Jesús kalimapakgsilh kstalaninanin pi “xkamasiyanikgolh xlipaks akgmakgat chixkuwin” xlakata kstalaninanin xwankgolh (Mateo 28:19, 20). Akxni kamalakgachalh nalichuwinankgo Dios, kawanilh pi xʼankgolh kxchikkan latamanin (Mateo 10:7, 11-13). Akxni xninita, kstalaninanin xla xapulana siglo chuntiyaku malakgatumikgolh tamakatsin niku xwilakgolh lhuwa latamanin chu “kʼakgatunu chiki” (Hechos 5:42; 20:20). La uku akinin tlawayaw chuna la xapulana kstalaninanin Cristo chu akxilhnitaw pi akxni kalakgapaxialhnanaw latamanin kxchikkan tlakg tlan kitaxtu.