la makgapitsi Biblia matitaxtikgo tuku wan Lucas 17:21. Akgtum liʼakxilhtit, Biblia Americana San Jerónimo wan: «Xtamapakgsin Dios wi kmimpulaknikan». Pero xlakata liwana naʼakgatekgsaw uma versículo, talakaskin naʼakxilhaw versículos nema min pulana chu alistalh.

 Jesús kawanilh umakgolh tachuwin fariseos, makgapitsi xpulalinanin takanajla nema ni xʼakxilhputunkgo chu lakkaxwilikgolh la namakgnikgo (Mateo 12:14; Lucas 17:20). ¿Xwamputun Jesús pi umakgolh lakchixkuwin xkgalhikgo xTamapakgsin Dios kxnakujkan? Nichuna, xlakata xla kawanilh: «Kminakujkan litsamayatit taʼakgsanin chu tuku nitlan» (Mateo 23:27, 28).

 Amakgapitsi Biblia liwana matitaxtikgo tuku kilhchanima Lucas 17:21. El Nuevo Testamento original wan: «Xtamapakgsin Dios wija kkimpaxtunkan», chu Traducción del Nuevo Mundo de las Santas Escrituras (con referencias) wan: «Xtamapakgsin Dios anta wi kmilakgstipankan» (kaʼakxilhti nota). Pero ¿tuku xwamputun pi xTamapakgsin Dios xwi kxpaxtunkan o kxlakgstipankan fariseos? Xwamputun pi Jesús, tiku Dios xlaksaknit xlakata mapakgsina xlitaxtulh, anta xkatawi (Lucas 1:32, 33).