Xtatayananin Jehová ni kpaskuajnanaw akxni kmakgatsiyaw kata xlakata liwana kkatsiyaw pi Dios ni lakaskin naktlawayaw. Maski Biblia ni wan pi ni natatlawa uma paskua, wi makgapitsi tuku kinkamaʼakgatekgsniyan la akxilha Dios akxni paskuajnankan xlakata makgatsikan kata. Kakxilhwi pulaktati tuku nakinkamakgtayayan chu tuku masiya Biblia.

1.   Paskuajnankan akxni makgatsikan kata takilhtinit knixaxlikana takanajla. Chuna la wan maktum diccionario enciclopédico, uma paskua takilhtinit xlakata kanajlakan pi akxni makgatsikan kata, «espíritus chu litliwakga nema nitlan, katlawaniputun tuku nitlan akxni paskuajnanikan makgatsima kata» chu «xlakata anta tawilakgo amigos chu lakwan tachuwin nema wanikgo natlawa pi tlan nakitaxtuni» (Funk & Wagnalls Standard Dictionary of Folklore, Mythology, and Legend). Atanu libro na lichuwinan tuku xtatlawa makgasa xlakata xkatsokgwilikan tiku xlakachinkgo, uma «xlakaskinka xlitaxtu xlakata xtlawakgolh horóscopo», takilhtinit «tuku xtakanajla xlakata astrología». Uma libro wampara: «Tuku takanajla xlakata velas akxni makgatsikan kata kgalhikgo magia xlakata namakgantaxti tuku naskinkan» (The Lore of Birthdays).

    Pero, Biblia wan pi magia nitlan, tiku wan tuku aku nala, taskuwan o atanu «xtachuna la uma» (Deuteronomio 18:14; Gálatas 5:​19-​21). Wa xlakata Dios kamalakgaxokgelh kachikin Babilonia xlakata latamanin xkakninanikgo astrología, uma kilhchanima wankan tuku aku nala (Isaías 47:11-​15). Maski xtatayananin Jehová ni kuentajtlawayaw tuku kilhtsukulh uma talismanin o paskua, pero kilikuentajtlawatkan tuku wan Biblia xlakata taskuwan.

2.   Xapulana kstalaninanin Cristo ni xpaskuajnankgo akxni xmakgatsikgo kata. Chuna la wan maktum enciclopedia (The World Book Encyclopedia), xapulana kstalaninanin Cristo «xkanajlakgo pi uma paskuas xla tamakatamitat xtalismani» o xtakilhtinit ni kxaxlikana takanajla. Biblia limasiya pi xapulana kstalaninanin Cristo chu atanu tiku Jesús kamasiyanilh akxni milh katiyatni wa tuku xlitlawatkan (2 Tesalonicenses 3:6).

3.   Jesús kajwatiya kalimapakgsilh kstalaninanin pi xlakapastakkgolh akxni nilh chu ni akxni lakachilh (Lucas 22:17-​20). Xlakata Biblia wan pi «tlakg [...] tlan kilhtamaku akxni nikan nixawa akxni lakachinkan» (Eclesiastés 7:1). Kxaʼawatiya kilhtamaku akxni xlama kKatiyatni, Jesús tlan tukuwani kgalhilh kxlakatin Dios, wa xlakata kilhtamaku akxni nilh tlakg xlakaskinka litaxtulh nixawa akxni lakachilh (Hebreos 1:4).

4.   Anta kBiblia ni niku wan pi xlakskujnin Dios xpaskuajnankgolh akxni xmakgatsikgolh xkatakan. Uma ni kaj ni kuenta tatlawa, anta kBiblia lichuwinan akgtiy paskua akxni makgatsikan kata xlakata latamanin tiku ni kskujnikgo Dios. Pero, Biblia nitlan la kalichuwinan uma akgtiy paskua nema tatlawalh. (Génesis 40:20-​22; Marcos 6:​21-​29).

 Chuna la chatum tlat tiku tlan likatsi, xtatayananin Jehová kapaxkikgo xkamanankan. Wa xlakata kamaxkikgo tamaskiwin putum kilhtamaku chu lakkaxwili tuku natlawakgo chu paskua nema natlawa pi nalipaxuwakgo. Akxilhxtukgo la likatsi Dios, tiku kamaxki tuku tlan xlakskujnin putum kilhtamaku. (Mateo 7:​11). Wa xlakata, xkaman tiku xtatayananin Jehová ni tuku tlan makgatsankgamakgolh. Chuna limasiya uma tuku wankgolh:

•   «Tlakg tlan tamakgkatsi akxni namakglhtinana akgtum tamaskiwin akxni nitu kgalhkgalhipat.» (Tammy, tiku kgalhi 12 kata.)

•   «Kinatlatni ni kimaxkikgo tamaskiwin akxni kmakgatsi kinkata, pero atanu kilhtamaku chuna tlawakgo. Akit klakgati kaj xalan tuku namaskiwikana.» (Gregory, tiku kgalhi 11 kata.)

•   «Laktsu kamanan kaj wakgo pastel chu kilhtlikgo. Uma paskua ni klakgati, nema tlawakan kkinchik tlakg tlan.» (Eric, tiku kgalhi 6 kata.)