Kanajlanikgo. Xtatayananin Jehová kkanajlayaw pi maktuminika Biblia «wa matsokgninalh Dios chu makgtayanan» (2 Timoteo 3:​16, TNM). Chu uma kilhchanima Antiguo Testamento chu Nuevo Testamento. Xlakata ni nalakpuwankan pi Antiguo Testamento nialh makgtayanan, xtatayananin Jehová kwaniyaw Tatsokgni xaHebreo. Nuevo Testamento kwaniyaw Tatsokgni xaGriego.

 Dios tlawalh pi apóstol Pablo xtsokgli: «Sampi wa nkatuwa ntu xapulana ntatsokgli, wa litsokgka mpi chuna nalikatsiniyaw wa ntu ntlan» (Romanos 15:4). Wa xlakata katsiyaw pi Tatsokgni xaHebreo limin tuku lu xlakaskinka. Anta tekgsaw lu tlan tastakyaw chu tuku lanit makgasa nema lu xlakaskinka akxilhaw.

•   Tuku lanit makgasa. Tatsokgni xaHebreo kinkawaniyan la Jehová lakkaxwililh Katiyatni chu la latamanin lakgalhinanin litaxtukgolh. Uma tuku wan kinkamakgtayayan naʼakgatekgsaw niku minitaw chu tuku xlakata niyaw (Génesis 2:7, 17). Nachuna anta katsiyaw la Dios kamakgtayalh tiku latamakgolh makgasa akxni kgalhikgolh taʼakglhuwit nema akinin na titaxtuyaw (Santiago 5:​17).

•   Lakwan tastakyaw. Tatsokgni xaHebreo liminkgo libros xla Proverbios chu Eclesiastés, nema liminkgo lhuwa lakwan tastakyaw xlakata la nalinaw kilatamatkan la uku. Akgtum liʼakxilhtit, kinkawanikgoyan la tlan xatapaxuwan natawila kifamiliajkan (Proverbios 15:17), la ni namalakatsaliyaw la akxilhaw taskujut (Proverbios 10:4; Eclesiastés 4:6), la tlan nalipaxuwaya xlakata wix kgawasaku (Eclesiastés 11:9–​12:1).

 Na lu makgtayanan nalikgalhtawakgayaw xLimapakgsin Moisés chuna la minkgo kTorá, o kPentateuco (xapulana akgkitsis libros xalak Biblia). Maski kstalaninanin Cristo ni kilimakgantaxtitkan tuku wan Limapakgsin, xtastakyaw kinkamakgtayayan napaxuwayaw (Levítico 19:18; Deuteronomio 6:​5-7).