Chuntiyaku kkatalalinaw tiku tamunukgonit pero nialh lichuwinankgo Dios chu nialh tamakxtumikgo. Kkamakgtayayaw xlakata natatliwakglhpara xtakanajlakan chu kkawaniyaw kataspitparakgolh.

 Akxni chatum xtatayana Jehová tiku tamununit tlawa lanka talakgalhin, tlan maxtukan kcongregación. Pero uma ni kaj lakapala chuna tatlawa. Pero komo chatum lakatsala limapakgsin nema masta Biblia chu ni makgxtakga, maxtukan kcongregación chu nialh talalinkan. Biblia liwana wan: «Katamakaxtutit kmilakgstipankan wa yuma ni tlan chixku» (1 Corintios 5:13).

 ¿Tuku la komo chatum chixku maxtukan kcongregación pero xpuskat chu xkamanan chuntiyaku xtatayananin Jehová? Maski la xtalalinkgo xlakata takanajla talakgpali, chuntiyaku akgtum familia litaxtukgo. Xtamakgaxtokgatkan ni talakgpali, chu nachuna la katalalin xkamanan nitu talakgpali.

 Tiku katamakxtukanit tlan ankgo kkintamakxtumitkan komo chuna lakaskinkgo, lakgkgolotsin xalak congregación tlan nakamakgtayakgo xlakata tlan natawilapara xtakanajlakan. Klakaskinaw pi tlan namakgatsiparakgo tuku taskin xlakata xtatayananin Jehová nawamparakgo. Tiku kamaxtukan pero lakgmakgankgo nixatlan tayat chu limparaputunkgo xlatamatkan la wan Biblia tlan natapakgsiparakgo kcongregación.