Xtatayananin Jehová ni kmakgtanuyaw kpolítica xlakata kintakanajlakan nema takilhtinit kBiblia. Ni fuerza kwanaw tukuya partido natatayakgo, ni kvotarliyaw akgtum partido o candidato, nitu klakgatayaputunaw kpumapakgsin chu ni kwanaw tiku xlitalakgpalit kpumapakgsin. Anta kBiblia ktekgsnitaw tuku xlakata ni kmakgtanuyaw kpolítica. Wa umakgolh:

•   Kstalaniyaw xliʼakxilhtit Jesús, tiku ni tuku lakgatayaputulh kpolítica (Juan 6:15). Jesús kawanilh kstalaninanin pi nani «katuxawat [x]tapakgsikgo[lh]»; wa xlakata ni xtatayakgolh akgtum partido político (Juan 17:14, 16; 18:36; Marcos 12:13-17).

•   Ni kmakgatsankgananiyaw xTamapakgsin Dios, nema Jesús lichuwinalh akxni wa: «Uma xatlan tamakatsinin xla Tamapakgsin natalichuwinan kxlilakgatum katiyatni» (Mateo 24:14). Xlakata ktatayayaw xTamapakgsin Dios, ni kmakgtanuyaw kpolítica kputum países, chu nachuna niku klamaw. Wata kinkalakgayawakanitan naklichuwinanaw akxni namin uma Tamapakgsin (2 Corintios 5:20; Efesios 6:20).

•   Xlakata ni kmakgtanuyaw kpolítica tlan kkalitachuwinanaw latamanin xlakata xTamapakgsin Dios maski tanu tanu la lakapastakkgo. Xlakata tuku kwanaw chu ktlawayaw, kliskujaw xlakata naklimasiyayaw pi klipawanaw pi xTamapakgsin Dios wa tuku nalakkaxtlawa xtaʼakglhuwitkan latamanin (Salmo 56:11).

•   Komo xakmakgtanuw kpolítica, nialhla xaklatalaliw putum natalan xlikalanka katiyatni (Colosenses 3:14; 1 Pedro 2:17). Asta takanajla nema makgtanukgo kpolítica kamapitsi tiku anta tapakgsikgo (1 Corintios 1:10).

 Kkamaxkiyaw kakni mapakgsinanin. Maski ni kmakgtanuyaw kpolítica, klakgachixkuwiyaw limapakgsin nema wilikgo. Chuna kmakgantaxtiyaw xtastakyaw Biblia xla Romanos 13:1 «Xlipaks nchixkuwin, xlilakgachixkuwitkan mapakgsinanin». Kmakgantaxtiyaw limapakgsin, kxokgoyaw impuesto chu kmakgtayananaw xlakata tuku lakkaxwili kachikin nema nakalimakgtayakan latamanin. Ni klakatsalayaw xlimapakgsinkan mapakgsinanin; chuna la wan Biblia ktlawayaw oración xpalakata «ntlanka napuxkun, chu xlipaks nti nkgalhikgoy xlimapakgsinkan», tlakg liwaka akxni nalakkaxwilikgo tuku xla kintakanajlakan (1 Timoteo 2:1, 2).

 Nachuna ni kkawaniyaw amakgapitsin tuku nalaksakkgo xlakata política. Akgtum liʼakxilhtit, ni kmaʼakglhuwinanaw akxni votarlinamaka chu ni kmachokgoyaw komo wi tiku votarlinamputun.

 ¿Kaj la uku nialh kmakgtanuyaw kpolítica? Ni. Apóstoles chu atanu kstalaninanin Cristo kxapulana siglo na ni xmakgtanukgo. Maktum libro xlakata uma wan: «Maski xkatsikgo pi xmaxkikgolh kakni mapakgsinanin, xapulana kstalaninanin Cristo ni xlakpuwankgo pi na xlimakgtanutkan kpolítica» (Beyond Good Intentions—A Biblical View of Politics [Ni kajwatiya talakaskin tlan talakapastakni. Tuku wan Biblia xlakata política]). Nachuna Orígenes, chatum teólogo tiku latamalh ksiglo II chu III, tsokgli: «Kstalaninanin Cristo nitu lakgatayaputunkgo kpumapakgsin».

 ¿Kalipekua wili akgtum kachikin kaj xlakata ni kmakgtanuyaw kpolítica?

Ni. Ni anan tuku xlakata mapakgsinanin napekuankgo, xlakata akinin ni kmatsukiyaw ta’akglhuwit. Akgtum li’akxilhtit, tuku xwan akgtum tamakatsin kkata 2001 xla Academia Nacional del Ciencias xalak Ucrania. Xlakata ni kmakgtanuyaw kpolítica, wa: «Max la uku xlakata xtatayananin Jehová ni makgtanukgo kpolítica ni paks lakgatikgo. Chu wa xlakata lhuwa mapakgsinanin kaputsastalanikgolh, la nazis chu comunistas». Na wan pi akxni soviéticos kaputsastalanikgolh xtatayananin Jehová, «xlakan putum kilhtamaku makgantaxtikgolh limapakgsin», tiku «ni xakgskgawinankgo chu xatapaxuwan skujkgolh klhuwa granjas chu kfábricas», chu pi «nikxni kalipekua wililh xtamapakgsin cumunistas». Uma tamakatsin limasputulh pi tuku kanajlakgo chu tlawakgo xtatayananin Jehová xala uku «ni kalipekua wiliputunkgo chu ni mapitsiputunkgo akgtum país».