KAMANAN KGALHSKININANKGO
¿Akgtum talakgalhin tiku lakgati xtachixku o xtapuskat?
«Chuna la xakstaktilhama tuku lu tuwa kmakgkatsilh wa pi xakkalakgati tiku kitachixku. Xakpuwan pi ni makgas kilhtamaku chuna xakama makgkatsi, pero chuntiya xakmakgkatsi uma» (David, 23 kata).
David kstalanina Cristo chu kgalhakgaxmatputun Dios. ¿Tiku makgkatsi chuna la David tlan namakgantaxti tuku Dios lakaskin? ¿Tuku lakpuwan Dios xlakata tiku lakgati xtachixku o xtapuskat?
¿Tuku wan Biblia?
Tuku lakpuwankgo latamanin xlakata tiku lakgati xtachixku o xtapuskat talakgpali xlakata kilhtamaku chu tuku lismanikgo latamanin kʼakgatunu kachikin. Pero kstalaninanin Cristo ni stalaniyaw tuku tlawakgo amakgapitsin. Ni “litaxtuputunaw xtachuna akgtum barco nema lhkgen lhkgen makan taʼakgayawana chu anu anu lin” la wan Efesios 4:14. Tuku akinin lakpuwanaw xlakata tiku lakgati xtachixku o xtapuskat, o atanu talismanin kilhtiyayaw kBiblia.
Biblia liwana lichuwinan xlakata tiku lakgati xtachixku o xtapuskat. Kaʼakxilhwi tuku wan.
«Ni katatalakgxtupi chatum chixku chuna la tatalakgxtupiya chatum puskat» (Levítico 18:22).
«Chu xlakata chuna lu xlakaskinkgo xnakujkan, Dios kamakamastalh xlakata xtlawakgolh tuku lu lixkajni, xlakata xlakxtlawakgolh xmaknikan. […] Xlakata xalakpuskatin lakgmakgankgolh talakgxtumit chuna la xlilat, maski Dios nichuna kalimalakatsukilh» (Romanos 1:24, 26).
«Ni kataʼakgskgawitit. Tiku tlawakgo talakgxtumit nema ni xlitatlawat, tiku kakninanikgo tatlawamakgxtu, tiku akgskgawikgo tiku tamakgaxtokgkgo, lakchixkuwin tiku mastakgo talakaskin pi nakatatalakgxtumikgo xtachixkukan, lakchixkuwin tiku tatalakgxtumikgo xtachixkukan, kgalhananin, latamanin tiku lhuwa tuku kgalhiputunkgo, kgotnin, tiku kawani amakgapitsin lixkajni tachuwin, chu tiku akgskgawimakglhtinankgo, ni katimakglhtinankgolh xTamapakgsin Dios» (1 Corintios 6:9, 10).
Xlimapakgsin Dios putum kilikgalhakgaxmatatkan. Maski wi tiku lakgati xtachixku o xtapuskat, kimputumkan talakaskin namachokgoyaw tuku tlawaputunaw xlakata ni natlawayaw tuku ni lakgati Dios (Colosenses 3:5).
¿Wamputun uma pi...?
¿Wamputun uma pi nitlan nakalikatsiniyaw tiku lakgati xtachixku o xtapuskat?
Ni. Biblia kinkamasiyaniyan pi niti nasitsiniyaw. Wata kinkamakgpuwantiniyan nakatakgalhiyaw takaksni, maski tanu tanu la linkgo xlatamatkan (Hebreos 12:14). Wa xlakata nitlan nakalikgalhkgamanankan, nakaputsastalanikan o nitlan nakalikatsinikan.
¿Wamputun uma pi kstalaninanin Cristo talatlawayaw limapakgsin nema masta talakaskin pi tiku lakgati xtachixku o xtapuskat natamakgaxtokgkgo?
Biblia wan pi Dios kajwatiya tlan akxilha xtamakgaxtokgat chatum chixku chu chatum puskat (Mateo 19:4-6). Pero kstalaninanin Cristo ni para tatayayaw o talatlawayaw limapakgsin nema masta talakaskin natamakgaxtokga tiku lakgati xtachixku o xtapuskat. Nawilikan akgtum limapakgsin nema masta talakaskin natamakgaxtokgkgo tiku lakgati xtachixku o xtapuskat kaj makgtanu kpolítica. Chu Biblia kinkawaniyan pi ni kamakgtanuw kpolítica (Juan 18:36).
Pero ¿komo...?
Pero ¿komo wi tiku lakgati xtachixku o xtapuskat? ¿Tlan natalakgpali uma lataman?
Tlan natalakgpali. Biblia wan pi makgapitsi latamanin xalak pulana siglo talakgpalikgolh. Ktatsokgni nema apóstol Pablo kamalakgachani Corintios liwana masiya pi tiku lakgati xtachixku o xtapuskat nila katitanukgolh kxTamapakgsin Dios, chu alistalh wampara: «Makgapitsi wixin xapulana chuna xwanitantit» (1 Corintios 6:11).
¿Wamputun uma pi tiku makgxtakgkgolh uma tayat nialh nikxni makgkatsikgolh pi xlakgati xtachixku o xtapuskat? Ni. Xtachuwin Dios wan: «Kakgalhitit xasasti tayat nema masta Dios. Akxni tlakg nalakgapasatit Dios, tlakg tlan nawan mintayatkan» (Colosenses 3:10). Chuna, natalakgpalikan lin kilhtamaku.
Pero ¿komo wi tiku stalaniputun tuku wan Dios pero chuntiya lakgati xtachixku o xtapuskat?
Xtachuna la atanu tuku lakgatiyaw, chatunu chatunu nalaksaka komo namasta talakaskin pi tuku lakgati namatlawi tuku nitlan o ni. ¿Chu la machokgo tuku lakgatikgo? Biblia masta xatakgalhtin: «Chuntiya kamastatit talakaskin nakapulalinan xʼespíritu Dios chu ni natlawayatit tuku tlawaputun xamakglakgalhina mimaknikan» (Gálatas 5:16).
Komo kuenta tlawaya na’akxilha pi uma versículo ni wan pi nialh katimakgkatsikgolh pi tlawaputunkgo talakgxtumit xalimaxana. Wata wan pi komo lismaniyaw nakgalhtawakgayaw Biblia chu ankgalhin tlawayaw oración nakgalhiyaw litliwakga xlakata namachokgoyaw tuku makgkatsiyaw chu ni katitlawaputuw.
David, tiku pulana lichuwinanitawa, kgalhilh uma litliwakga, akxni xkawaninita xnatlatni tuku xmakgkatsi. David wan: «Kmakgatsilh pi kmakgxtakgli akgtum takuka, chu komo tunkun xaktikatachuwinalh kinatlatni klakpuwan pi tlakg xaktilipaxuwalh akxni kgawasaku xakwanit».
Tlakg lipaxuwayaw akxni kgalhakgaxmataw xlimapakgsin Jehová. Kilikatsitkan pi xlimapakgsin Dios «xaʼakgstitum» chu «makgapaxuwa naku», chu komo nastalaniyaw nakgalhiyaw lhuwa tasikulunalin (Salmo 19:8, 11).
