Max 145 kilómetros kxnorte kachikin Nueva York lakatsu kWallkill, wilakgolh pukuxtu nema la uku kalilakgapaskan Hacienda Watchtower. Umakgolh pukuxtu lu makgtayanankgonit xlakata la masiyamakgo xalak Biblia xtatayananin Jehová. Xapulana tamawaka 2 xla enero kata 1963, liwakaya itat ciento kata.

David Walker, tiku wi anta lata tsukulh uma, wan tuku xlakata tamawaka: «Xlakata tlakg xtalhuwima tiku skujkgo niku pulalinkan xtaskujutkan xtatayananin Jehová kBrooklyn, kputsaw la tlan xakkgalhiw tuku nakwayaw chu ni lhuwa tumin xtalaktlawalh. Akinin xakkgalhiyawa akgtum finca kNueva York, pero max akgchaxan o akgtsayan hora xlimakgat xwi lata kBrooklyn. Chu Wallkill kaj akgtiy hora xlimakgat xwi. Lu tlan xwanit». Kʼuma finca xliminkanacha tawakat chu verduras, xaliway wakax, paxni chu xtilan chu atanu chu nachuna leche, queso chu atanu. Alistalh unu tlakg tamawaka pukuxtu.

Akxni titaxtulh akgkaw kata, tlakg stakli xtaskujutkan xtatayananin Jehová, chu talakgpalilh tuku xtatlawa kWallkill. Ni kajwatiya xʼanan tuku xwakan, na tsukuka tlawakan likgalhtawakga: likgalhtawakga nema makgtayanalh xlakata tlan xkamamakxtumika kstalaninanin nema Jesús kalichuwinalh (Mateo 9:37; Lucas 10:2; Juan 4:35, 36). Unu talichuwinan la na limaklakaskinkanit uma pukuxtu.

Tlawakan likgalhtawakga. Asta kxʼitat siglo XX, atsinu ni putum likgalhtawakga xla xtatayananin Jehová xtlawakan kʼimprenta xalak Brooklyn. Pero akxni tlakg talakaskilh, uma imprenta nialh xʼakchan. Wa xlakata kkata 1973, xtatayananin Jehová tlawakgolh akgtum imprenta kWallkill. Lata ama kilhtamaku, makglhuwata mastakakanit imprenta. Chu kkata 2004 wa tuku nina makgas tlawaka.

Niku tlawakan programas xla computadora. Kkata 1979, makgapitsi xtatayananin Jehová anta kWallkill tsukukgolh tlawakgo akgtum programa xla computadora, la uku lilakgapaskan Sistema Electrónico de Edición Plurilingüe (MEPS, chuna la tatsokga kʼinglés). La uku, MEPS makgtayanan xlakata natatlawa likgalhtawakga xalak Biblia kliwaka akgchaxan ciento tachuwin.

Niku masiyanankan. Kkata 1988, Escuela Bíblica de Galaad de la Watchtower anta xtawila kBrooklyn chu alistalh linka kWallkill chu 17 xla octubre xla uma kata anta tsukulh tawila clases. Chu asta abril xla kata 1995 talakgpalipa, ama kilhtamaku tsukulh tawila kCentro Educativo de la Watchtower, nema wi kPatterson (Nueva York).

Chuna la lalh kʼamakgapitsi haciendas, chuna la taskuja chu tuku taliskuja kHacienda Watchtower lu lhuwa talakgpalinit umakgolh itat ciento kata. Pero, chuntiya lhuwa taskujma xlakata nakgalhikgo lakwan liwat xtatayananin Jehová tiku skujkgo kNueva York.

La uku, xtatayananin Jehová tlawamakgo edificios niku nalhtatakan, oficinas chu atanu chiki kWallkill. Nachuna, kaxtlawamakgolh xalakgmakgan edificios. Uma natlawa pi Hacienda Watchtower tlan nakamaxki tuku maklakaskinkgo xla takanajla lhuwa latamanin nema na xtatayananin Jehová wankgonit xliputum katiyatni.

David Walker, nema lichuwinaw pulana, wan: «Lu klipaxuwa xlakata la xlilhuwa staknit umakgolh itat ciento kata chu putum tuku tatlawanit xlakata nakamasiyanikan latamanin xlakata Biblia».