Chatum kgawasa tiku wanikan Will, wan: «Lhuwa tiku lakpuwankgo pi lilakgachanit likgalhtawakgakan Biblia. Pero ni katilakgachipini komo katsiniya la nalikgalhtawakgaya».

 ¿Katsiputuna tuku namakgtayayan napaxuwaya akxni nalikgalhtawakgaya Biblia? Uma artículo namakgtayayan.

•  Kalakpuwanti pi anta lapat

•  Kalakputsananti

•  Tuku wankgo makgapitsi kamanan

 Katlawa uma xlakata nalakpuwana pi anta lapat:

1.   Kalaksakti pulaktum tuku likgalhtawakgaputuna. Max tlan nalikgalhtawakgaya pulaktum tuku lichuwinan Biblia pi lanit, tuku lichuwinan Evangelio o pulaktum tuku min kjw.org nema wanikan, talikgalhtawakga Biblia la akgtum drama.

2.   Kalikgalhtawakga tuku laksakti. Tlan miʼakstu nalikgalhtawakgaya o pixlanka nakatalikgalhtawakgaya mifamilia o miʼamigos. Chatum tlan nalitaxtu la narrador chu amakgapitsin tlan nalikgalhtawakgakgo tuku wankgo chatunu chatunu tiku anta kalichuwinamaka.

3.   Kalitsakgsa natlawaya uma:

   •   Katlawa akgtum o tipalhuwa dibujos nema nalichuwinan tuku likgalhtawakga chuna la latilhalh. Katsokgwili kaj ni lhuwa tachuwin nema nalichuwinan akgatunu dibujo.

   •   Katlawa akgtum resumen. Akgtum liʼakxilhtit, akxni nalikgalhtawakgaya xpalakata chatum tiku ni makgxtakglhli Dios, katsokgwili tuku tasikulunalin makglhtinalh xlakata tuku tlawalh chu la xlikatsi.

   •   Katlawa akgtum reportaje xlakata tuku likgalhtawakga. Tipalhuwa la kalichuwinanti chu kakatlawani takgalhskinin tiku kalichuwinamaka chu tiku akxilhkgolh tuku xlama.

   •   Komo chatum tiku lichuwinamaka nitlan tuku laksakli, kalilakpuwanti tuku xkitaxtulh komo atanu tuku xtlawalh. Akgtum liʼakxilhtit, kalilakpuwanti Pedro, tiku lakgmakgalh Jesús (Marcos 14:66-72). ¿Tuku xlitlawat xwanit Pedro akxni titaxtulh tuku tuwa?

   •   Komo matlaniya, katsokgwili tuku wix lakpuwana pi tlan xtilalh, pero anta kakilhtiya kBiblia. Na katsokgwili tuku masiya tuku wix nalichuwinana (Romanos 15:4).

 Komo liwana nalakputsananiya pulaktum tuku lichuwinan Biblia, natekgsa tuku lhuwa xtapalh. Min kilhtamaku, kaj akgtum o akgtiy tachuwin lu xlakaskinka tuku kinkamasiyaniyan.

 Akgtum liʼakxilhtit, katamalakxtumi Mateo 28:7 tuku wan Marcos 16:7.

•    ¿Tuku xlakata Marcos lichuwinan pi nialh makgas Jesús xʼama katasiyani xtamakgalhtawakgen «chu Pedro»?

•  Pista: Marcos ni anta xwi akxni lalh uma; max wa Pedro tiku litachuwinalh.

•  Tuku lhuwa xtapalh: ¿Tuku xlakata max Pedro lu tlan makgkatsilh akxni katsilh pi Jesús xʼakxilhputumpara? (Marcos 14:66-72). ¿La Jesús limasiyanilh Pedro pi xaxlikana xʼamigo xwanit? ¿Tuku tlan natlawaya xlakata nalimasiyaya pi wix na tlan amigo litaxtuya chuna la Jesús?

 Komo nalilakpuwana pi anta lapat akxni wi tuku likgalhtawakgapat chu komo liwana nalakputsananiya, tlakg nalipaxuwa tuku likgalhtawakgapat kBiblia.