Tuku ni xaxlikana: Xtatayananin Jehová ni tlawakgo Navidad xlakata ni kanajlanikgo Jesús.

 ● Tuku xaxlikana: Akinin kstalaninanin Cristo chu kkatsiyaw pi kaj xlakata Cristo tlan nalakgtaxtuyaw (Hechos 4:12).

 Tuku ni xaxlikana: Kamapitsikgo familias akxni kamasiyanikgo pi ni natlawakgo Navidad.

 ● Tuku xaxlikana: Familia lu xlakaskinka kakxilhaw, asta klichuwinanaw tuku wan Biblia nema matliwakglha familia.

 Tuku ni xaxlikana: Ni lipaxuwakgo «Navidad», kilhtamaku akxni lhuwa tuku lamaxkikan, anan takaksni chu akxni tlan latalalinkan.

 ● Tuku xaxlikana: Tlan kkatalalinaw amakgapitsin, chu akgtuminika kata lhuwa tuku kmastayaw (Proverbios 11:25; Romanos 12:18). Akgtum liʼakxilhtit, ni kskinaw tumin kkintamakxtumitkan chu ni kmatajinanaw akxni kkanaw lichuwinanaw Dios, xlakata ktlawayaw tuku wa Jesús: «Kaj chunata makgamakglhtinantit, pus na kaj chunata nkamastatit» (Mateo 10:8). Nachuna, klichuwinanaw pi kaj xTamapakgsin Dios nalimin takaksni (Mateo 10:7).

•   Jesús limapakgsinalh pi xlakapastakka akxni nilh, ni akxni lakachilh (Lucas 22:19, 20).

•   Nipara xʼapóstoles chu nipara xapulana kstalaninanin Cristo xtlawakgo Navidad. Diccionario del Cristianismo, wan pi uma paskua «lakkaxwilika kRoma kkata 330» akxni xminita Jesús, akxni xtitaxtunita liwaka akgtiy siglos lata xninita xaʼawatiya apóstol.

•   Nitu tuku litakatsi pi Jesús lakachilh 25 xla diciembre; Biblia ni wan tukuya kilhtamaku lakachilh.

•   Katsiyaw pi Dios nitlan akxilha Navidad xlakata lakatsukunit ktalismanin chu tuku xtlawakgo ni xaxlikana takanajla (2 Corintios 6:17).

 Maski katsikgo pi Biblia ni lichuwinan Navidad chu pi lakatsukunit knixaxlikana takanajla, lhuwa latamanin tlawakgo xlakata lakpuwankgo pi ni lu xlakaskinka chu kaj tlawakgo tuku tlawakgo amakgapitsin.

 Biblia kinkawaniyan kalimaklakaskiw kintalakapastaknikan xlakata nalaksakaw tuku natlawayaw (Romanos 12:1, 2). Na kinkamasiyaniyan pi lu xlakaskinka naʼakxilhaw tuku xaxlikana (Juan 4:23, 24). Uma ni wamputun pi ni lu xlakaskinka akxilhaw tuku wankgo amakgapitsin, pero na ni lakgmakganaw tastakyaw xalak Biblia kaj xlakata natlawayaw tuku tlawakgo amakgapitsin.

 Xlikana pi akinin ni tlawayaw Navidad, pero chatunu chatunu xlilaksakat tuku natlawa xlakata uma. Xlakata katsiyaw uma niti kwaniyaw pi ni katlawalh.