Tuku ni xaxlikana: Xtatayananin Jehová ni tlawakgo Domingo de Pascua xlakata ni kstalaninanin Cristo.

 Tuku xaxlikana: Kmakgamakglhtinanaw Jesucristo la kiLakgmaxtunakan chu kliskujaw xlakata nakstalaniyaw «lantla ntlawanit» (1 Pedro 2:21; Lucas 2:11).

 Tuku ni xaxlikana: Wixin ni kanajlayatit pi Jesús lakastakwanalh.

 Tuku xaxlikana: Ni kajwatiya kkanajlayaw pi Jesús lakastakwanalh na liwana kkanajlayaw pi anta takilhti xtakanajlakan kstalaninanin Cristo. Chu wa tuku lu xlakaskina klichuwinanaw akxni kkanaw akgatunu chiki (1 Corintios 15:3, 4, 12-15).

 Tuku ni xaxlikana: Ni kamaxkiyatit talakaskin minkamanankan nalipaxuwakgo uma paskua.

 Tuku xaxlikana: Kkapaxkiyaw kinkamanankan chu kliskujaw xlakata nakkamasiyaniyaw chu xatapaxuwan natawilakgo (Tito 2:4).

•   Kmakgapitsi países tuku tatlawa kDomingo de Pascua ni takilhtinit kBiblia.

•   Jesús wa pi nalakapastakaw akxni nilh, ni akxni lakastakwanalh. Xtatayananin Jehová klakapastakaw akgatunu kata akxni nilh chuna la wi calendario xla papaʼ xalak Biblia (Lucas 22:19, 20).

•   Kkatsiyaw pi lhuwa tuku tatlawa kDomingo de Pascua takilhtikgonit ktalismanin niku wi tuku xtlawakgo xlakata xkgalhikgolh kamanan, chu Dios nitlan akxilha. Dios lakaskin «kajwatiya nakakninaniyaw» chu lisitsi akxni tlawayaw tuku xla ni lakgati (Éxodo 20:5; 1 Reyes 18:21).

 Liwana kkanajlayaw pi Biblia kinkatatayayan xlakata klaksaknitaw ni naktlawayaw Domingo de Pascua. Chu Biblia kinkawaniyan pi namaklakaskinaw «liskgalala nema makgtayanan chu tlan tapuwan» chu ni kaj nastalaniyaw talismanin nema tatlawa (Proverbios 3:21; Mateo 15:3). Xlikana pi xatapaxuwan kwanaw tuku kkanajlayaw akxni wi tiku kinkakgalhskinan, pero katsiyaw pi chatunu chatunu xlilaksakat tuku natlawaputun (1 Pedro 3:15).